काठमाडाैँ । गत पुष २० गते सर्लाहीको बरहथवामा भएको घटनाबारे छानबिन गर्न गठित समितिले एक जनाको ज्यान जानेगरी गोली चलाउने प्रहरी वरिष्ठ हवल्दारलाई सेवाबाट हटाउन सिफारिस गरेको छ ।
गृह मन्त्रालयका सहसचिव थानेश्वर गौतम नेतृत्वको छानबिन समितिले उक्त घटनामा गोली जयशंकर शाहमाथि गोली प्रहार गर्ने वरिष्ठ हवल्दार सोनेलाल यादवलाई सेवाबाट हटाउन सिफारिस गरेको हो । आइतबार समितिका संयोजक गौतमले गृहमन्त्री नारायणकाजी श्रेष्ठलाई बुझाएको प्रतिवेदनमा यादवले चलाएको गोलीका कारण शाहको मृत्यु भएको छानबिन समितिको निष्कर्श छ ।
त्यस्तै उक्त समितिले इलाका प्रहरी कार्यालय बरहथवामा कार्यरत डीएसपी गंगा थापालाई जिम्मेवारी खोसेर फिर्ता बोलाउन समेत सिफारिस गरेको गृह मन्त्रालयका प्रवक्ता नाराणप्रसाद भट्टराईले बताए ।
स्थानीय स्तर मातहत रहेको प्राथमिक स्वास्थ्य केन्द्रलाई प्रदेश मातहत लाने नि नलाने भन्ने विषयमा विवाद हुँदा प्रहरीले गोली चलाएको थियो । गोली लागेर स्थानीय जयशंकर शाहको मृत्यु भएको थियो ।
