काठमाडौँ । नेपाल पर्यटन बोर्डका एक जना अधिकृतले फर्जी कागजात बनाएर १५ वर्ष देखि बोर्डमा जागिर खाइरहेको खुलेको छ । हाल बोर्डमा बजार व्यवस्थापन प्रमुखको रुपमा रहेका दाङका लक्ष्मण गौतमले नक्कली अनुभवको कागजात पेश गरेर १५ वर्ष देखि बोर्डमा कार्यरत रहेको पाइएको हो ।
बोर्डको अधिकृत हुन आवश्यक योग्यता नपुगेकै अवस्थामा उनले फर्जी अनुभवको कागजात बनाएर पेश गरेको र सोकै आधारमा उनी बोर्डमा नियुक्त भएको सिधाकुराले फेला पारेको छ ।
२०६५ सालमा बोर्डको अधिकृत बन्न गौतमले ठमेलको कञ्चन टुर्स एण्ड ट्राभल्समा २ वर्ष काम गरेको अनुभवको प्रमाण पत्र पेश गरेका थिए । सो अनुभवको पत्रका आधारमा गौतम बोर्डमा नियुक्त पनि भए । तर, सो पत्रमा उल्लेख गरिएको गौतमले काम सुरुवात गरेको मितिमा उक्त ट्राभल्स कम्पनी नै नखुलेको भेटिएको छ । प्राप्त कागजातअनुसार गौतमले जुन मिति देखि ट्राभल्समा काम गरेको भनेका छन् सो मितिको ८ महिनापछि मात्रै उक्त ट्राभल्स कम्पनी दर्ता भएको देखिन्छ ।
पर्यटन बोर्डमा गौतमले कञ्चन ट्राभल्स एण्ड टुर्समा २ वर्ष २ महिना काम गरेको अनुभवको सिफारिस पत्र पेश गरेका छन् । कञ्चन ट्राभल्सका कार्यकारी निर्देशक श्री प्रसाद बस्ताकोटीले सिफारिस गरेको अनुभवको कागजातअनुसार गौतमले ट्राभल्समा २०५६ पुस १८ गते देखि २०५८ पुससम्म काम गरेको देखिन्छ । तर, सिधाकुरालाई प्राप्त विवरणअनुसार कञ्चन ट्राभल्स नामक उक्त कम्पनी २०५७ भदौ २१ गते मात्रै स्थापना भएको देखिन्छ ।
योग्यता नपुगेपछि फर्जी कागज
नेपाल पर्यटन बोर्ड कर्मचारी सेवा विनियमावली २०६४ को विनियम ६ को उपविनियम (३) (ङ) मा म्यानेजर अर्थात प्रबन्धक पदका लागि आवश्यक पर्ने योग्यता स्पष्ट छ । जसअनुसार प्रबन्धक पदका लागि नेपाल सरकारबाट मान्यता प्राप्त विश्वविद्यालय वा सो विश्वविद्यालयबाट मान्यता प्राप्त अन्य शिक्षण संस्थाबाट स्नातकोत्तर स्तर वा सो सरहको परीक्षा उत्तीर्ण गरेको र सम्बन्धित क्षेत्रमा अधिकृत स्तरको पदमा कम्तीमा पाँच वर्षको अनुभव प्राप्त गरेको हुनुपर्छ । यही प्रावधानअनुसार बोर्डमा नियुक्त हुन गौतमले कञ्चन ट्राभल्स कम्पनीको नक्कली कागजात पेश गरेको र सोही आधारमा नियुक्ति लिइएको देखिन्छ ।
स्थापना नै नभएको ट्राभल्समा काम गरेको भन्दै उनले पेश गरेको अनुभवको कागजातकै आधारमा गौतम बोर्डमा अधिकृतको रुपमा नियुक्त भएको प्रष्ट हुन्छ । त्यसयता बोर्डमा १५ वर्ष बढी काम गरेर बढुवा हुँदै गौतम वरिष्ठ प्रबन्धकका साथै बजार व्यवस्थापकसम्म पुगेको देखिन्छ ।
अख्तियारको सफाइ
स्थापना नै नभएको कम्पनीमा काम गरेको कागजात पेश गरेर गौतमले नियुक्ति लिएको विषय बोर्डमा गत वर्ष नै सार्वजनिक भएको थियो । त्यसो त उनको फर्जी कागजबारे अख्तियार दुरुपयोग अनुसन्धान आयोगमा उजुरी पनि पर्यो । तर, अख्तियारले उनको मुद्दा तामेलीमा राख्दै कारबाहीको अधिकार बोर्डको कार्यकारीलाई सुम्पियो ।
अयोग्यताबारे आयोगमा परेको उजुरीबारे २०७९ असार १६ मा गौतमले के कसो भएको हो भनी निवेदन दिएका थिए । उनलाई अख्तियारले २७ असारमा लेखेको पत्रअनुसार ‘उजुरीबारे कार्यालय प्रमुखलाई नियमानुसार गर्नु भन्दै निवेदन तामेलीमा राखेर लागत कट्टा गरिएको उल्लेख छ ।’
