काठमाडौँ । पुशपति क्षेत्र विकास कोषले हरेक साँझ हुने गंगा आरतीसहित मन्दिरभित्रको दिप प्रज्वलनको भिडिओ सर्वाधिकार ५ वर्षका लागि बुढासुब्बा डिजिटललाई बेचेको प्रमाण सिधाकुरालाई प्राप्त भएको छ ।
बुढासुब्बा प्रा.लि.ले मासिक १ लाख ६० हजार रुपैयाँ कोषलाई तिर्नेगरी ६३ महिनाको बैंक जमानत १ करोड १३ लाख ९० हजार ४ सय रुपैयाँ राखेर कोषसँग सम्झौता गरेको हो ।
यो सम्झौता अनुसार बुढासुब्बा डिजीटल प्रालिले गंगा आरती तथा मन्दिरभित्र हुने दिप प्रज्वलनको श्रव्य दृश्य कैद गर्न र डिजिटल माध्यममा राख्न सर्वाधिकार पाएको छ ।
बुढासुब्बा डिजिटल प्रालिका सञ्चालक नवराज गिरीका अनुसार ६ महिनाअघिनै पशुपति क्षेत्र विकास कोषसँग सम्झौता भएको हो । पछिल्लो ६ महिनामा मासिक १ लाख ८० हजार ८ सयका दरले कोषमा जम्मा गरेको गिरी बताउँछन् ।
कोषले गत फागुनमै गोरखापत्र दैनिकमा सूचना जारी गर्दै बागमती नदि किनार सहित पशुपतिनाथको भित्री भागको प्रत्यक्ष प्रसारणका लागि बोलपत्र आह्वान गरेको थियो । करबाहेक मासिक १ लाख ६० हजार शुल्क तिर्नेगरी बुढासुब्वा डिजिटलको प्रस्ताव कोषले स्वीकार गरेको भेटिएको छ ।
कोषले जेठ २९ गते बुढासुब्वा डिजिटललाई सम्झौताकालागि बोलाएको थियो । सम्झौता अनुसार बुढासुब्बाले पशुपतिको आरती सहित दीप प्रज्वलनको भिडियोमा सर्वाधिकार राख्न पाउने बुढासुब्वा डिजिटलका सञ्चालक गिरीको दाबी छ ।
६ महिनादेखि पैसा तिर्दै आएपनि हामीले सर्वसाधारणका लागि भिडियो तथा फोटो खिच्न रोक लगाएका छैनौँ, गिरीले भने सर्वसाधारणले व्यक्तिगत प्रयोजनका लागि फोटो तथा भिडियो खिच्न पाउँछन् तर पैसा कमाउने उद्देश्यले खिच्ने अधिकार त १ करोड १४ लाख बैंक जमानत राखेर, मासिक पैसा तिरेर हामीले पाएका छौँ । गिरीले थपे ‘पशुपतिको भिडियो हालेपछि विशेष गरेर भारत लगायत विभिन्न ठाउँबाट युट्युबमा कपी राइटको क्लेम आउँछ । त्यसका लागि हामीले रोक लगाएका हौ ।’
