काठमाडौं । कास्कीमा प्रहरीले खाजाघरमा लुडो खेलिरहेका पाँचजना लाई पक्राउ गरेको छ । शनिबार साँझ पैसा बाजी राखेर लुडाे खेलिरहेको अवस्थामा उनीहरूलाई नियन्त्रणमा लिएको प्रहरीले जनाएको छ ।
पक्राउ पर्नेमा पोखरा महानगरपालिका–११, धरहरामार्गका स्थित खाजा घर सञ्चालक ४८ वर्षीय किसान पुनसहित पाँचजना छन् । पोखरा–११ स्थित पुनको खाजाघरमा जुवा (लुडो) खेलिरहेको अवस्थामा उनीहरूलाई पक्राउ गरिएको प्रहरी प्रधान कार्यालयले जानकारी गराएको छ ।
नगद ७२ हजार २२५ रुपैयाँ, खेलमा प्रयोग गरिने गोटी १६ र डाइस एउटासहित उनीहरूलाई पक्राउ गरिएको प्रहरीले जनाएको छ ।
माघ २१, २०८० ०२:२९ मा प्रकाशित
