काठमाडौँ । प्रहरीले विभिन्न लागूऔषध सहित चारजनालाई पक्राउ गरेको छ । कास्की, बर्दिया, रूपन्देही र कैलालीबाट लागूऔषध गाँजा, खैरो हिरोइन, नुर्फिन, ब्राउन सुगर सहित ४ जनालाई पक्राउ गरेको हो ।
प्रहरीका अनुसार कास्कीको पोखरा महानगरपालिका ३ नदिपुरबाट प्रतिबन्धित लागूऔषध नुर्फिन डाइजेपाम र फेनरागन ७/७ एम्पुल सहित माछापुच्छ्रे गाउँपालिका ४ बस्ने २८ वर्षीय विशाल नेपालीलाई वडा प्रहरी कार्यालय बगरबाट खटिएको प्रहरीले पक्राउ गरेको छ ।
यस्तै बर्दियाको मधुबन नगरपालिका १७ बाट अवैध लागूऔषध ब्राउनसुगर जस्तो देखिने १ ग्राम १० मिलिग्राम पदार्थ सहित बाँके बैजनाथ गाउँपालिका ३ बनखेत बस्ने २४ वर्षीय नरेश खप्तरी मगरलाई ईप्रका ढोढरीले पक्राउ गरेको छ । यस्तै रूपन्देहीको देवदह नगरपालिका वडा नम्बर १ बिर्ताबाट साढे ७ किलो गाजाँ सहित पाल्पा माथागडी गाउँपालिका ५ बस्ने ६४ वर्षिय कुल बहादुर पल्लीलाई अस्थायी प्रहरी चौकी ढेकावरबाट खटिएको प्रहरीले पक्राउ गरेको हो ।
यस्तै कैलाली, लम्कीचुहा नगरपालिका १ लम्कीबाट अवैध लागूऔषध खैरो हेरोइन जस्तो देखिने ४ सय मिलिग्राम पदार्थ सहित सोही ठाउँमा बस्ने २० वर्षीय कमल शाहीलाई इलाका प्रहरी कार्यालय लम्कीले पक्राउ गरेको छ । पक्राउ परेकाहरु माथि थप अनुसन्धान भइरहेको नेपाल प्रहरीले जनाएको छ ।
