काठमाडौँ । भारतको बिहार राज्यमा मादक पदार्थ विक्रीवितरण तथा सेवनमा राज्य सरकारले प्रतिबन्ध लगाएपछि महोत्तरीको सिमावर्ती क्षेत्रमा नेपालबाट भारततिर रक्सी तस्करी हुने कार्य बढेको पाईएको छ ।
नेपालसँग सिमा जोडिएको बिहार राज्यका स्थानियहरु मादक पदार्थ सेवन गर्न दिनहुँ सिमावर्ती क्षेत्रमा खोलिएका अवैध रक्सी पसल भट्ठीहरुमा आउजाउ गर्ने गरेका छन् । जसले नेपालमा आपराधिक घटनामा वृद्धि सँगै समाजिक गतिविधिमा समेत खलल पुर्याएको स्थानीय बताउँछन् ।
रक्सी तस्करी कार्यमा नेपाल र भारत दुवै देशका नागरिकको संलग्नता हुने गरेको छ । सुरक्षा निकायले यस्ता तस्करी कार्यहरुमा प्रतिबन्ध लगाउन नियमित सिमावर्ती क्षेत्रमा निगरानी राखेको दाबी गर्दै आएपनी तस्करी निरन्तर बढिरहेको छ ।
पछिलो ४ महिनामा शस्त्रप्रहरी बल महोत्तरीले ५० लाख बराबरको विभिन्न ब्राण्डका रक्सी सहित तस्करीमा संग्लन नेपाली तथा भारतिय मोटरसाईकल जलेश्वर भन्सार कार्यालयमा बुझाएको महोत्तरीका शशस्त्र प्रहरी उपरिक्षक विनोद के सी ले बताए । उनका अनुसार महोत्तरीको सम्सी खखना, गैढाभेटपुर, सोनमा,ईटहरवाकट्टी, बसबिट्टी, धबौली, खैरा, चौरिया, बथनाहा, पर्सा पतैली लगायतका सिमावर्ती गाउँहरु रक्सी तस्करीको मुख्य र सहज एग्जिट पॉइन्टको रूपमा चिनिएको छ । गाउँको सांघुरो सडक, खेत बाटो को प्रयोग गरी बिहान रातिको समय तस्करहरु बढ़ी सक्रिय हुने गरेका छन् ।
