काठमाडौँ । गायिका प्रिति आलेको नयाँ तिज गीत विवादमा तानिएको छ । औपचारिक रुपमा गीतको म्युजिक भिडियो सार्वजनिक नहुँदै गीतमा भएको शब्द चयनको विषयमा विवाद सृजना भएको हो ।
आलेले यस वर्षको तिजका लागि मादलु घन्काउँदै बोलको गीत ल्याउँदै छिन् । असार ३० गते आलेको युट्युब च्यानलमा गीतको अडियो भर्सन सार्वजनिक भएको थियो । उक्त गीतको भिडियो शुक्रबार दिउँसो २ बजे मात्रै सार्वजनिक भएकाे छ । तर, गीत सार्वजनिक हुनुअघि नै विवादमा आले तानिएकी छन् ।
उक्त भिडियोका कम्पोजर गोविन्द भट्टले म्युजिक भिडियोको केही क्लिप सामाजिक सञ्जालमार्फत सार्वजनिक गरेका थिए । गीतको एउटा टुक्कामा श्रीमान् विदेश भएका महिलाहरूलाई परपुरुषगमनमा लागेको सन्देश दिने भाव उल्लेख छ ।
‘लोग्ने विदेश छ भनेर टोलमा फुइँ लाउँछे, फेरि किन तेस्का बाजे तीन महिने सुई लाउँछे...मादलु घन्काइदेउ ।’
१० मिनेटको म्युजिक भिडियोको आठौँ मिनेटमा यो टुक्का समावेश गरिएको छ । यो भिडियो गरिमा फिल्म्स्ले बजारमा ल्याउँदैछ ।
आले दोहोरी ब्याटलबाट चर्चामा आएकी गायिका हुन् । विवादका बीच उनका गीतहरू युवा पुस्तामा लोकप्रिय छन् ।
