ललितपुर । ललितपुर महानगरपालिका १४ कान्तिपुर कोलोनीका रबिन फलामका वेल्डिङका काम गर्थे । भाडाको जमिनमा अस्थायी टहरो बनाएर व्यवसाय गर्दै रबिन, उनको परिवार र केही कामदारहरू त्यही टहरोमै बस्थे ।
सामान्य पानी पर्ने बितिक्कै उत्तरी ललितपुरको सबै खोला नाला सोहोरिएर आउने नख्खु खोलाको किनारामै उनीहरूको टहरो थियो । बिहीबार साँझ देखिको अबिरल वर्षाका कारण नख्खु खोला बढ्ने र धनजनको क्षति हुन सक्ने भन्दै वडा अध्यक्ष अमृतजंग महतले रबिनलाई बिहीबार र शुक्रबार पनि निरन्तर फोन सम्पर्क गरिरहेका थिए ।
शुक्रबार साँझ पनि बाढी आउन थालेपछी अध्यक्ष महतले रबिनलाई फोन गरेर बाढीबारे अपडेट मागे । रबिनले खोलामा पानीको बहाव बढेको र पहिले बनाएको फलामे पुल भत्काएको जानकारी दिए । ‘हामीले बनाएको फलामे फड्के भत्काएको छ मैले बाँधेर राखेको छु दाइ यहाँ अरु जोखिम छैन भनेको थियो,’ वडा अध्यक्ष महतले सिधाकुरासँग भने, ‘तर एक्कासि बिहान मलाई उनीहरु नै बाढीमा फसेको खबर आयो ।’
बिहान ५ बजे देखि नै नख्खु खोलामा बाढीले वितण्डा मच्चाएको खबर आएपछि वडा सदस्यहरुसहित खोला क्षेत्रमा पुगेको र उनीहरु फसेको ठाउँमा सवा ७ बजे पुगेको वडा अध्यक्ष अमृत महत बताउँछन् ।
‘विभिन्न क्षेत्रको अवलोकन गर्ने क्रममा म त्यहाँ पुग्दा ७ः २० भएको थियो । उनीहरु पहिले जस्ताको टहरो भित्र थिए । पानी बढ्दै गएपछि जस्ता छेडेर छानोमा उक्लिए । उनीहरु छनो माथिबाट बचाउनका लागि हारगुहार गरिरहेका थिए,’ वडा अध्यक्ष मतहले भने ।
आफू नगर प्रहरी र अन्य स्थानीहरू उनीहरूको उद्धारका लागि डोरी, ट्युब लगायतका उपकरणहरू जोहो गर्न थालेको महतको दाबी छ । ‘जटिल अवस्थाको उद्धारका लागि हामीसँग उपकरण थिएन । उद्धारका लागि पहल गरिदिन प्रमुख जिल्ला अधिकारी देखि नेपाली सेना, सशस्त्र प्रहरी र नेपाल प्रहरीलाई हारगुहार गरे,’ उनले भने, ‘रबिन र उनको परिवार बाढीको बीचमा फसेको झण्डै ६ घण्टासम्म पनि कुनै उद्धारको पहल भएन ।’
केही मात्रामा स्थानीय र जनपथ प्रहरी बाहेक अन्य सुरक्षा निकाय घटनास्थलमा उद्धारका लागि नआएको उनको आरोप छ। टहरोमा रहेका चार मध्ये एक जनाको पहिले र बाँकी ३ जना केहीबेरको फरकमा खोलामा बगेको प्रत्यक्षदर्शी समेत रहेका वडा अध्यक्ष महतले बताए ।
‘घण्टौँसम्म केन्द्रिय सरकारको उद्धार टोली नआएपछि हामीले ठूलो ट्याबु खोज्यौँ । ट्युब आइपुगेर डोरीमा बाँधेर खोलामा हाल्नु र टहरा भत्किएर उनीहरु बग्नु एकैपटक भयो ।’
आफुले कुराकानी गरिरहने मित्र विपद्मा उद्धारका लागि गुहार मागिरहँदा पनि बचाउन नसकेको भन्दै उनले दुख व्यक्त गरे । उनीहरु ६ घण्टा देखि खोलामा फसेको र पछिल्लो ३ घण्टा त आँखै अगाडिे उद्धारको पहल गर्दा गर्दै नसकेको वडा अध्यक्ष महतले बताए । केन्द्रिय सरकारको सुबिधा सम्पन्न उद्धार टोली बेलैमा परिचालन हुन नसक्दा उनीहरु बाढीमा परेर बेपत्ता भएको महतको दाबी छ ।
