काठमाडौँ । आइतबार मध्यराति इलाका प्रहरी कार्यालय महेन्द्रनगर धनुषामा एउटा फोन आउँछ । ‘मेरो छोरीलाई ज्वाइँले मरणासन्न हुनेगरि कुटपिट गरेर अर्धचेत अवस्थामा घरबाहिर ल्याएर राखी फरार भएका छन् ।’
प्रहरीलाई उक्त फोन धनुषाको क्षिरेश्वरनाथ नगरपालिका–३ पकडियाबाट गरिएको थियो । उक्त फोन पछि जानासाथ इलाका प्रहरी कार्यालय महेन्द्रनगरका प्रहरी निरीक्षक दीपक कुमार कार्कीको नेतृत्वमा प्रहरी टोली पकडियातर्फ हुइँकियो । प्रहरीले अन्य स्थानका प्रहरीलाई समेत फरार भनिएका ज्वाइँको खोजीकार्यका लागि सर्कुलर गर्यो ।
घटनास्थल पुगेको प्रहरीले सख्त घाइते भएकी अर्धचेत अस्मिता शर्मालाई परिवारको सहयोगमा उपचारका लागि प्रादेशिक अस्पताल जनकपुरधाम पुर्यायो र उनका ज्वाइँ महोत्तरी लोहारपट्टी नगरपालिका–३ महदैयाका २२ वर्षीय राधे सहनीको खोजीमा खटियो । चिसो रात, हुस्सुले नजिकै पनि नदेखिने मौसमले प्रहरीलाई खोजीका लागि सहज भएन । रातभर खोज्दा पनि राधे सहनी भेटिएनन् ।
प्रहरी सोमबार बिहानैदेखि पुन सहनीको खोजीमा जुट्यो । प्रहरीले अस्मिताको घरभन्दा करिब १ किलोमिटरको दूरीमा मोटरसाइकलको केही टुक्रा फेला पार्यो । त्यसकै वरिपरि सडक पनि कोरिएको फेला पर्यो । प्रहरीले सडकको वारीपारी सर्च अपरेशन चलाउँदा गहुँ खेतमा सहनी र उनले चलाएको मोटरसाइकल लडिरहेको भेटियो । मदिरा गन्हाइरहेको उनको शरीर पल्टाउँदा उनी मृत थिए तर उनको शरीरमा कतै चोट भने थिएन ।
तस्विर : मृत अवस्थामा फेला परेका राधे सहनी र उनले चलाएको मोटरसाइकलको टुक्रा
प्रहरी घटनाबारे थप बुझ्न अस्मिताको घरमा पुग्यो । अस्मिताको परिवारले उनका साथीहरू आएको बताएपछि अनुसन्धानका लागि प्रहरी ति साथीहरूको खोजीमा जुट्यो ।
प्रहरी निरीक्षक दीपक कुमार कार्कीका अनुसार अस्मिता र राधे ३ महिना अघिमात्रै वैवाहिक सम्बन्धमा बाँधिएका थिए । उनीहरूले प्रेम विवाह गरेका थिए । विवाहपछि उनीहरु करिब ६ किलोमिटर दूरीमा रहेको महेन्द्रनगरमा डेरामा बस्दै आएका थिए । आइतबार सहनी र अस्मिता माइतीघर आएका थिए ।
प्रहरीकाअनुसार अस्मिताको घर पुगेपछि राधे सहनीलाई धनुषाका २ जना साथीहरूले ‘विवाहको पार्टी चाहियो’ भन्दै सम्पर्क गरे । राधेले पनि ‘हुन्छ, यहीँ ससुराली आएको छु, यहीँ आउ अनि सल्लाह गरौँला’ भनेर उनीहरूलाई ससुराली घर नै बोलाए । साथीहरू ससुरालीमै पुगेपछि त्यहाँ बस्न असहज हुने र आफूहरू बस्दै आएको डेरामै गएर रमाइलो गरौँ भन्दै राधेसहित उनका साथीहरू साँझ महेन्द्रनगर फर्किए ।
डेरामा गएर केही मात्रामा मदिरा पिएर रमाइलो गर्दा बेलुकीको ७ बजिसकेको थियो । उक्त समयमा राधे सहनी ‘श्रीमतीलाई लिएर आउँछु अनि थप रमाइलो गरौँला’, भन्दै साथीको मोटरसाइकल लिएर ससुरालीतर्फ लागे ।
बाटोमा जाँदै गर्दा महोत्तरीमा उनका २ जना साथीहरूले ‘तिमीहरू मात्रै रमाइलो गर्ने ?, हामीलाई पनि चाहियो’ भन्दै सम्पर्क गरेपछि उनी बाटोमै रोकिएर साथीहरूसँग पुनः मदिरा सेवन गर्छन् र कोठामा भएका साथीहरूलाई सम्पर्क गरेर अरु २ साथीहरू पनि थपिएको जानकारी गराउँछन् । त्यसपश्चात् थप रमाइलो कोठामै गर्ने भनेर साथीहरू लिएर श्रीमती लिन उनी ससुरालीतर्फ लाग्छन् ।
ससुराली पुग्दा मदिराले अनियन्त्रित भइसकेका श्रीमान देखेर अस्मिताले ‘यतै रमाइलो गर्नु, यतै खानु’ भन्दै श्रीमानसहित साथीलाई आग्रह गर्छिन् । तर राधेले ‘अन्य साथीहरू पनि कोठामै भएका कारण उहीँ पुग्नुपर्ने’ जिद्दी गर्छन । श्रीमानले नमानेपछि अस्मिताले भिनाजुलाई आफूलाई ‘कोठासम्म पुर्याउन’ अनुरोध गर्छिन् । तर भिनाजुले पनि ‘श्रीमान हुँदाहुँदै आफूले पुऱ्याउँदा उनले गलत सोचाइ राख्ने’ भन्दै इन्कार गर्छन् ।
