काठमाडौँ । सूचना तथा सञ्चार प्रविधि मन्त्री पृथ्वीसुब्बा गुरुङले सरकारबाट बाहिरिनुपरेपछि माओवादीले प्रतिगमनको हल्ला चलाएको बताएका छन् ।
तमु सञ्चारकर्मी संघ नेपालले शनिबार काठमाडौंमा आयोजना गरेको कार्यक्रममा गुरुङले कांग्रेस–एमाले मिल्दा प्रतिगमन हुन्छ भन्ने हल्ला चलाएर माओवादीले सरकारबाट हट्नुपर्दाको पिडा व्यक्त गरेको बताएका हुन् । पटक पटक सरकार परिवर्तनको प्रयोग भएपछि मुलुकमा स्थीरता कायम गर्न ठूला दुई दल मिल्नुपरेको उनले बताए ।
उनले मुलुकको परिवर्तनमा सबै दलको भूमिका महत्वपूर्ण रहेको भन्दै उपलव्धी मास्ने काम कसैले नगर्ने स्पष्ट पारे। गुरुङले कुनै दलको स्पष्ट बहुमत नआउँदा मुलुकमा देखिएको अस्थिरता अन्त्य गर्न निर्वाचन प्रणाली परिवर्तनको बहस चल्नु स्वभाविक भएको भन्दै यसका कारण कोहि पनि आत्तिनुपर्ने अवस्था नरहेको धारणा राखे ।
आवश्यकता अनुसार संविधान संशोधन गर्नुपर्दा सबैका सहमतिका साथ अघि बढ्ने उनले बताए । त्यस्तै मन्त्री गुरुङले संविधानमा सबैको अधिकारका कुरा रहेतापनि यसलाई व्यवहारमा लागू गर्नका लागि नीति कानून आवश्यक रहेकाले यसतर्फ सबैले ध्यान दिनुपर्ने समेत बताए ।
