गोरखा जिल्ला पर्यटकहरुको लागि नयाँ र नौलो गन्तव्य होइन । यहाँको इतिहास, मनास्लु हिमाल र मनास्लु सर्कीट, विभिन्न जातीय सँस्कृति तथा संस्कारले गोरखालाई विश्वमा नै चिनाएको छ । पछिल्लो समय सडक यातायातले जोडिएका गोरखा जिल्लाका विभिन्न गाँउहरुमा आन्तरिक तथा बाह्य पर्यटकहरुको चहलपहल समेट बढेको देखिन्छ । यसै सन्दर्भमा पर्यटकहरुका लागि नयाँ गन्तव्यको रुपमा विकास हुदै गरेको छ, भच्चेक, बारपाक माछीखोला ट्रेक ।
गोरखा जिल्लाको अजिरकोट गाँउपालिका भच्चेकबाट सुरु गरी धार्चे गाँउपालिकाको माछिखोलामा पुगी अन्त्य हुने सो ट्रेक आन्तरिक तथा बाह्य पर्यटकहरुका लागि आकर्षक गन्तव्य हुनसक्छ । सो ट्रेकमा भच्चेक बजार, मादले गाँउ, गोगनपानी, हरेनघडेरी, झ्यावा, बालुवा बजार, बारपाक, लाप्राक, गुम्दा, यामगाँउ, लप्सीबोट गाँउहरु पर्दछ । २०७२ सालको गोरखा भुकम्पले क्षति पुगेका यी गाँउहरुको अवलोकन गर्दै, स्थानिय उत्पादनको स्वाद लिदै यात्रा गर्न सकिने सो रुटमा गुरुङ्ग संस्कार र संस्कृतिलाई नजिकबाट बुझ्न समेत सकिन्छ ।
राजधानी काठमाडौँको नयाँबसपार्कबाट बाहिन सात बजे भच्चेकको लागि बस छुट्ट सो बसले ३ बजे भच्चेक बजार पुर्याउछ । एक दिन भच्चेक बजारको विभिन्न स्थानहरुको घुमफिर गरि भोलिपल्ट सो रुटका लागि यात्रा सुरु गर्न सकिन्छ । पहिलो दिन भच्चेक, मादले गाँउ, गोगनपानी, हरेनघडेरी, झ्यावा, बालुवा बजार हुदै बारपाकमा बास बस्ने गरि जान सकिन्छ ।
बारपाक यातायातको सुविधाले जोडिएको हुनाले बस तथा विभिन्न यातायातको साधानको प्रयोग गरि समेत बारपाक पुग्न सकिन्छ । करिव १५ सय भन्दा धेरै घरहरु रहेको बारपाक २०७२ सालको गोरखा भुकम्पको केन्द्रविन्दु समेत हो, आन्तरिक तथा बाह्य पर्यटकहरुको निकै चहलपहल देखिने बारपाकले भने भुकम्पपछि आफ्नो मौलिकता गुमाएको छ । परम्परागत घरहरु भत्किएपछि यहाँ आधुनिक र कंक्रिटका घरहरु बनेका छन् । एक दिनको बारपाकको बसाई पछि करिव साढे दुई घण्टाको यात्रापछि पुग्न सकिन्छ धार्चे गाँउपालिकाको लाप्राक गाँउ । लाप्राक पुरानो गाँउ पुग्नु भन्दा पहिले नै लाप्राकको नयाँबस्तीले पर्यटकहरुलाई स्वागत गरिरहेको हुन्छ ।
०७२ को भुकम्प र पहिरोको जोखिमका कारण गैरआवासीय नेपालीहरुले बनाइदिएको सो नयाँबस्ती पर्यटकहरुको अर्को आकर्षणको केन्द्र हो । लाप्राक पुरानो गाँउ पहिरोको जोखिमका विच पनि त्यहाँका मानिसहरु खेतीबारीका लागि भने नयाँबस्तीमा खासै बस्ने गर्दैनन् । आलु, जौं, कोदी नै यहाँको प्रमुख उत्पादन हो । परम्परागत घर तथा गुरुङ संस्कार र संस्कृति अनुसारको अतिथि स्वागत यहाँको विशेषता हो । खेतीबारी, घाँसदाउरामै रमाउने यहाँका मानिसहरुको बानी हो । लाप्राकमा एक दिन बिताएपछि अर्को दिनको यात्रा सुरु हुन्छ गुम्दाको लागि ।
लाप्राकबाट करिब दुई घण्टाको दूूरीमा रहेको गुम्दा गाँउ पनि सडक संजालले जोडिएको छ । पहेँलो जौ बारी, र जौ भित्र्याउनका लागि हतारिएका स्थानीयहरु बारीमा काम गरि रहेको देखिन्छ सो गाँउमा । यहाँ विभिन्न समयमा विभिन्न मेलाहरु लाग्ने गर्दछ, आलु मेला, मकै विवाह यहाँका साँस्कृतिक मेलाहरु मध्येमा पर्दछ । गुम्दामा एक दिन विताएपछि यामगाँउ, लप्सीबोट हुदै माछिखोला पुग्न सकिन्छ ।
माछिखोला बुढिगण्डकी र रेचे खोला (हाइड्रो खोला) को दोभानमा अवस्थित छ, जुन प्रख्यात मनासलु सर्कीटको प्रस्थान विन्दु समेत हो । माछिखोलासम्म गोरखाबजार र काठमाडौँका लागि दिवा तथा रात्रिकालिन सार्वजनिक यातायातको समेत सुविधा रहेको छ ।
यसरी करिव चार देखि पाँच दिनको सो भच्चेक, बारपाक, माछिखोला ट्रेक अन्त्य गर्न सकिन्छ । आर्थिक हिसावले निकै सस्तो रहेको सो ट्रेक सडकको अवस्था सुधार भएपछि मोटरबाइक तथा जिपमा समेट गर्न सकिन्छ । आन्तरिक र बाह्य पर्यटकहरुका लागि नयाँ गन्तव्यको रुपमा भच्चेक, बारपाक, माछिखोला ट्रेकस्थापित हुन सक्छ ।
