काठमाडौँ । धनराज गुरुङ भ्रष्टाचार, सुशासन र आर्थिक अपराध विरुद्ध चर्को वकालत गर्ने नेता हुन् । नेपाली कांग्रेसका उपसभापति रहेका गुरुङ पूर्व कानुनमन्त्री हुन् भने स्याङ्जाबाट निर्वाचित सांसद पनि । २०४६ सालदेखि निर्वाचित भएर राजनीतिमा सक्रिय रहेका गुरुङ वडा अध्यक्षदेखि केन्द्रीय मन्त्री हुँदै नेपाली कांग्रेसको तेस्रो ठूलो वरियाताका निर्वाचित उपसभापति समेत हुन् ।
उनै गुरुङमाथि सहकारीमा प्रबन्धक रहेकी श्रीमतीसँग मिलेर पौने १५ करोड ठगी गरेको आरोप लागेको छ । आइतबार जनताटाइम्स डटकम अनलाइनले उनी विरुद्ध प्रहरीको केन्द्रिय अनुसन्धान ब्यूरो (सीआइबी) मा दर्ता भएको जाहेरी सार्वजनिक गरेको थियो ।
जाहेरीमा सांसद गुरुङ र उनको पत्नी ज्योती गुरुङले आर्थिक अपराध गरेको किटानी छ । ललितपुर महानगरपालिका महालक्ष्मी स्थानमा रहेको मितेरी बचत तथा ऋण सहकारी संस्थाको प्रबन्धक पदमा रहेकी ज्योति गुरुङ र उनको पति धनराज गुरुङले १४ करोड ८१ लाख रुपैयाँ बचत हिनामिना गरेको संसदीय छानबिन समितिमा सो सहकारीका अध्यक्ष कुम्भराज गुरुङले बयान दिएका थिए ।
सोमबारको प्रतिनिधिसभा बैठकमा पनि सांसदहरुले गुरुङ संलग्न ठगीबारे प्रश्न उठाएका छन् । सहकारी ठगीको आरोप लागिरहँदा गुरुङ भने पूर्वको एक कार्यक्रममा थिए । उनीमाथि लागेको अरोपबारे सिधाकुराले प्रश्न गर्दा गुरुङ परिवारका अत्यन्तै गोप्य घटनाक्रम खुलाउँदै विषय वस्तुमा प्रवेश गरे । आफूले सहकारी ठगेको भन्ने आरोप मिथ्या भएको दाबी गदै उनले सहकारीको रकम हिनामिना गर्ने ज्योति गुरुङ आफ्नो पूर्वपत्नी भएको दाबी गर्दै उनको चरित्रमै प्रश्न गरे ।
सो सहकारीमा प्रबन्धकको रुपमा काम गर्ने पूर्वपत्नी त्यो ठगीको जिम्मेवार हुने सांसद गुरुङको दाबी थियो । आफ्नो घर व्यवहार सोही सहकारीको अध्यक्षका कारण बिग्रिएको भन्दै सांसद गुरुङले ठगीबाट जोगिन अध्यक्षले सबै दोष आफूलाई लगाएको उनको भनाई छ ।
‘सहकारीका अध्यक्ष कुम्भराज र तत्कालिन प्रबन्धक मेरी पूर्व श्रीमतिका कारण सहकारीमा समस्या भएको हो,’ सांसद गुरुङले भने,‘यसमा मेरो कुनै संलग्नता छैन् । मलाई मुछेर सहकारीका अध्यक्ष आफ्नो किर्ते लुकाउन कसैको उक्साहटमा लागि परेका छन् ।’
उनले आफूले छानबिनमा सरकारका निकायलाई सघाउने पनि बताए । सांसद गुरुङसँग सिधाकुराले गरेको कुराकानीको पूर्ण अंश यस्तो छ ।
