काठमाडौँ । काभा महिला भलिबल प्रतियोगीतामा नेपालको तर्फबाट सहभागीलाई ३ लाख उपलब्ध गराउने सरकारले निर्णय गरेको छ । शुक्रबार सरकारका प्रवक्ता पृथ्वीसुव्वा गुरुङले साउन ३१ गते बसेको मन्त्रिपरिषद्को बेठकले सो निर्णय गरेको जानकारी दिए ।
सरकारले १४ जना खेलाडीलाई जनही ३ लाख, मुख्य प्रशिक्षक १ जनालाई दुई लाख एवं व्यवस्थापक, सहायक प्रशिक्षक तथा फिजियोलाई जनही १ लाख २० हजार रुपैयाँका दरले पुरस्कृत तथा सम्मान गर्ने निर्णय गरेको हो ।
त्यस्तै बैठकले परराष्ट्रमन्त्री डा. आरजु राणा देउवाले भाद्र २ गतदेखि भारतको भ्रमण स्वीकृत गरेको छ ।
राजस्व न्यायाधिकरण पोखराको कानुन सदस्य तथा अध्यक्ष पदमा उच्च अदालत पोखराका न्यायाधीश सुदर्शनराज पाण्डेलाई तोक्ने निर्णय बैठकले गरेको छ भने जिल्ला सरकारी वकिल कार्यालय काठमाडौँका जिल्ला न्यायाधिवक्ता श्रीराम खनालाई नेपाल कानुन व्यवसायी परिषदको सचिव पदमा खटाउने निर्णय भएको प्रवक्ता गुरुङले जानकारी दिए ।
बैठकले आर्थिक वर्ष ०७९÷८० र २०८०÷८१ मा लगातार दुई वर्षसम्म वार्षिक एक सय जना नेपालीलाई वैदेशिक रोजगारीमा पठाउन नसकेका इजाजतपत्र प्राप्त संस्थाको इजाजतपत्र चालु आर्थिक वर्षका लागि समेत नवीकरण गर्न आएमा अन्तिम पटकका लागि नवीकरण गर्न बाधा अड्काउ फुकाउ आदेश जारी गर्ने निर्णय गरेको छ भने ५९ जना सहसचिवहरुको जिम्मेवारी हेरफेर गर्ने निर्णय समेत गरेको छ ।
