काठमाडाैँ । होलीको दिन रंगहरुको खोला बग्नुपर्ने थियो तर ललितपुरको ढोलाहिटीमा रगतको खोला बग्यो । चिनजानकै साथीहरुको ग्याङ फाइटमा २ जनाले ज्यानै गुमाए ।
घटनाः ढोलाहिटिको ग्याङ फाइट
मृत्यु : दुई जना
पक्राउ : ४ जना
फरार : १ जना
होलिको राति करिब ११ बजे जिल्ला प्रहरी परिसरमा एउटा फोन आयो । प्रहरीलाई त्यो फोन ललितपुरकै पाटन अस्पतालबाट गएको थियो । फोनमा प्रहरीलाई एक मानिसलाई चक्कु प्रहार भएको अवस्थामा अस्पताल ल्याइएको छ भन्ने जानकारी दिइयो ।
अस्पतालबाट फोन आउनासाथ प्रहरी पाटन अस्पतालतर्फ हुइँकियो । प्रहरी पुगेको केही समयमै चिकित्सकले ति व्यक्तिको मृत्यु भएको घोषणा गरिदियो ।
त्यसको केही समयमा पुनः प्रहरीलाई ललितपुरकै अर्को अस्पताल सुमेरु अस्पतालबाट फोन गयो । त्यहाँपनि सोही प्रकृतिको घटना भएको जानकारी आयो । प्रहरी पुनः त्यतातर्फ बाँडियो ।
प्रहरी पुगेको केही समयमा ति व्यक्तिको समेत मृत्यु भएको अस्पतालले घोषणा गरिदियो ।
त्यसपछि रातारात प्रहरीले आफूमातहतका सम्पूर्ण युनिटहरुमा संचार गर्यो र घटनाबारे बुझ्न भन्यो । त्यसको केही समयमै ललितपुर प्रहरीलाई लतिपुरको ढोलाहिटीमा एक खाजा पसलमा ग्याङ् फाइट भएको र चक्कु समेत प्रहार भएको खबर आयो ।
त्यसपछि प्रहरी वृत सातदोबाटो र चापागाउँको संयुक्त टोली तत्काल घटना भएको स्थलतर्फ छरियो र प्रहरी परिसरको पोसाकको टोली र साधा पोसाकको टोलीपनि त्यतातर्फ सोझियो ।
घटनास्थल नपुग्दा प्रहरीलाई मृत्यु हुनेको पहिचान गर्नसमेत मुस्किल परेको थियो तर जब प्रहरी घटनास्थल पुग्यो तब मृत्यु हुने दुवैजनाको पहिचान खुल्यो ।
धापाखेलको सुमेरु अस्पतालमा मृत्यु भएका युवक पाँचथर मिक्लाजुङ गाउँपालिका–६ का २७ वर्षीय पुजन राई र पाटनमा मृत्यु भएका युवक सुनसरीको धरान उपमहानगरपालिका–१३ का २८ वर्षीय रेवश राई रहेको यकिन भयो । उनीहरुको शव पोस्ट मार्टमका लागि पाटन अस्पतालमा राखिएको छ ।
के थियो घटना ?
ललितपुरको ढोलाहिटीमा डि पोपिना नाम गरेको एक रेस्टुरेन्ट छ । विजय राई, सुलभ राई र भुपाल राई त्यसका संचालक हुन् । सामान्यतया मदिरा सेवन गर्ने भट्टीको रुपमा रहेको उक्त रेस्टुरेन्टमा होलीको दिन पनि चहलपहल बाक्लो थियो । त्यस दिन रेष्टुरेन्टमा संचालकमध्येका विजय राई र सुलभ राईमात्र थिए ।
विजय, सुलभ, विशाल हाङ मुकाराङ राई, पुजन राई, साहिल श्रेष्ठ लगायत अन्य केही युवाहरु मिलेर त्यही रेस्टुरेन्टमा रमाइलो गरिरहेका थिए । रमाइलो गर्ने क्रममा रातको ८ः३० भइसकेको थियो ।
तस्विर : डि पोपिना रेस्टुरेन्ट
सोही समयमा मदिराले टिल्ल भएर उक्त रेस्टुरेन्टमा पुगे छेङ्वीहाङ राई, नाम्नु हाङ राई, विराट राई र अनन्त राई । उनीहरुले त्यहाँ साहिल राई भन्ने व्यक्तिले आफूहरुमाथि हेपेको, होच्याएको आरोप लगाए र केही भनाभन भयो ।
विवाद बढ्दै गएपछि उनीहरुले विशाल हाङ मुकाराङ राईसँग समेत झगडा गर्न तम्सिए । घटनाले उग्र रुप लिने भएपछि संचालकमध्येका सुलभ राईले मदिराले लठ्ठ भएर पुगेका छेङ्वीहाङ राईको टिमलाई बाहिर जान आग्रह गरे । उनीहरुले नमानेपछि सुलभले उनीहरुलाई रेस्टुरेन्टबाट नै बाहिर निकालेका थिए ।
