जाजरकोट । भूकम्पले तहसनहस भएको जाजरकोटमा देश तथा विदेशबाट राहत आउने क्रम जारी छ । सरकारले पठाएको तथा नेपालकै प्रदेश सरकार, स्थानीय सरकार तथा बिभिन्न राजनीतिक दल तथा संघसंस्थाले पठाएका राहत सामग्रीहरु भने पुगिसकेका छन् । जिल्ला प्रशासन कार्यालय जाजरकोटमा राहतका सामग्रीहरु यसरी थुपारिएको छ ।
यी राहत सामग्रीहरु शनिबार र आइतबार पुगेका हुन् । तर प्रशासनले भएका राहत सामग्रीको सही वितरण गर्न नसक्दा भूकम्प पीडितहरुले गएको रातपनि खुला आकाशमुनी सडकमै बिताएका छन् ।
यो भिडियो हेर्नुहोस् ।
यो भिडियो आइतबार राति करिब १० बजेको समयमा कैद गरिएको हो । र यो स्थान जाजरकोटको खलंङ्गा नजिकैको हो । यहाँ महिलाहरु साना बालबच्चासहित रोडमा सामान्य बिछौना ओच्छ्याएर सामान्य सिरकको भरमा रोडमै सुतेका थिए । उनीहरुको साथमा साना बाल बच्चा समेत थिए । ‘घर भत्कियो, बस्ने अवस्था छैन । त्रीपाल माग्न गएको दिएनन् । अनी यसरी नै सुत्यौँ ।’ एक महिलाले भनिन् । उनका उनीहरु त्रीपाल माग्न गएका थिए । तर उनीहरुलाई दिइएन ।
यता प्रशासनमा राहत सामग्री थुप्रिएको छ । यो राहत सामग्री सबैका लागि पर्याप्त नभएपनि धेरै परिवारलाई ओत लाग्न पुग्ने छन् । तर प्रशासनले वितरण गरेको छैन । किन वितरण नगरेको भन्ने प्रश्न प्रशासन वितरण हुँदै छ, जनशक्ति कम छ भन्ने जवाफ दिन्छ ।
सरकारले राहत सामग्री वितरणमा एकद्वार प्रणाली लागू गरेको छ । सहयोग गर्न चाहनेहरुले जिल्ला प्रशसनमार्फन नै सहयोग गर्नुपर्ने हुन्छ । प्रशासनले आवश्यकता र प्राथमिकतालाई मध्यनजर गर्दै वितरण गर्छ । यसरी राहत वितरण गर्दा सबै ठाउँका सबै पीडितले समान राहत पाउँछन् । साथै बिभिन्न स्वार्थ राखेर राहत वितरण गर्ने कार्य निस्तेज हुन्छ । तर प्रशासनले गरेको ढिलासुस्तीले समयममै पीडितले राहत पाउनेमा शंका उब्जिएको पीडितहरुले बताएका छन् । उनीहरुले जतिसक्दो चाँडो राहत वितरण गरी आफूहरुलाई कम्तिमा खुला आकाशमुनी सुत्न बाध्य नपारिदिन आग्रह गरेका छन् ।
