काठमाडाैँ । गत शुक्रबार सिधाकुराको ह्वाट्सएप नम्बर ९८५१३६२६६६ मा एउटा मेसेज आयो । हामीलाई मेसेज गर्ने व्यक्ति थिए इलामको माइजोगमाई ४ का सुकबहादुर लिम्बू ।
लिम्बू ५ महिनाअघि मात्रै वैदेशिक रोजगारीका लागि दुबई पुगेका रहेछन् । काठमाडौँमा रहेको एआई सेक्युअर मेनपावर रिक्रुटमेन्ट प्रा.लि मार्फत दुबई पुगेका उनी बिरामी परेर थलिएको २ साता भइसकेको रहेछ । उद्धार र उपचारका लागि कम्पनीसँग याचना गर्दा पनि सुनवाई नभएपछि उनले ज्यान नबाँच्ने स्थितिमा पुगेको भन्दै सिधाकुरालाई म्यासेज पठाएका रहेछन् ।
‘म हाल १५ दिनदेखि बिरामी परेको छु । कम्पनीले आफैँ उपचार गर भन्छ । अघिल्लो महिनाको तलब एक रुपैयाँ पनि दिएन । खानलाई पैसा छैन । कसरी उपचार गरौँ रु कुन पैसाले गरौँ रु इन्स्युरेन्स (बीमा) पनि थोरै साधारण रुघा खोकीको मात्र कभर हुने खालको रहेछ ।’
लिम्बूका अनुसार उनको गालामा अनौठो गिर्खा भित्रैबाट आएको छ । ‘मुख खोल्नसम्म हुँदैन । सुन्निएको छ, भित्र धेरै दुख्छ, खान खानु नभएको १५ दिन जति भयो । तातोपानी र पाउरोटी घोलेर जबर्जस्ती खाएर स्वास जोगाएको छु ।’ उनका अनुसार स्थानीय क्लिनिकले अस्पताल गएर अप्रेसन गर भनेको छ । तर उनीसँग पैसा छैन् । ‘कुन पैसाले गर्ने हजुर, न सेलरी दियो, न उपचार । के म यतिकै मर्ने हो रु म बिन्ती बिसाउँछु, मलाई नेपाल फर्काइदिनुस् ।’
लिम्बूका अनुसार कम्पनीले घर जान दिइरहेको छैन । सम्झौता क्यान्सिल गरेर उपचार गर्न घर जान्छु भन्दा नमानेको उनले सिधाकुरालाई बताए । ‘म यहाँ आएको लगभग ५ महिना भयो । मेनपावरले कुरा मात्रै गर्छ । मेरो अवस्था झनझन् नाजुक हुँदै गएको छ । पानी मात्रै मुख खान मिलेको छ,’ उनले भने । सुरुमा हलुका दाँत दुख्नेबाट सुरु भएको समस्या गालामा पिलो जस्तो भएर बढेको र एकदम चाम्रो गिर्खा देखिएको लिम्बू बताउँछन् । उनले फेरि याचना गरे ‘एकदम पोल्छ, दुख्छ । न तलब दिन्छ, न उपचार गर्छ । म घर फर्कन चाहन्छु । मलाई उद्धार गर्नुस् ।’
राम्रोसँग अक्षरसमेत नचिन्ने सुकबहादुरले यो मेसेजसमेत सँगै बस्ने साथीलाई लेख्न लगाएर सिधाकुरालाई पठाएका रहेछन् ।
म्यासेज आउनासाथ हामीले दुबइमा रहेका सुकबहादुर लिम्बुलाई सम्पर्क गर्यौँ । मेसेजमा भनेजस्तै उनी राम्रोसँग बोल्न समेत नसक्ने पाइयो । हामीले उनीसँगै कोठामा भएका अर्का नेपालीसँग संवाद गर्यौँ र उनीहरूको दुबईस्थित ठेगाना मगायौँ ।
उनी दुबइको अल खवानिज टु जेएफएम क्याम्पमा बसेर ग्रिन स्याडो सेक्युरिटी सर्भिस नामक कम्पनीमा काम गर्ने गरेको पत्ता लाग्यो । सिधाकुरासँग सम्पूर्ण विवरण प्राप्त भएपछि दुबइमा रहेका विभिन्न निकायहरूसँग समन्वय सुरु गर्यौँ । लिम्बुको उद्धारका लागि तयार भएका संस्थाका व्यक्तिहरू र पीडितको दूरी टाढा भएका कारण केही समय लाग्ने भयो । त्यसपश्चात् हामीले दुबईमा विगत लामो समयदेखि कार्यरत र त्यहाँ पीडामा रहेका नेपालीलाई सहयोग गर्दै आएका सुजन थापालाई सम्पर्क गर्यौँ ।
हामीसँगको सम्पर्कपछि थापाले भोलि नै आफूहरू पीडित भएको स्थानमा पुग्ने आश्वासन दिए । भोलिपल्ट प्रल्हाद पाठकसमेतलाई लिएर थापा पीडित भएको स्थानमा पुगे ।
एकजना बिरामीको अवस्था बुझ्न र उद्धारको पहल गर्न गएका उनीहरूले त्यहाँ अन्य नेपालीहरूसमेत समस्यामा रहेको फेला पारे । बुझ्दै जाँदा त्यहाँ सुकबहादुर लिम्बूमात्र हैन, अन्य ९ जना नेपालीसमेत विगत ४ महिनायता सेवा सुविधा त परको कुरा आफ्नो पारिश्रमिक समेत नपाई समस्यामा परेको खुल्यो । उनीहरु सबैले जसरी पनि नेपाल फर्काइदिन पाठक र थापालाई आग्रह गरे ।
उनीहरूको चित्कार पछि उनीहरूलाई नेपालबाट दुबई पुर्याउने मेनपावर कम्पनी एआई सेक्युअर मेनपावर रिक्रुटमेन्ट प्रा.लिका सञ्चालक राजन कार्कीलाई सम्पर्क गर्यौँ । कार्कीले उद्धारमा पहल गर्ने वचन दिए । ‘ राम्रो कम्पनी भनेकाले युवाहरूलाई दुबई पठाएको भएपनि उनीहरु समस्यामा रहेछन् । यदि उनीहरु नेपाल फर्किए भने उनीहरूको पैसा हामी फिर्ता गरिदिन्छौँ,’ कार्कीले भने ।
पीडित युवाहरूको उद्धारको आग्रहपछि दुबईमा रहेका सुजन थापा र प्रल्हाद पाठकसँगको समन्वय पछि केही दिनमै उनीहरूको उद्धार हुनेभएको छ । उनीहरूलाई दुबई पठाउने मेनपावर कम्पनी र उनीहरु काम गर्ने कम्पनीलाई समेत समस्याको बारेमा जानकारी गराइसकिएको छ । पीडितको गुनासो लिएर अबु दुबईस्थित नेपाली दुतावासमा पुगेका थापा र पाठकले सिधाकुरालाई बताएका छन । अबु दुबईस्थित नेपाली दुतावासले पनि उनीहरूको तत्काल उद्धार गर्ने प्रतिबद्धता जनाएको छ ।
