काठमाडौं । राष्ट्रिय स्वतन्त्र पार्टीको संसदीय दलको बैठकमा सभापति रवि लामिछानेले सांसदहरुलाई हिउँदे अधिवेशनको तयारी बारे केहि दिन अघि सोधिएका प्रश्नको जवाफ मागेका छन् ।
केहि दिन अघि रास्वपाका सांसदलाई होमवर्क दिएका लामिछानेले आज सिंहदरबारस्थित संसदीय दलको बैठकमा जवाफ मागेको प्रमुख सचेतक सन्तोष परियारले बताए ।
लामिछानेले केहि दिन अघि सांसदहरुलाई चार वटा प्रश्न साेधेका थिए । जसअनुसार संविधान निर्माणपछि राज्य सञ्चालनको लागि आवश्यक पर्ने ४० विधेयकमा के भइरहेको छ ? तपाईं भएको समितिमा भए त्यसको अवस्था के छ ? निर्वाचनको बेलामा बाचापत्रमा उठाएको मुद्दा त्यो अनुसार विधेयकमा काम गर्न सक्छौं कि सक्दैनौं र नागरिक अधिकार र स्थानीय समस्याहरुको केके मुद्दा उठाउनुहुन्छ? भन्ने प्रश्न गरेका थिए ।
प्रमुख सचेतक परियारका अनुसार आज सबै सांसदले आफ्ना कुरा राखेका छन् भने सोमबार बैठक बस्नुअघि थप छलफल गर्ने तय भएको छ । साथै आजको बैठकले हिउँदे अधिवेशनमा मुख्य कानूनहरु टुंग्याएरै जान सरकारलाई दबाब दिने विषय पनि बैठकमा प्राथमिकताका साथ उठेकाे छ ।
