काठमाडौँ । सहकारीको रकम हिनामिना सम्बन्धी छानबिन गर्न बनेको संसदीय विशेष छानबिन समितिले मितेरी सहकारीको निरीक्षण गरेको छ । समितिले बिहीबार उक्त सहकारीमा निरीक्षण गरेको हो । यो त्यही सहकारी हो जसको रकम हिनामिना गरेको आरोप कांग्रेस उपसभापति तथा प्रतिनिधिसभा सदस्य धनराज गुरुङमाथि लागेको छ ।
संसदीय विशेष छानबिन समितिका सभापति सूर्य थापासहितको निरीक्षण टोलीसँग सहकारीका अध्यक्ष कुम्भराज गुरुङले धनराजले डिभोर्स भएको भन्दै गरेको दावीमै शंका गरेका छन् । उनले डिभोर्स नै नभएको बताएका छन् ।
अध्यक्ष गुरुङसँग भएको कुराकानीको भिडियो समितिका सभापति थापाले सामाजिक सञ्जालमा सार्वजनिक गरेका छन् । उक्त भिडियोमा सहकारीका अध्यक्ष गुरुङले एक महिनाअघि धनराज आफैंले आएर सहकारीको रकम तिरेको बताएका छन् ।
समितिका सदस्यले अध्यक्ष गुरुङलाई सोध्छन्, ‘धनराजले तिर्नुभएको कि ज्योतिले तिर्नुभएको ऋण ?’
जवाफमा अध्यक्ष गुरुले भन्छन्, ‘धनराजले आएर तिरेको ।’
‘कैले ?’
‘हेर्नुपर्छ । धेरै भएको छैन । एक महिना जति भयो होला ।’
कांग्रेस उपसभापति गुरुङमाथि सहकारीमा प्रबन्धक रहेकी श्रीमतीसँग मिलेर पौने १५ करोड ठगी गरेको आरोप लागेको छ । उनी विरुद्ध प्रहरीको केन्द्रीय अनुसन्धान ब्यूरो (सीआइबी) मा जाहेरी परेको छ ।
जाहेरीमा सांसद गुरुङ र उनको पत्नी ज्योती गुरुङले आर्थिक अपराध गरेको किटानी छ । ललितपुर महानगरपालिका महालक्ष्मी स्थानमा रहेको मितेरी बचत तथा ऋण सहकारी संस्थाको प्रबन्धक पदमा रहेकी ज्योति गुरुङ र उनको पति धनराज गुरुङले १४ करोड ८१ लाख रुपैयाँ बचत हिनामिना गरेको संसदीय छानबिन समितिमा सो सहकारीका अध्यक्ष कुम्भराज गुरुङले बयान दिएका थिए ।
सहकारी ठगीको आरोप लागिरहँदा गुरुङले भने अस्वीकार गर्दै आएका छन् । उनले ज्योति गुरुङसँग २०७६ फागुनमै सम्बन्धविच्छेद भएका कारण उनले गरेको कारोबारको जिम्मा आफूले लिन नसक्ने बताउँदै आएका छन् । उनले आफ्नो घर व्यवहार सोही सहकारीको अध्यक्षका कारण बिग्रिएको भन्दै ठगीबाट जोगिन अध्यक्षले सबै दोष आफूलाई लगाएको आरोप लगाउन्दै आएका छन् ।
सम्बन्धित समाचार :
सहकारी ठगीमा धनराजको बयानः सहकारीकै कारण श्रीमतीले छोडी
सापटी माग्दै पैसा नभएको चेक काट्थिन् ज्योति, घरमा आएका पीडितलाई हप्काउँथे धनराज
