काठमाडौँ । शुक्रबार राति करिब ९ बजे धादिङको गल्छीमा रोकिएको थियो, बा १ क ६३७७ नम्बरको मालवाहक ट्रक । खाजा खानका लागि त्यहाँ रोकिएको उक्त ट्रक नवलपरासीबाट काठमाडौँका लागि आइरहेको थियो । सो ट्रकलाई काठमाडौँको पेप्सीकोला गन्तव्य बनाएर अघि बढाइरहेका थिए, उपेन्द्र हर्जन र राजेन्द्र नेपाल ।
बिहिबारदेखि देशभरि अविरल वर्षा भएको थियो । देशका विभिन्न क्षेत्रमा बाढी पहिरोको घटना घटिरहेका भए पनि नागढुङ्गा नौबिसे सडकखण्ड बन्द थिएन । गल्छीसम्म आइपुग्दा राजमार्गको अवस्था सामान्य भएको जानकारी पाएपछि जतिसक्दो छिटो काठमाडौँ पुगेर खाना खाने निधो गरेर रोकिएको ट्रकलाई गति दिए उनीहरूले ।
पानी पर्नेबित्तिकै भर नहुने सो राजमार्ग छिचोल्नका लागि उनीहरूले सामान्य दिनभन्दा ट्रकलाई द्रुत गतिमा हुँइकाइरहेका थिए । अपसोच नागढुङ्गाको सुरुङमार्ग कटेर केही अघि बढेपछि सडकमा पहिरो खसेर बाटो बन्द भयो ।
उनीहरु त्यहाँ पुग्दा रातको करिब ११ बजेको थियो । उनीहरूको ट्रकभन्दा अगाडि करिब १० ठूला साना गाडीको लाम लागिसकेको थियो । रातको समय, पानी परिरहेका कारण बाटो खुल्ने छाँटकाँट नदेखिएपछि उनीहरूले ट्रकमै खाना खाएर सुते ।
वर्षा झन्झन् बढिरहेको थियो । थकित शरीर लिएर त्यहाँ पुगेका उनीहरु ट्रकभित्रै निदाए । रातको तीन बजे एक्कासि ठूलो आवाज आयो, भुईँ हल्लियो । राजेन्द्रले सिधाकुरासँग भने, ‘खाना खाएर मस्त निद्रामा थियौँ । बम पड्किएजस्तो ठूलो आवाज आयो, भुइँचालोले हल्लाएजस्तो गाडी नै हल्लायो । बाहिर चिच्याएको सुन्यौँ ।’
निद्राबाट उठेर बाहिर हेर्दा उनीहरूको गाडीभन्दा अगाडिका २ यात्रुवाहक बस सडक छोडेर डिलतर्फ मोडिएका थिए । ति गाडीको आदि भाग लेदोले पुरिएको थियो । त्यो देख्नासाथ उनीहरु अत्तालिएर हाम्फाले र मुसलधारे झरीमै भागे । ‘क्यूमा बसेको बेला ३ बजे राति पहिरो गएछ । सँगैका गाडी पहिरोले पुरेछ, पानी परिरहेको थियो, ज्यान जोगाउन पानीमा रुझ्दै भाग्यौँ ।’, उपेन्द्र हर्जनले त्यो क्षण सम्झिए ।
उनीहरु भाग्दै गर्दा आदि पुरिएका उनीहरुभन्दा अगाडिका गाडीबाट यात्रुहरू चिच्याउँदै, रुँदै निस्किरहेका थिए । उनीहरु घटना भएको स्थानतर्फ नभई सुरुङ भएको दिशातर्फ भागे । ‘अगाडिका २ गाडीबाट भागाभाग भएको थियो । कति त त्यहिँ च्यापिए भन्ने सुनेका थियौँ । सँगै भएका हामीलाई केही भएन’, एकै स्वरमा उनीहरु भन्छन्, ‘हामी भाग्यले बाच्यौँ ।’
घटना भएको केही समयमै होहल्ला भयो, भागाभाग मच्चियो । पानी अविरल परिरहेको थियो । मानिसहरु लथ्रक्कै भिजेका थिए । त्यस समयसम्म करिब १ किलोमिटरसम्म गाढीको लस्कर लागिसकेको थियो । कति गाढी पुरिए कसैलाई पत्तो थिएन । उनीहरु केही समयपछि पुनः ट्रकमै आएर अनिदो बसे । ‘पानीले भिजाएको भिजायै थियो । ओत लाग्नै कतै ठाउँ थिएन ।’, उपेन्द्र भन्छन्, ‘भिजेपछि बिरामी परियो भने समस्या हुन्छ भनेर केही समयपछि फेरि ट्रकमै आएर बस्यौँ ।’
पहिरो गएको २ दिन हुन लागिसक्यो, उनीहरु त्रासमा ट्रकमै बसिरहेका छन् । आइतबार बिहानसम्म त लिएर आएको खानेकुरा जसोतसो खाइरहेको तर बिहानदेखि सबै सकिएको उनीहरु बताउँछन् । ‘२ दिनसम्म त लिएर आएको चामलले खाना पकाएर खाइरहेका थियौँ । आजबाट त त्यही पनि सकियो ।’, मलिन स्वरमा राजेन्द्रले भने, ‘बिहानदेखि त केही खाएका छैनौँ ।
झ्याप्ले खोलामा गएको पहिरोमा पुरिएर ३५ जनाको मृत्यु भएको छ । सडकमाथिबाट झरेको पहिरोले सडकमा रहेका यात्रुबाहक सवारी पुरिएको थियो । शनिबार १४ वटा शव निकालिएको थियो । उक्त शव बुटवलबाट काठमाडौँ आउँदै गरेको लु १ ख ४५७८ नम्बरको वींगर गाडीका यात्रुको थियो ।
त्यस्तै आज नारायणघाटबाट काठमाडौँ आउँदै गरेको ना २ ख १३४५ नम्बरको माइक्रोबसबाट १६ वटा शव निकालिएको छ । सोही पहिरोमा पुरिएको गोरखाबाट काठमाडौं आउँदै गरेको ना ४ ख २२७० नम्बरको बसबाट ५ जनाको शव निकालिएको प्रहरीले जनाएको छ । उक्त पहिरोमा परि मृत्यु हुनेमा २५ पुरुष छन् भने १० महिला रहेका छन् । पहिरोमा भेटिएका सबै शव परीक्षणका लागि त्रिभुवन विश्वविद्यालय शिक्षण अस्पताल महाराजगञ्ज पठाइएको छ ।
