काठमाडाैँ । नेपाली कांग्रेसले कोशी प्रदेश सभाको बैठक बहिस्कार गरेको छ । सोमबार प्रदेशसभा बैठकमा मुख्यमन्त्री हिक्मत कार्कीले विश्वासको मत लिनेसम्बन्धी प्रस्ताव प्रस्तुत गर्ने कार्यक्रम भएपनि कांग्रेस सहभागी नहुने भएको हो ।
कोशी प्रदेश सरकार गठनको प्रक्रियाप्रति असहमति जनाउँदै नेपाली कांग्रेसले विश्वासको मतसम्बन्धी प्रक्रियामा सहभागी नहुने भएको हो । नेपाली कांग्रेसले संसद बहिस्कारको पत्र लेखेर सभामुखलाई पठाएको छ ।
प्रदेश सरकार गठनको मुद्दा अदालतमा विचाराधीन रहेकाले मुख्यमन्त्रीले तत्काल विश्वासको मत लिन नहुने कांग्रेसको अडान छ । सोही कारणलाई देखाउँदै उसले प्रदेशसभा बैठक बहिस्कार गर्ने निर्णय गरेको हो ।
२७ वैशाखमा प्रदेशको मुख्यमन्त्रीमा नियुक्त भएका कार्कीले विश्वासको मत लिन लागेका हुन् । नेपालको संविधानको धारा १६८ को उपधारा ५ अनुसार मुख्यमन्त्रीमा नियुक्त भएका उनले उपधारा ४ अनुसार विश्वासको मत लिन लागेका हुन् ।
