काठमाडाैँ । प्रमुख प्रतिपक्षी दल नेपाली कांग्रेसले उपप्रधान तथा गृहमन्त्री रवि लामिछानेविरुद्ध प्रदर्शन गर्न कार्यकर्तालाई सडकमा उतार्ने भएको छ । बधुबार बसेको केन्द्रीय समिति र संसदीय दलको संयुक्त बैठकले गृहमन्त्री रवि लामिछानेले सहकारीको रकम हिनामिना गरेको आरोपसहित कारबाहीको माग गर्दै कार्यकर्ता सडकमा उतार्ने निर्णय गरेको हो ।
सडकमा कार्यकर्ता उतार्न पार्टीले आफ्ना भातृ सङ्गठनहरु नेविसंघ, तरुण दल लगायतलाई पत्राचार गर्ने निर्णय गरेको हो । पार्टीले सुरुमा आगामी जेठ ११ गते काठमाडौँमा र त्यसपछि निरन्तर जिल्लामा प्रदर्शन गर्ने निर्णय गरेको हो ।
नेपाली कांग्रेसले गृहमन्त्री लामिछानेमाथि छानबिन गर्न संसदीय छानबिन समितिको माग गर्दै निरन्तर संसद अवरुद्ध गर्दै आएको छ । सहमती बनाउने सहमतिपछि कांग्रेसले गृहमन्त्रीलाई संसदमा बोल्न दिएको थियो । जसका क्रममा गृहमन्त्री लामिछाने छानबिन समिति बनाउन आफू तयार रहेको बताएका थिए । तर समितिको कार्यदेश बनाउन गठित कार्यदलमा सहमति जुट्न नसक्दा छानबिन समितिको टुंगो लाग्न सकेको छैन ।
