काठमाडाैँ । ललितपुरको मितेरी बचत तथा ऋण सहकारी संस्थाको अगाडि पट्टी दोलखाकी सुष्मा राउत श्रेष्ठको फेन्सी पसल छ । सानो पसल सानै कमाइले घर व्यवहार चलाइरहेकी उनलाई एक दिन सहकारीकी प्रबन्धक ज्योति गुरुङले अत्यन्तै आवश्यक परेको भन्दै रकम सापटी मागिन । उनले ५ लाख रुपैयाँ सापटी मागेकी थिइन् ।
सुरुमा राउतले छैन भन्दै टारिन् । तर, हरेक दिन आएर पैसा मागेको माग्यै गरेपछि उनले २०७६ मङ्सिरमा ४ लाख ४८ हजार रुपैयाँ सापटी दिइन् ।
वैदेशिक रोजगारीमा रहेका उनका भाइले जम्मा गर्न भनेर नेपाल पठाएको पैसा सुष्माले भाइलाई समेत नभनी सापटी दिएकी थिइन । सापटी रकम लिएपछि ज्योतिले एउटा चेक पनि दिइन । ज्योतिले आफू नेताको श्रीमती भएको, यत्ति ठूलो सहकारीको प्रबन्धक भएको भन्दै सापटी फिर्ता गर्नेमा आशङ्का नगर्न पटक पटक आग्रह गर्थिन् । तर, उनी पैसा खाएर फरार भइन् ।
‘रोजगारीका लागि मेरो कान्छो भाइ दुबई गएको थियो । उसले जम्मा गर्न भनेर मलाई पठाएको पैसा मैले उसको विश्वास गरेर भाइलाई समेत नसोधी दिएको थिएँ ।’, सुष्मा भन्छिन्, ‘पछि भाइ नेपाल आएर पैसा खोजेपछि दि नसक्दा भाइ र मेरोसमेत बोलचाल हरायो ।’
सुष्माका अनुसार सापटी लिएर गएकी ज्योतिले दिएको चेकमा ३ महिनाको समय थियो । पैसा दिन्छु भन्दा भन्दै चेक बाउन्स गर्ने समय पनि सक्कियो । उता भाइ नेपाल आएर पैसा खोज्यो । त्यसपछि माइती र घर दुवैतिर सुष्मा नराम्रो बनिन् ।
‘घरमा त कराइहाल्नु हुन्छ नि, त्यत्रो पैसा । सम्झियो भने पनि रुन मन लाग्छ । मैले विश्वास गरेर दिएको थिएँ तर पैसा दिनुभएन । के भन्ने ?’, सुष्मा भक्कानिन्छिन् ।
पैसा पाउने आशमा उनी पटक पटक घर खोज्दै ज्योति गुरुङको घर पुगिन् । तर, उनका पति धनराज र उनकी आमाले आफूहरूसँग ज्योतिको सम्बन्ध नरहेको बताउँदै फर्काएको उनको भनाई छ ।
०००
रामेछापका धनराज श्रेष्ठ परिवार दुई पछिल्लो २० वर्षदेखि ललितपुरको महालक्ष्मीस्थानमा व्यवसाय गर्दै आएका छन् । खाजा खाना बेचेर होटलबाट कमाएको थोरै रकम जम्मा गर्दै श्रेष्ठ परिवारले आफ्नो गर्जो टार्दै आएका थिए । खाजा होटलको पारी पट्टी रहेको मितेरी बचत तथा ऋण सहकारी संस्थाकी ज्योति गुरुङले धनराजको होटलमा खाजा खान्थिन् । उनीहरूको सम्बन्ध दिदीभाइको जस्तो बनेको थियो ।
सोही क्रममा २०७५ चैतमा ज्योति गुरुङ धनराजको होटल गएर जग्गा किन्नका लागि पैसा नपुगेको गुनासो गरिन् । धनराजसँग उनले १० लाख रुपैयाँ ऋण केही दिनका लागि दिन आग्रह गरिन् । धनराजले पनि ठूलो परिवारको मान्छे, त्यत्रो सहकारीको म्यानेजर, यति पैसामा के समस्या आइपर्ला र भनेर ज्योतिलाई ऋणको रुपमा नभई सापटीका रुपमा १० लाख थमाए ।
केही दिनमै दिन्छु भनेको पैसा एक महिनासम्म नदिएपछि धनराजले चेक मागे । सोहीअनुरूप ज्योति गुरुङले २०७६ बैशाखमा लक्ष्मी बैँकको चेक धनराजलाई दिइन् । तर, लामो समयसम्म त्यस खातामा पैसा नभएका कारण पैसा निकाल्न मिलेन । त्यो चेकको मिति सकियो ।
