काठमाडाैँ । चौतर्फी विवादपछि नेपाल धितोपत्र बोर्डले रिलायन्स स्पिनिङ मिल्सको आईपीओ निष्काशन तत्कालका लागि रोकेको छ। संसदको सार्वजनिक लेखा समितिले प्रश्न उठाएपछि बोर्डले सो कम्पनीको प्राथमिक सार्वजनिक निष्काशन अर्थात आइपीओ स्थगित गरेको हो। 

कम्पनीले असार २७ अर्थात भोलीदेखि वैदेशिक रोजगारीमा रहेका नेपालीहरुलाई आइपीओ खुलाउने प्रक्रिया अघि बढाएको थियो । उक्त क्षेत्रमा रहेका नेपालीहरुलाई १ लाख १५ हजार ६ सय ९६ कित्ता आइपीओ निष्कासन गर्ने तयारीमा रहेको कम्पनीको आइपीओ एक दिन अघि पुगेर रोकिएको छ । 

सर्वसाधारणलाई बुक विल्डिङ विधिबाट प्राथमिक सेयर निष्कासनको अन्तिम चरणमा रहेको रिलायन्स स्पिनिङले  प्रतिकित्ता ८ सय २० रुपैयाँ ८० पैसामा आईपीओ निष्काशन अनुमति पाएको थियो। बोर्डले असार १२ गते आइपीओ निष्काशनको अनुमति दिएपछि पहिलो चरणमा आगामी असार २७ गते वैदेशिक रोजगारीमा रहेकाहरुका लागि आइपीओ जारी गर्न लागेको कम्पनीको योजनामा तत्कालका लागि ब्रेक लागेको छ । 

आइपीओ निष्कासनको अन्तिम चरणमा रहेको रिलायन्स स्पिनिङको वित्तीय विवरण शंकास्पद देखिएको भन्दै मंगलबार बसेको लेखा समिति बैठकले बोर्डसँग जवाफ माग गर्ने निर्णय गरेको थियो । बोर्डलाई लिखित प्रश्न गर्दै समितिले ७ दिनभित्र स्पष्टीकरण बुझाउन निर्देशन दिएको थियो ।