उदयपुर : संस्कृति, पर्यटन तथा नागरिक उड्डयन मन्त्री सुदन किरातीले हाम्रो जस्तो मुलुकमा विमानस्थल बनाउन भन्दा चलाउन कठिन भएको बताएका छन् । उदयपुरमा निर्माणाधिन सगरमाथा आन्तिरिक विमानस्थलको शुक्रबार निरिक्षण गर्दै मन्त्री किरातीले उक्त कुरा बताएका हुन् ।
मन्त्री किरातीले सिमित स्रोत साधनको कारण विमानस्थल बनाउन निकै अफ्ठ्यारो रहेको बताउँदै विमानस्थल बनाउन भन्दा विमानस्थल संचालन गर्न झन समस्या रहेको बताएका हुन ।
उदयपुरको त्रियुगा नगरपालिका वडा नं २ जोगिदहमा निर्माण सुरु गरिएको उक्त विमानस्थलको रुख कटान कार्य सम्पन्न भएको छ । १५६ हेक्टर वन क्षेत्रमा निर्माण हुने विमानस्थलको लागि सरकारले प्रयाप्त बजेट नछुट्याउँदा रुख कटान बाहेकका काम अघि बढ्न सकेको छैन ।
यही अवस्थामा विमानस्थलको निरिक्षण गर्न पुगेका मन्त्री किरातीले उदयपुरको सगरमाथा विमान स्थलको कामलाई तत्काल अगाडी बढाउन निर्देशन समेत दिएका छन । उनले विमानस्थलको निर्माण प्रक्रिया तत्काल अघि बढाउन मन्त्रालयका सम्बन्धित पक्षलाई भाषणकैबीच फोन गरी काम तत्काल अघि बढाउन निर्देशन दिएका हुन् ।
तिन अर्बभन्दा बढि निर्माण लागत लाग्ने विमानस्थलमा यस बर्ष ५ करोड विनियोजन भएको जनाईएको छ।
