जाजरकोट। जिल्ला प्रशासन कार्यालय जाजरकोटका अनुसार भूकम्पबाट ३४ हजार घरधुरी प्रभावित भएका छन् । जस मध्ये ९ हजार ७ सय ९४ घर पूर्णरुपमा ढलेका छन् भने २४ हजार ७ सय ७ घरमा बस्न सक्ने अवस्था छैन ।
तर अहिलेसम्म जम्मा २२ हजार १ सय ३१ वटा मात्रै पाल वितरण भएको छ । भने जम्मा १७ हजार ब्ल्याङकेट वितरण भएको छ । प्रशासनकै अनुसार ३४ हजार घरधुरीका लागि तत्कालै पाल तथा बल्याङ्केट पुर्याउनु पर्ने भएपनि अझै १२ हजार परिवारले पाल समेत पाएका छैनन् ।
सबै भन्दा धेरै क्षति पुगेको जाजरकोटको भेरी नगरपालिका भित्रै पीडितहरुले पाल समेत नपाएको भेरी नगरपालिकाका प्रमुख चन्द्रप्रकाश घर्तीले बताए । घर्तीले नगरपालिकाले नै ३ हजार पाल खरिद गर्न खोज्दा समेत नपाएको गुनासो गरे ।
घर्ती भन्छन् भेरी नगरपालिकाकै भित्रै पीडितहरू खुल्लाठाँउमा कठ्याङ्ग्रिएका छन्, उनीहरूको जीवन रक्षाका लागि एक सरो पाल समेत पुर्याउन नसकेको अवस्था छ । घर्तीले निराश हुँदै भने केन्द्रमा फोन गर्यो, ट्रकका ट्रक सामान गएको छ भन्छन्, सुर्खेतमा फोन गर्यो हेलिकप्टरले सामान लगेको छ भन्छन्, समाचार भारत देखि चीनले समेत राहत दिएको फोटो देखेको छु, तर पीडितहरू बारीमा एक सरो कपडामा रात काटिरहेका छन् ।
प्रमुख घर्तीका अनुसार स्थानीय तहलाई राहत वितरणमा विश्वास नगरी जिल्ला विपत व्यवस्थापन समितिलाई बढी सक्रिय बनाइएको छ, केन्द्र सरकार मातहत रहने प्रशासन तथा सुरक्षा निकायको मात्रै भर पर्दा भूकम्प गएको एक सातासम्म पनि पीडितलाई राहात पुर्याउन सकिएको छैन । बल्ल बल्ल पुगेको पाल समेत सानो र पातला भएका कारण पाल टाँगेर सुत्ने मिल्ने छैनन् ।
स्थानीय दिलबहादुर राहतले भने दुई दिन लडेर एउटा पाल र एउटा ब्ल्याङकेट पाइयो, टांग्ने बेलामा हेर्दा दुई मिटरको मात्रै रहेछ, बल्याङ्केट भनिएपनि एक जनाले ओड्दा पनि न्यानो हुँदै निकै पातलो रहेछ । दिलबहादुरले गुनासो गरे राहतको सामान दिएर फोटो खिचे, समाचारमा राहत लिदै गरेको मेरै फोटो भाइरल भएको छ तर न ओत लाग्न मिल्छ, न न्यानो हुन्छ ।
यता भूकम्पको क्षतिको अवलोकन गर्न भन्दै सबै नेता जाजरकोट पुगेका छन् । राष्ट्रपति रामचन्द्र पौडेल देखि केन्द्रका मन्त्री मात्रै होइन प्रदेशका मन्त्रीहरू पनि हेलिकप्टरमा जाजरकोट आउजाउ गरिरहेका छन् ।
स्थानीय रविन्द्र कुमाईले सिधाकुरासँग गुनासो गरे, सबै नेता आउँछन्, भत्किएको घर हेर्दै हामीसँग फोटो खिच्छन् अनि पहल गर्छौ भन्दै फर्कीन्छन् । हामी हेलिकप्टर उडेको हेरेर बसिरहेका छौँ । नलगाडका स्थानीय नगेन्द्र खड्का अनुसार भत्किएका घर र कष्टकर जीवन बाँचिरहेकालाई सहयोग गर्न भन्दा बढी हेरेर फोटो खिच्ने आउनेहरू धेरै छन् । आएका नेताहरूलाई गुहार्दा र घटनाको बेलिबिस्तार लगाउँदा लगाउँदै उनिहरु आजित भएका छन् । खड्का भन्छन् नेताहरूले पीडितलाई राहत दिनेकम भन्दा बढी 'डिजास्टर टुरिजम'कारुपमा रमाएको देखिएको छ ।
