काठमाडौँ । राष्ट्रिय स्वतन्त्र पार्टीको बन्द कार्यशाला (क्लोज क्याम्प) ले २०८२ वैशाखमा महाधिवेशन गर्न केन्द्रिय समितिलाई सुझाव दिएको छ ।
शुक्रबार र शनिबार भएको बन्द कार्यशालाले महाधिवेशन पूर्व २०८१ असोजमा राष्ट्रिय भेला गर्न समेत सुझाव दिएको रास्वपाका कार्यवाहक प्रवक्ता मनिष झाले जानकारी दिए ।
कार्याशालाले २०८१ असोज ३ र ४ गते राष्ट्रिय भेला गर्न र २०८२ वैशाख तेस्रो साता राष्ट्रिय महाधिवेशन गर्न सुझाव दिएको मनिष झाले जारी गरेको विज्ञप्तीमा उल्लेख छ ।
रास्वपा बन्द कार्यशालाले केन्द्रीय समितिलाई दिएका सुझावहरु :
१) राष्ट्रिय भेला मिति २०८१ असोज ३ र ४ गते आयोजना गर्ने ।
२) राष्ट्रिय महाधिवेशन २०८२ वैशाख तेस्रो साता गर्ने ।
३) विधान संशोधन सुझाव कार्यदलको प्रतिवेदन भदौ मसान्तभित्र तयार गरी केन्द्रीय समिति मार्फत् राष्ट्रिय भेलामा पेश गर्ने ।
४) जिल्ला संयोजक तथा उपसंयोजक र निर्वाचन क्षेत्र समितिको संलग्नतामा जिल्ला भेलामार्फत जिल्ला तदर्थ समिति गठन गर्ने ।
५) पार्टीको अर्थ राजनीतिक (जलेश्वर) प्रस्तावनाको व्याख्या गरी पार्टीको वाचापत्रलगायत अन्य दस्तावेजका आधारमा केन्द्र, प्रदेश र जिल्लामा प्रशिक्षण गर्ने ।
६) शासकीय स्वरुपका विषयमा पार्टीभित्र व्यापक छलफल गरी संविधान संशोधनसमेतको कुरालाई मध्यनजर राखी पार्टीको अवधारणा तयार गर्ने ।
७) ‘जनआवाज अभियान’ समिति गठन गरी देशभरिको मुद्दा संकलन गर्ने र सदनमा उठाउने, कार्यान्वयन भए नभएको अनुगमन गर्ने ।
८) विधेयक मन्थन विभागलाई संसदमा दर्ता भएका विधेयकहरुबारे आवश्यकताअनुसार प्रवासमा समेत छलफल चलाई सुझाव संकलन गर्ने ।
९) क्यान्डिडेट क्लब र लिडरसीप एकेडेमीको विधानअनुसार नियमावली र कार्यविधि भदौ मसान्तसम्म तयार गर्ने ।
१०) पार्टीलाई प्रतिनिधित्व गरेर अन्तर्राष्ट्रिय सभा, गोष्ठी जादि कार्यक्रमहरूमा जाने व्यक्तिको छनोटका लागि मापदण्ड तयार पार्ने ।
११) पार्टीको आचारसंहिता र मूल्य मान्यतामा आधारित दस्तावेजहरु पुनरावलोकन गरी सदस्यहरुबाट प्राप्त सुझावहरुसमेत समेटी प्रशिक्षणको सामग्रीमा समावेश गर्ने ।
१२) पार्टीको केन्द्रीय अर्थ व्यवस्थापन समिति विस्तार गरी देश विदेशमा रहेका सबैलाई जोड्न ‘पार्टी पिल्लर्स’ को अवधारणा लागू गर्ने ।
१३) ‘देशका गाउँदेखि विदेशका शहरसम्म’का नेपालीसँग भेटघाट अभियानको सुरुवात गर्ने ।
१४) चरणबद्ध रुपमा स्थानीय छाँया सरकार गठनको अभ्यास थालनी गर्ने ।
१५) आगामी साता सातै प्रदेशमा यसै प्रकृतिको बन्द कार्याशाला आयोजना गर्ने र केन्द्रीय बन्द कार्यशालामा सहभागी भएका नेताहरु सहजीकरणका लागि सहभागी हुने ।
