सबै कुरा

घरेलु श्रमिक बालिका बलात्कारको अभियोग लागेका इन्स्पेक्टरलाई धरौटीमा छाड्न उच्च अदालतको आदेश

सिधाकुरा

बिहीबार, भदौ २७, २०८१

काठमाडौँ । घरेलु श्रमिक बालिका बलात्कारको अभियोग लागेका नेपाल प्रहरीका इन्स्पेक्टरलाई धरौटीमा छाड्न उच्च अदालतले आदेश दिएको छ ।

काठमाडौँ महानगरपालिकाको बाल उद्धार टोलीले आफ्नै घरमा काम गर्न राखेकी बालिकालाई बलात्कार गरेको अभियोगमा इन्स्पेक्टर विदुर सिवाकोटीलाई घरबाटै नियन्त्रणमा लिएर आवश्यक कारबाही अघि बढाएको थियो ।

बिहीबार उच्च अदालतका न्यायाधीशद्वय टंकप्रसाद गुरुङ र हेमन्त रावलको इजलासले उनलाई बिहीबार तीन लाख रुपैयाँ धरौटीमा छाड्ने आदेश दिएको हो ।

यसअघि जिल्ला अदालतको आदेशअनुसार सिवाकोटी पुर्पक्षका लागि थुनामा थिए । काठमाडौंको नागार्जुन नगरपालिका– १ रानीवन घर भएका सिवाकोटीले पढाउने सर्तमा एक बालिकालाई घरमा राखेकोमा बारम्बार बलात्कार गरेको पीडित बालिकाको उजुरीपछि गत जेठमा अनुसन्धान सुरु भएको थियो ।

काठमाडौँ महानगरपालिकाको बाल कल्याण समितिले ती बालिकालाई गत २३ जेठमा उद्धार गरेको थियो । उद्धारपछि बालिकाले आफूमाथि बलात्कार हुँदै आएको बताएकी थिइन्। सोही आधारमा प्रहरीमा जाहेरी परेको थियो । काठमाडौँ उपत्यका अपराध अनुसन्धान कार्यालयमा कार्यरत रहेका सिवाकोटीलाई स्वयम्भू वृत्तले पक्राउ गरी अभियोजन प्रक्रिया अघि बढाएको थियो ।

प्रकाशित मिति: बिहीबार, भदौ २७, २०८१

प्रतिक्रिया दिनुहोस्