काठमाडौँ । राजश्व अनुसन्धान विभागमा गत महिना एउटा सूचना आयो ‘केही मानिसहरु संगठित रुपमा हुण्डी कारोबारमा संलग्न भएको ।’ उसै दैनिक सयौं उजुरीहरु पर्ने विभाग सूचनाको प्रशोधन र त्यसको सहि निशाना लगाउन कयौं पटक पहल गर्छ ।
तर, कयौं सूचनाहरु दुःख दिने र प्रतिष्पर्धीलाई अप्ठ्यारोमा पार्ने खालका हुने हुँदा विभागको मेहनत र अनुसन्धान खेर मात्रै जान्छ । तर, यो पटक हुण्डीबारेमा आएको सुराकमा केही परिपक्वता थियो । यो सूचनामा कच्चा सूचना मात्रै थिएन, केही बलियो आधार र लोकेसन पनि थियो । ति कारोबारीलाई कहाँ ट्र्याक गर्ने भन्ने पनि थियो,’ विभाग स्रोतले भन्यो । एक सातादेखि विभागबाट परिचालन भएको टोलीले सूचना प्रशोधन र लोकेसन ट्रयाक गरिरहेको थियो । सूचना पछ्याएर छद्म भेषमा पछि लागेको विभागको टोलीले बिहिबार बिहान असनको मख्खन गल्लीबाट दीपक ठकुरीलाई नियन्त्रणमा लियो । एउटा साँघुरो घरको ५ औं तलामा रहेका ठकुरीको साथबाट विभागको टोलीले ३३ लाख नगद फेला पर्यो । उक्त रकमको उद्येश्य र स्रोतबारे अनुसन्धान अधिकारीहरुले चासो राखे तर ठकुरीले खुलाउन सकेनन् ।
यो पैसा कसैलाई दिनु छ कि कसैबाट लिएको भन्ने अधिकारीहरुको प्रश्नमा ठकुरीले ताहाचलका मनमोहन साह कलवारको नाम लिए । दीपकलाई साथै लिएर विभाग टोली ताहाचल पुग्यो । दीपककै सम्पर्कबाट मनमोहनलाई बोलाइयो, मनमोहन आउने बित्तिक्कै विभागको फन्दामा परे । उनको घर खानतलासी गर्दा ७४ लाख रुपैयाँ नगद भेटियो । यत्तिका धैरै रकम घरमा राखेकोबारे विभागले स्रोत खोजी गर्यो ।
तर, उनले खुलाउन सकेनन् । यत्तिकैमा उनीहरुलाई पैसा पुर्याउन कोही आएको सुनिने गरी फोन बज्यो । विभागको रोहबरमा ति मानिस भेट्न दीपक र मनमोहन लिएर लनेकेसन तर्फ टोली हिँड्यो । दीपक र मनमोहनलाई पैसा पुर्याउन आएका थिए दिवश ठकुरी, लोकेसन थियो कलंकी खसीबजारको भाटभटेनी अगाडि ।
दीपक र मनमोहनको सम्पर्क सुत्रबाट विभागको टोली त्यहीँ पुग्यो । एक जना युवक पैसा भरिएको झोला बोकेर मोटरसाइकलमा त्यहाँ कुरी रहेका थिए । त्यहाँ पुगेलगत्तै विभागका अनुसन्धान अधिकारीहरुले उनलाई नियन्त्रणमा लियो । उनको साथबाट २१ लाख रुपैयाँ बरामद भयो । घर र बाटोमै लाखौं रुपैयाँ बोकेर मानिसहरु हिँडीरहेको फेला पारेको विभाग जसरी पनि हुण्डी कारोबारीको जरो मै पुग्ने दाउमा थियो । संयोगले बिहीबार नै ति तीनै जनाको सम्पर्कमा देखिए क्षेत्रपाटीका नरेश अग्रवाल ।
क्षेत्रपाटीमा कपडाको होलसेल व्यावसाय गर्ने अग्रवाल आवरणमा भने सामान्य व्यापारी झैँ लाग्थे । तर, अग्रवाल र विभागले नियन्त्रणमा लिएकाहरुको बाक्लो उठबस र सम्पर्क देखिएपछि अनुसन्धान अधिकृतहरु राती साँढे ७ बजे अग्रवालको घर क्षेत्रपाटीमा पुगे । उनलाई नियन्त्रणमा लिएर घर खानतलासी गर्दा एक करोड रुपैयाँ नगदको चाङ र केही मात्रामा अमेरिकी डलर भेटियो ।
बहिबार दिनभरको अपरेसनमा बरामद भएको रकम र पक्राउ परेकाहरु लिएर विभागको टोली साँझ कार्यालयमा फर्कियो । कार्यालयमा आएर गणना गर्दा २ करोड ३० लाख ९९ हजार रुपैयाँ नेपाली र एक हजार ९९४ अमेरिकी डलर रहेको पुष्टी भयो । विभागका सूचना अधिकारी नवराज अधिकारीका अनुसार एकै दिनको अपरेसनमा विभागले यो तहको कारबाही सम्पन्न गरेको हो ।
‘एकै दिनमा विभागको आफ्नै सक्रियातामा यो अपरेशन सम्पन्न भयो,’ उनले भने, ‘बिस्तृत अनुसन्धान भइरहेको छ ।’ पक्राउ परेकाहरुको परिचय विभागले अझै गोप्य राखेको छ । उनीहरुको साथबाट प्राप्त प्रमाणहरुले थप अनुसन्धानमा थप सघाउ पुग्ने र हुण्डीको जरोसम्मै पुग्ने विभागको विश्वास छ । पक्राउ परेकहरुलाई ७ दिन म्याद थप गरेर विभागले हिरासतमा राखेको छ । उनीहरुबिरुद्ध विदेशी बिनिमय ऐनअनसार कारबाही गरिने विभागले जनाएको छ ।
