काठमाडौँ । एउटा यस्तो क्रूर दानवरूपी मानव जो ढलानमा ड्रिल गर्ने मेसिन मान्छेको शरीरमा चलाउँछ, स्नुकर खेल्ने पाइप मलद्वारमा घुसाइदिन्छ, त्यसपछि मलद्वारमा भिक्सको झोल हालिदिन्छ, युवकको अण्डकोष पिलासले च्यापिदिन्छ, नाङ्गो शरीरमा रातो पारेर तताएको आइरनले डामिदिन्छ, औँलाको नङमा दर्जनौँ सियोले खोपिदिन्छ ।
आफूमाथि यो सबै ज्यादती भइरहेको एउटा सामान्य मानवले के गर्ला ? उ चिच्याउँछ, आफूमाथि यस्तो नगर्न भन्छ, ज्यानको भिख माग्छ, उ कहालिन्, रुन्छ, कराउँछ । तर त्यो ज्यादती गर्ने मान्छेलाई त्यो चित्कारले छुनु त परेको कुरा उसको अनुहारमा मुस्कान आउँछ । पीडामा छटपटिएको व्यक्ति देख्दा उसलाई मज्जा आउँछ । उसले त्यो मोमेन्टलाई इन्जोए गर्छ । उसलाई थप पीडा दिन मन लाग्छ र अगाडिका सबै यातना पुनः दोहोर्याउँछ । उ जबसम्म तृप्त हुँदैन यसो गरिरहन्छ । अझ भिडियो पनि खिच्छ ।
सोमबार एक २१ वर्षका कुल बहादुर (नाम परिवर्तन) सिधाकुराको कार्यालयमा आए । उनले हामीलाई आफूमाथि काठमाडौँको बुढानीलकण्ठ नगरपालिका १ मा बस्ने आशिष देउला नाम गरेका व्यक्तिले क्रूर यातना दिएको बताए । ‘मलाई एक घरमा राखेर आइरनले दर्जनौँ पटक डामियो । मेरो नङमा ३/४ ओटा सियो कोपियो । म चिच्याउँदा उसले हाँसेर इन्जोए गर्यो ।’
हामीले तपाईंमाथि कसैले किन यस्तो गर्यो भनेर प्रश्न गर्यौं । उनले भने ‘थाहा छैन ।’
कुनै व्यक्तिले बिना कुनै कारण कसैलाई यति ठूलो शारीरिक पीडा किन दिन्छ ? हामीलाई ति युवकको कुरामा विश्वास लागेन । त्यसपछि उनले आफ्नो सर्ट उतारे र आफ्नो ढाडमा भएको आइरनले पोलेर खाटा बस्दै गरेको घाउ देखाए ।
उनको शरीरमा भएको घाउ निकै दर्दनाक छ । त्यसपछि हामीले उनले भनेका कुरा विश्वास नगर्न सकेनौँ ।
त्यसपछि हामीले कुलबहादुरकाे आशिषसँग भेट कसरी भयाे भन्नेबारे बुझ्ने प्रयत्न गर्यौँ ।
हाम्राे जिज्ञासापछि २१ वर्षीय कुलबहादुरले आफू बेला मौकामा साथीहरुसँग नाइट क्लब जाने गरेको बताए । करिब ३ महिनाअघि उनी साथीहरूसँग ठमेलको सेनेट क्लब गएका थिए । कुलबहादुर र साथीहरू आफ्नै तरिकाले रमाइलो गरिरहेका थिए । सोही क्रममा आशिष उनीहरु भएको ठाउँमा आए । कुलबहादुरका अनुसार उनका साथीको आशिषसँग चिनजान थियो ।
आशिषले उनीहरुसँग निकै आत्मिय व्यवहार देखाए । साथीसँग चिनजान भएको हुनाले कुलबहादुरले पनि उनले देखाएको आत्मियतालाई सामान्य रुपमा नै लिए । त्यसपछि उनीहरु सेनेट क्लब पुग्दा हरेक पटक आशिष सोही क्लबमै हुन्थे । आशिषले पहिलेभन्दा झन् बढी माया गरेजस्तो गर्थे ।
गत भदौ ७ गते आफूसँग सापटी रकम लगेका एक साथीले कुलबहादुरलाई रकम लिन टेकु दोभान बोलाए । साँझको समयमा उनी टेकु पुगे । तर, त्यहाँ उनलाई ४/५ जनाले गाडीमा हालेर एउटा अँध्यारो घरमा पुर्याए । त्यहाँ आशिष देउला पनि थिए । उनलाई त्यहाँ लछारपछार पारेर उनको कपडा च्यातियो । कुटपिट गरियो ।
त्यसपछि आशिष आइरन तताउन थाले । एकछिनमा आइरन तात्यो । उनले ढलान काट्ने ड्रिल मेसिन पनि ल्याए ।
यतिबेलासम्म कुलबहादुरले के भइरहेको छ बुझ्न सकेका थिएनन् । आशिषले केही औषधि सेवन गरे । अनी कुलबहादुरलाई सोधे 'ड्रिल गरौँ कि आइरनले डामौँ ।' कुलबहादुर रोए, कराए, चिच्याए, ज्यानको भिख मागे । उनले आइरन र ड्रिलमध्ये एउटा नरोजी सुख पाएनन् । उनले आइरनले चाँही मरिन्न होला भनेर आइरन रोजे । त्यसपछि उनको नाङ्गो ढाडमा पटक पटक आइरनले डामियो ।
सो समयमा आशिषसँग उनका केही अरु साथीहरू पनि थिए । उनीहरु सबैले कुलबहादुर पीडामा भएको क्षणको मनोरञ्जन लिए ।
उनीहरुले कुलबहादुरलाई 'प्रहरीकहाँ गइस् भने परिवारकै ज्यान लिने धम्की' दिए । साथै उनीहरुले एउटा भिडियो पनि देखाए । कुलबहादुरले बताए अनुसार उक्त भिडियोमा उनीजस्तै एक युवाको आँखा झिकिएको दृश्य थियो । ‘प्रहरीमा गए त्यस्तै हालत गरिदिने धम्की उनीहरुले दिए’ कुलबहादुरले भने ‘भिडियोमा देखिएका ति युवाले आशिषविरुद्ध प्रहरीमा उजुरी गरेपछि उनको त्यस्तो हालत पारिएको थियो। ’
उनको सबै कुरा सुनेपछि हामीले नै मंगलबार उनलाई भद्रकालीस्थित काठमाडौँ प्रहरी परिसरमा लिएर गयौँ । काठमाडौँ प्रहरी प्रमुख वशन्त रजौरेलाई सबै कुरा बतायौँ । उनले तत्काल यस विषयमा विशेष एक्सन लिए । सादा पोशाकका प्रहरीले अशिष सहित ४ जनालाई उनीहरु बसिरहेको स्थानबाट पक्राउ गर्यो ।
पक्राउ पर्नेमा बुढानिलकण्ठका ३३ वर्षीय आशिष देउला, टोखा ३ का २७ वर्षीय राजेन्द्र घले, उदयपुरको गाइघाट घर भई ठमेल बस्ने २२ वर्षीय ओजस्वी तामाङ र चितवन घर भई स्वयम्भु बस्ने २२ वर्षीय साजन गुरुङ रहेका छन् ।
उनीहरु विरुद्ध अपहरण, शरिरबन्धक तथा ज्यान मार्ने मुद्दामा अनुसन्धान भइरहेको छ । प्रहरीले यस्तै अपराधमा पीडित भएकाहरुलाई सम्पर्कमा आउन आह्वान समेत गरेको छ ।
