काठमाडाैँ । राष्ट्रिय स्वतन्त्र पार्टीका सभापछि गणेश पराजुलीले सरकारले क्रिकेट खेलाडीका लागि घोषणा गरेकाे पुरस्कार रकम अहिलेसम्म उपलब्ध नगराइएको भन्दै सरकारको ध्यानाकर्षण गराएका छन् ।
बुधबार प्रतिनिधिसभाको बैठकमा उनले खेलाडीका लागि घोषणा गरिएको रकम तत्काल उनीहरुको खातामा पठाउन माग गरे । ‘खेलाडी राष्ट्रका गहना हुन् । हामी सबैलाई थाहा छ । तिनै गहनामाथि बाराम्बार भद्दा मजाक किन गरिन्छ ?’ सांसद पराजुलीले भने, ‘म सम्माननीय सभामुखमार्फत प्रधानमन्त्री र खेलकुदमन्त्रीलाई सोध्न चाहन्छु ।’
पराजुलीले स्वयं प्रधानमन्त्रीकाे उपस्थितीमा एक वर्षअघि राष्ट्रिय क्रिकेट टोली र अन्डर १९ क्रिकेट टोलीलाई घोषणा गरिएको स्मरण गर्दै खेलाडीमाथि यस्तो मजाक र उपेक्षा किन ? भन्दै प्रश्न गरे ।
उनले थपे, ‘जनप्रतिनिधि र सरकारमा रहेका मन्त्री तथा संघीय सांसद कसैले पनि तलब भत्ता नपाएको भन्ने सुनिएको छैन । तर,राज्यसँग पैसा भनेर खेलाडीलाई घोषणा गरिएको पुरस्कार राशी पनि उपलब्ध गराउन नसक्नु कतिसम्म लाजामर्दो विषय हो ? यस विषयमा ओठे जवाफ होइन खेलाडीको खातामा तत्काल रकम जम्मा गर्न आग्रह गर्दछु ।’