कहिले बिरामी भएको त कहिले आफैँलाई पैसाको आवश्यकता परेको भन्दै ज्योतिले धनराजलाई पुनः दोस्रो पटक नेपाल बङ्गलादेश बैँकको अर्को चेक काटिन् । २०७६ साउन २३ गतेको मिति राखेर दिइएको उक्त चेकको मिति सकियो तर पैसा आएन ।
दोस्रो चेकको मिति सकिएर बाउन्स गर्नुपर्ने मिति समेत सकिएपछि ज्योति धनराजसँगको सम्पर्कबाट अलग भइन् । आफू बिरामी परेर थाइल्यान्ड आएको बताउँदै भाइबरमा कुरा गर्ने ज्योतिले धनराजलाई ब्लक गरिन् । त्यसयता उनीहरूको सम्पर्क भएको छैन ।
‘भाइ प्लीज मैले जग्गा किनेको, पैसाले आवश्यकता पर्यो भनेर पटक पटक अनुरोध गर्नुभयो । त्यति ठूलो घरानाको मान्छे भएका कारण धोका हुन्न भन्ने सोचेर पैसा दिएको थिएँ ।’ धनराजले सिधाकुरासँग दुखेसो पोखे, ‘चेकको मिति नसकिउन्जेल त भाइबरबाट कुराकानी हुन्थ्यो, पैसा दिन्छु भन्नुभएका कारण विश्वास गरेर चेक बाउन्स पनि गरिएन । पछि त सम्पर्कबाटै हराउनुभयो ।’
सुरुमा पैसा आइहाल्ला भनेर कानुनी कारबाहीमा नगएका धनराज ५ वर्षयता पछुताएर बसेका छन् । विगत ५ वर्षदेखि ज्योतिसँग कुराकानी नै नभएको धनराज बताउँछन् । ‘माननीयको श्रीमती, यति ठूलो संस्थाको म्यानेजर, इज्जत भएको मान्छे सोचेर उजुरी दिएनौँ, चेक बाउन्स गरेनौँ ।’, धनराज भन्छन्, ‘मिति रहुन्जेल सम्पर्कमा भएकाले विश्वास थियो । मिति नै सकिएपछि त न चेक बाउन्स गर्न पाइयो, न कुनै आधारमा उजुरी । के गर्ने के गर्ने ।’
चेक नसाटिएपछि चेक बाउन्स गर्नुपर्छ भन्नेसमेत थाहा नभएकी सुष्मा र धनराजको सोझोपनको फाइदा उठाएर ज्योति ५ वर्षदेखि फरार छिन् । यता पीडितहरू भने त्यही चेकका चिर्कटो हेर्दै पुर्पुरोमा हात लगाएर बस्न बाध्य छन् ।
गत सोमबार ज्योति र नेपाली कांग्रेसका उपसभापति एवम् स्याङ्जाबाट निर्वाचित सांसद धनराज गुरुङ सहकारी ठगीमा मुछिएको खबर सार्वजनिक भएको थियो । आफूहरूलाई ठगेकी ज्योतिको सहकारी प्रकरण बाहिरिएपछि अहिले उनीबाट ठगिएका पीडितहरू सङ्गठित भइरहेका छन् । ज्योति गुरुङलाई रकम सापटी दिँदा सांसद गुरुङ एकाघरमै रहेको तर रकम फिर्ता गर्न उनले कुनै पहल नगरेको पीडितहरूको आरोप छ । पटक पटक घरमा पुगेर रकम फिर्ता गरिदिन आग्रह गर्दा उल्टै सांसद गुरुङले हप्काएर पठाएको उनीहरु बताउँछन् ।
पूर्व कानुनमन्त्रीसमेत रहेका सांसद गुरुङले भने ज्योति गुरुङको कारोबारमा आफ्नो कुनै संलग्नता नरहेको दाबी गर्दै आएकी छन् । सिधाकुरासँग सोमबार कुरा गर्दै नेता गुरुङले उनी आफ्नो पूर्व पत्नी भएको भन्दै यि सबै कुराको जिम्मेवारी उनी नै हुने बताएका थिए । ज्योति गुरुङसँग २०७६ फागुन २९ गते सम्बन्ध विच्छेद भएको सांसद गुरुङको दाबी छ । हाल ज्योति गुरुङ फरार छिन् ।
सम्बन्धित समाचार :
