काठमाडाैँ । राष्ट्रिय स्वतन्त्र पार्टीले पार्टीको समीक्षा गर्न 'समीक्षा यात्रा' सुरु गरेको छ। पार्टी स्थापनाको २४ औँ महिनामा पार्टीको स्थापनादेखि हालसम्मको अवस्था र नागरिकको धारणा बुझ्न आइतबार पार्टीले महामन्त्रीलाई ३२ जिल्लामा यात्राका लागि पठाएको हो ।
पार्टीको नीति, निर्णय र सांगठनिक संरचनाका सबल र दुर्वल पक्ष पहिचानका लागि पार्टीले आगामी असार ५ गतेसम्म डा मुकुल ढकाललाई यात्रामा पठाएको छ । पार्टी केन्द्रीय कार्यालयमा समीक्षा यात्राकाका लागि घण्टी दिएर बिदाई गर्दै सभापति रवि लामिछानेले महामन्त्री ढकालमार्फत विभिन्न पक्षबाट प्राप्त हुने सुझावले पार्टीलाई चुस्त–दुरुस्त र थप जनमैत्री बनाउन सहयोग पुग्ने विश्वास व्यक्त गरेका छन् ।
‘पार्टीले सधैँ नागरिक, सदस्य र सरोकारवालाबीच पुगेर तिनका सुझावका आधारमा आफूलाई परिस्कृत गर्नुपर्छ। महामन्त्रीज्यूको यो यात्रा पार्टी स्थापना यता हामीले लिएको नीति र निर्णयको समीक्षाका लागि सहयोगी हुने विश्वास लिएको छु,’ सभापति लामिछानेले भने ।
वैशाख २१ गते बसेको सचिवालय बैठकले महामन्त्री ढकाललाई समीक्षा यात्रामा पठाउने निर्णय गरेको थियो। यात्रा क्रममा आफूले पार्टीको राजनीतिक र सांगठनिक अवस्थाबारे प्रदेश र जिल्ला तहबाट रिपोर्टिङ लिने र नागरिकका समस्या बुझ्ने महामन्त्री ढकालले जानकारी दिए। ‘हामीले कहाँ सही र गल्ती ग¥यौं, के गर्नु हुन्न र गर्नुपर्छ भन्नेबारे तल्लो तहबाट सुझाव लिन यात्रा गर्न लागेको हुँ’ महामन्त्री ढकालले भने, ‘प्राप्त सुझाव केन्द्रीय समितिमा छलफल गरेर पार्टी सुदृढीकरणको पक्षमा उपयोग गर्छौँ।’
महामन्त्री ढकालका अनुसार यात्रामा सांसद र केन्द्रीय सदस्यहरु बीच बीचमा जोडिने छन्। एक महिने यात्रामा महामन्त्री ढकाल ३२ जिल्लामा पुग्ने बताइएको छ । काठमाडौँबाट सुरु भएको यात्रा डोल्पा पुगेर टुंगिदासम्म महामन्त्री ढकाल ४८ वटा समीक्षा बैठक र कार्यक्रममा सहभागी हुने पार्टीले बताएको छ । महामन्त्री ढकालले समीक्षा यात्राको प्रतिवेदनका आधारमा केन्द्रीय समितिले लिने नीति, योजना र कार्यक्रमअनुसार पार्टी सञ्चालन गरिने जानकारी दिए ।