त्यसपछि छेङ्वीहाङ राईले आफ्नो साथी रेवश राईलाई फोन गरेर आफूहरुलाई डि पोपिना रेस्टुरेन्टबाट संचालकले हेपेर बाहिर निकालेको भन्दै आरोप लगाए ।
विवाद भएपछि रेस्टुरेन्टका संचालकहरुले रेस्टुरेन्टको सटर बन्द गरेर भित्रै बसे । करिब १० बजेको समयमा रेसव राईसहित छेङ्वीहाङको टोली डि पोपिना रेन्टुरेन्ट बाहिर पुगे ।
त्यसपछि उनीहरुले बन्द गरेको रेस्टुरेन्टको बाहिरबाटै तोडफोड गरे र बल प्रयोग गरी बन्द सटर खुलाएर रेस्टुरेन्टभित्र प्रवेश गरे र पुन विवाद गर्न थाले ।
फोन गरेर बोलाएका रेवश राईले होटलमा संचालकसँग रमाइलो गरिरहेका विशाल हाङ मुकाराङ राईसँग धकेलाधकेल गर्न थाले । रेस्टुरेन्टका संचालक विजय राईले पुनः रेवश राईलाई रेस्टुरेन्ट बाहिर निकाल्न प्रयास गरे । तर उग्र बनिरहेका रेवशले रेस्टुरेन्ट संचालकलाई नै मुक्का प्रहार गरे र घटना थप उग्र बन्यो ।
त्यसपछि संचालक विजय राई रेस्टुरेन्टको किचनमा पुगेर स्टिलको चक्कु ल्याएर रेशव राईलाई त्यहाँबाट हटाउन भन्दै जाइलागे । त्यहि समयमा रेस्टुरेन्ट बाहिरपट्टिको सडक पेटीमा उभिएका पुजन राईले विजयको हातमा भएको चक्कु खोस्ने प्रयास गरे । तर उक्त चक्कु पुजनको बायाँ तिघ्रामा लागेर घाइते भए ।
घाइते पुजनलाई विशाल हाङ मुकाराङ राई र सुलभ राईले रेस्टुरेन्ट भित्र लगे र बाहिर निस्किए । त्यतिबेलासम्म संचालकमध्येका अर्का विजय राइले रेवश राईको छाति र कोखामा चक्कु प्रहार गरी गम्भिर घाइते बनाइसकेका थिए । त्यसपछि एक जना व्यक्तिले विजय राईलाई मोटरसाइकलमा राखेर त्यहाँबाट फरार बनेका थिए ।
तस्विर : घटनामा प्रयाेग भएकाे चक्कु र बरामद अन्य सामाग्री
त्यसपछि घटनामा संलग्न भएकै दुई व्यक्तिले गम्भिर घाइते भएका रेवश राईलाई स्कुटरमा राखेर पाटन अस्पताल पुर्याएका थिए भने पुजन राईलाई संचालकमध्येका एक सुलभ राईले सुमेरु अस्पताल पुर्याएका थिए ।
घटना भएको करिब ५ घण्टाको दौरानामा रातारात प्रहरीले १८ जनालाई नियन्त्रणमा लिएको छ भने प्रहरीले ५ जनाविरुद्ध किटानी जाहेरी लिएको छ । प्रहरीले रेस्टुरेन्ट संचालक विजय राई र सुलभ राई, त्यस्तै विशाल हाङ मुकारुङ राई र छेङ्वीहाङ् राईलाई पक्राउ गरेर कर्तव्य ज्यान मुद्दामा अनुसन्धान अघि बढाउने तयारी गरेको छ भने अर्का एक युवक फरार रहेका छन् ।
तिहारबखतको विवादले निम्त्याएको घटना
प्रहरी प्रारम्भिक अनुसन्धानका क्रममा दुईपक्षबिच तिहारको समयमा विवाद भएको पाइएको छ। तिहारको समयमा साहिल श्रेष्ठले छेङ्वीहाङमाथि अश्लिल र अपशब्द बोलेको र छेङ्वीहाङले त्यहि कुराको इख लिएर बसेको प्रहरीको अनुसन्धानमा देखिएको छ । त्यस्तै त्यहि विवादलाई लिएर २ महिनाअघि पनि उनीहरुबिच भनाभन भएको प्रहरीले जनाएको छ ।
यसअघि नै जेल बसेका थिए सुरुमा चक्कु चलाउने अभियुक्त
घटनाका मुख्य अभियुक्त, रेस्टुरेन्टका संचालक विजय राई यसअघि पनि पक्राउ परेर जेल जीवन बिताएका व्यक्ति हुन् । आइतबारको घटनामा सबैभन्दा पहिले चक्कु चलाउने उनी २०७५ सालमा आघुऔषध मुद्दामा जेल चलान भएका थिए । उनी २ वर्ष कारागार बसेर छुटेको प्रहरीले जनाएको छ ।
