काठमाडाैँ । सरकारले नेपाल विद्युत प्राधिकरणको सञ्चालक समितिमा देवेन्द्र कार्की र महेन्द्रबहादुर गुरुङलाई नियुक्त गरेको छ । आइतबार ऊर्जा जलस्रोत तथा सिँचाइ मन्त्रालयले सञ्चालकद्वय भक्तबहादुर पुन र कपिल आचार्यलाई पदमुक्त गर्दै महेन्द्र बहादुर गुरुङ र देवेन्द्र कार्कीलाई प्राधिकरणको सञ्चालकमा नियुक्त गरेको हो।
मन्त्रालयले नियुक्त गरेका देवेन्द्र कार्की ऊर्जा मन्त्रालयका पूर्वसचिव हुन् भने महेन्द्र बहादुर गुरुङ विद्युत् विकास विभागका पूर्वमहानिर्देशक हुन् । डेडिकेटेड र ट्रंकलाइन विवादमा सरकारलाई असहयोग गरेको भन्दै मन्त्रालयले भक्तबहादुर पुन र कपिल आचार्यलाई हटाएर नयाँ सञ्चालक नियुक्त गरेको हो ।
मन्त्रालयले डेडिकेटेड र ट्रंक लाइन विवादमा सरकारले दिएको निर्देशन नमानेको र सरकारको निर्णयविपरित लाइन काटिएका ६ उद्योगमा लाइन जोड्ने निर्णयमा असहयोग गरेको भन्दै उनीहरुलाई साउन १५ गते स्पष्टीकरण सोधेको थियो । साउन १८ गते सो स्पष्टीकरणको जवाफ दिएका उनीहरुको चित्तबुझ्दो जवाफ नपाएको भन्दै मन्त्रालयले बर्खास्त गरेको हो ।