त्यसपश्चात् अस्मिता श्रीमानकै पछाडि मोटरसाइकलमा चढेर कोठातर्फ लाग्छिन् । राधेका साथीहरू पनि उनीहरूसँगै अर्को मोटरसाइकलमा बसेर महेन्द्रनगरतर्फ लाग्छन् । करिब एक किलोमिटर दूरी पार गरेपछि राधेले चलाएको मोटरसाइकल दुर्घटनामा पर्छ । ‘सडक कोतरिएको देखिन्छ । मोटरसाइकल गएर बिजुलीको पोलमा ठोकिएर पार्टपुर्जा फुटेको देखिन्छ,’ प्रहरी निरीक्षक कार्कीले भने ।
प्रहरीका अनुसार उनीहरूसँगै अर्को मोटरसाइकलमा आएका राधेका साथीहरूले राधेलाई रक्सीले मातेको र छोडेपछि उठ्ने भन्दै दुर्घटनास्थलमा छोडेर अस्मितालाई भने माइती घरमा पुर्याएको बयान प्रहरीलाई दिएका छन् ।
‘घाउचोट लागेको छैन् । मदिरा पिएको छ, पछि रक्सीले छोडेपछि आफैँ उठ्छ भन्दै राधेलाई घटनास्थलमै छोड्यौँ । अस्मिताको भने शरीरमा चोट लागेर रक्तश्राव भएपछि आफ्नो मोटरसाइकलमा रगत चुहाउँदै अस्मिताको घर पुर्याएका हौँ।’ राधेका साथीहरूको भनाई उदृत गर्दै प्रहरी निरीक्षक कार्कीले भने, ‘दुर्घटनामा परेर गम्भिर घाइते भएकी अस्मितालाई घरबाहिर पुर्याइ कपडा ओढाएर, उनलाई त्यहीँ छोडेर साथीहरू आफ्नो घरतर्फ लागेका थिए ।’
यता राधे दुर्घटनामा परेपछि कोठामा उनले छोडेर आएका उनका साथीहरू अन्यौलमा परे । राधेलाई धेरै पटक फोन सम्पर्क गरे तर फोन उठेन । लामो समयको पर्खाइमा पनि राधे नआएपछि उनीहरु सोही बाटो पैदलै हिँड्दै राधेको ससुरालीतर्फ लाग्छन् ।
रातीको समयमा उनीहरु राधे र थपिएका साथीहरूलाई सम्पर्कको कोसिस गर्दै पैदल यात्रा नै अघि बढ्छन् । करिब ५ किलोमिटर यात्रा गरेपछि थपिएका साथीमध्य एकले फोन उठाएर ‘राधे दुर्घटनामा परेको र तिमीहरूको मोटरसाइकल त्यहीँ गहुँ बारीमा रहेको बताउँछन् ।’ त्यसपश्चात् घटनास्थल पुगेका उनीहरुले उक्त समयमा पनि राधेलाई गहुँबारीमा लडिरहेको देख्छन् ।
अघिका साथीहरूले झैँ उनीहरूले पनि ‘मदिराले छोडेपछि आफैँ उठ्छ’ भन्दै उनलाई त्यहीँ छोडेर मोटरसाइकल लिएर घरतर्फ लाग्छन् । ‘गहुँ खेतबाट उनीहरूले मोटरसाइकल निकाल्दा खेतमा मोटरसाइकलको पाङ्ग्राले बनाएको डाम प्रस्टै देखिन्छ,’ इन्स्पेक्टर कार्कीले घटनाबारे प्रष्टयाउँदै भने । दुर्घटनाबाट सख्त घाइते भएकी अस्मिताको पनि सोमबार राति उपचारकै क्रममा मृत्यु भएको छ ।
तस्विर:अस्पतालमा अस्मिता शर्माकाे शव
नवविवाहित श्रीमतीसँग ससुराली आएका राधे साथीहरूको लहैलहैमा मदिराको लतमा लाग्दा आफू र श्रीमती दुवै जनाले गम्भिर दुर्घटना भोगे । जुन साथीहरूको रमाइलोका लागि राधेले आफू र आफ्नो परिवारलाई जोखिममा हाले अन्तिममा तिनै साथीहरूले उद्धार नगर्दा आफू र आफ्नो प्रेम नै गुमाए ।
घटनाबारे थप अनुसन्धान गरिरहेका प्रहरी अधिकारीहरू मदिरा र खराब साथीको संगतले राधे र अस्मिता दुवैको अकालमा ज्यान गएको बताउँछन् । अहिले प्रहरीले राधेका ३ जना साथीहरूलाई नियन्त्रणमा लिएर अनुसन्धान गरिरहेको जनाएको छ । प्रहरीले साथीले चलाएको मोटरसाइकल समेत नियन्त्रणमा लिएर अनुसन्धान अघि बढाएको छ । ‘साथीहरूले दिएको बयान र घटना विवरणले राधे र उनको श्रीमतीको मृत्यु दुर्घटनाबाट भएको देखिन्छ । तर मृतकको शव पोस्टमार्टमका लागि पनि पठाइसकेका कारण त्यसबाट पनि निष्कर्षमा पुग्न सहज हुन्छ,’ घटनाको अनुसन्धान गरिरहेका प्रहरी निरीक्षक दीपक कुमार कार्कीले सिधाकुरासँग भने ।