बोर्डको कार्यकारीलाई यसबारे निर्णय गर्न अख्तियारले भने पनि तत्कालीन प्रमुख धनन्जय रेग्मीले के निर्णय गरे भन्ने अझै खुलेको छैन् । तर, गौतमले अख्तियारबाटै आफूले सफाइ पाइसकेकै रुपमा यसलाई व्याख्या गरेका छन् ।
कञ्चन ट्राभल्सबाट गौतमलाई चाहेअनुसारकै कागजात
कञ्चन ट्राभल्स एण्ड टुर्स नामक ट्राभल एजेन्सीले लक्ष्मण गौतमले चाहेअनुरूपकै फरक फरक अनुभव प्रमाणपत्र दिएको पाइएको छ। जागिर खानका लागि उनले बनाएका कागजात आफैँमा सक्कल देखिए पनि कागजात बनाउँदा मितिको ख्याल नगरिँदा बदमासी उजागर भएको देखिन्छ ।
कञ्चन ट्राभल्सले गौतमलाई अनुभवको पहिलो पत्र २०५८ माघ १२ गते (सन् २००२ जनवरी २५) मा दिएको थियो । उक्त एजेन्सीका प्रबन्ध निर्देशक श्री प्रसाद बस्ताकोटीले जारी गरेको पत्रमा गौतमले सो कम्पनीमा २०५६ पुस १८ गते देखि २०५८ पुससम्म ‘करेस्पोन्डेन्ट’ का रुपमा काम गरेको उल्लेख छ । किनकी गौतमलाई बोर्डमा सहायक म्यानेजरका रुपमा जागिर हुन सो योग्यता पुग्दो थियो ।
तर, उनले २०६५ सालमा म्यानेजर पदका लागि पुनः प्रतिस्पर्धा गर्नुपर्यो । सहायक प्रबन्धकबाट प्रबन्धक पदका लागि आवेदन दिँदा उनले पुनः सोही कम्पनीमा गएर अर्को अनुभवको प्रमाण पत्र ल्याएर पेश गरे ।
सिधाकुरालाई प्राप्त अनुभवको अर्को प्रमाण पत्रमा यसअघिकै मितिमा गौतमले अधिकृत स्तरमा काम गरेको भनेर आफ्नो योग्यता थप ठूलो बनाउन लगाएको देखिन्छ । २०६५ साल वैशाख २५ गतेको (सन् २००८ मे ७) मिति राखेर कञ्चन ट्राभल्सले बनाएको उनको अनुभवको प्रमाण पत्रमा उनी अधिकृत स्तरमा काम गरेको भन्ने उल्लेख छ । बोर्डका अधिकारीहरू सोही कागजातका आधारमा गौतमले २०६५ सालमा बोर्डको प्रबन्धक पदमा नियुक्त भएको दाबी गर्छन् ।
कागजात फर्जी नभएको दाबी
नेपाल पर्यटन बोर्डमा करिब १५ वर्ष बिताएका गौतम अहिले वरिष्ठ प्रबन्धकका साथै प्रमुख बजार व्यवस्थापकका रुपमा कार्यरत छन् । फर्जी कागजात बनाएको भन्ने आरोपबारे सिधाकुराको जिज्ञासामा उनले त्यो गलत भएको दाबी गरे ।
आफूले कञ्चन ट्राभल्समा काम गरेअनुसारकै अनुभवको कागजात लिएको उनको दाबी छ । कम्पनी पछि दर्ता भएको भन्ने जिज्ञासामा उनले यस अघि यस्तै प्रावधान रहेको बताए । ‘कम्पनीमा म पहिल्यै देखि काम गरिरहेको थिएँ, कम्पनी पछि दर्ता भएको हो,’ गौतमले सिधाकुरासँग भने, ‘मैले त्यो कागजातका आधारमा जागिर खाएकै होइन । मलाई अनुभव प्रशस्तै पुग्ने अरु नै कागज थिए ।’
आवश्यक नै नभएको अनुभवको कागजातको कुरा उठाएर आफूलाई विवादित गराउन गिरोह लागेको पनि उनको आरोप छ । बोर्डको प्रमुख कार्यकारी अधिकृत नियुक्तिको बेला आफूलाई रोक्न यस्तो गरिएको आरोप उनले लगाए । यता फर्जी अनुभवको प्रमाण पत्र पेश जारी गरेको कुरा ट्राभल्स एजेन्सीले पनि अस्वीकार गरेको छ । तत्कालीन कञ्चन ट्राभल्सका प्रबन्ध निर्देशक श्रीप्रसाद बस्ताकोटीले गौतम आफ्नो कर्मचारी भएको बताए । सुरुमा कम्पनी दर्ता भएपछि नै आफूले अनुभवको कागजात दिएको दाबी गरेका बस्ताकोटीले पछि भने त्यसलाई ढाकछोप गर्दै काम गर्न थालेदेखिकै आधारमा अनुभवको प्रमाण पत्र जारी गरेको दाबी गरे ।
