काठमाडौँ । साइबर अपराध कसुरमा पक्राउ परेका मेडिकल व्यवसायी दुर्गा प्रसाईंलाई थप चार दिन हिरासतमा राख्न जिल्ला अदालत काठमाडौँले अनुमति दिएको छ। अदालतका न्यायाधिश ईश्वरीप्रसाद भण्डारीको एकल इजलासले उनलाई चार दिन हिरासतमा राख्न अनुमति दिएको हो ।
गत मंसिर ४ गते निवासबाटै पक्राउ परेका प्रसाईँ १४ दिनदेखि प्रहरी हिरासतमा छन् । नेकपा एमालेका अध्यक्ष तथा प्रधानमन्त्री केपी शर्मा ओलीको कम्बोडियाको एक टेलिकम कम्पनीमा लगानी रहेको बताउँदै एक भिडियो सामग्री सामाजिक सञ्जाल फेसबुकमा राखेपछि उनलाई नेपाल प्रहरीको केन्द्रीय अनुसन्धान ब्यूरो (सीआईबी) ले घरमै पुगेर पक्राउ गरेको थियो । प्रहरीले प्रसाईंले विद्युतीय अपराध नियन्त्रण ऐन, २०६३ विपरीतको कसुर गरेको भन्दै पक्राउ गरेको अनुसन्धान गरिरहेको छ ।
प्रसाईविरुद्ध यसअघि पनि साइबर अपराधमा मुद्दा दर्ता भएको थियो । उनी १ लाख धरौटी तिरेर थुनामुक्त भएका थिए । उक्त मुद्दा हालपनि विचाराधीन छ ।
