काठमाडाैँ । भाटभटेनी सुपर मार्केटका सञ्चालक मिनबहादुर गुरुङमाथि झण्डै एक करोड रुपैयाँको शङ्कास्पद कारोबारमा प्रहरी अनुसन्धान सुरु भएपछि प्रधानमन्त्रीले एक अर्ब रुपैयाँ बढी मूल्यको पार्टी कार्यालय दान लिएको खुलासा भएको छ ।
मिनबहादुर गुरुङले एमाले पार्टी कार्यालय बनाउन दसैंको अष्टमीको दिन काठमाडौँको किर्तिपुर नगरपालिका २ मैत्रीनगरमा १० रोपनी १४ आना जग्गा दान दिएका थिए । झण्डै एक अर्ब बढी मूल्यको सो जग्गा दान लिन कुनै मोलाहिजा नगरिएको एमालेले दाबी गरिरहेको छ । तर, सहकारी ठगीमा मुछिएका नेपाली कांग्रेसका उपसभापति धनराज गुरुङको ऋण तिर्न मिनबहादुरले काटेको ९२ लाख रुपैयाँको चेकमाथि प्रहरीले अनुसन्धान थाल्नु र सो अनुसन्धान रोकिएपछि मिनबहादुर एमालेलाई यति ठूलो दान दिने अवस्थामा पुग्नु शंकास्पद देखिएको छ।
धनराज–मिनबहादुर शंकास्पद कारोबारमाथिको अनुसन्धान लगभग निस्तेज भइसकेको र सोही समयमा मिनबहादुरले एमालेलाई पार्टी कार्यालय दानको निर्णय गरेको प्रहरीको केन्द्रिय अनुसन्धान ब्यूरो (सीआईबी) स्रोतले जनाएको छ । जसले कतै मिनबहादुर पुनः पक्राउ पर्ने डरले परिबन्दमा परेर सत्ता फकाउन लागे वा एमालेले उनीसँग बार्गेनिङ पो गर्यो की भन्ने आशङ्का पनि जन्माएको छ ।
प्रहरीको केन्द्रिय अनुसन्धान ब्युरोले नेपाली कांग्रेसका उपसभापति धनराज गुरुङ र उनका पत्नी ज्योति गुरुङ जोडिएको ललितपुरको मितेरी सहकारी ठगी प्रकरणमा अनुसन्धान गरिरहेको छ । बागमती प्रदेश सहकारी बोर्डले ब्यूरोमा पठाएको जाहेरीमा धनराजको नाम ठगीको सूचीबाट हटाइएको छ । तर, सहकारीको खातापातामा गरिएको अनुसन्धान क्रममा धनराजका तर्फबाट सहकारीमा दुई महिनाकाे अवधिमा पटक पटक गरेर शङ्कास्पद तरिकाले ९२ लाख रुपैयाँ ऋण फिर्ता गरिएको फेला परेको एक अनुसन्धान अधिकृतले बताए ।
ति अधिकारीकाअनुसार फरार ज्योति गुरुङको नामको ऋण उनका सम्बन्ध बिच्छेद भएका श्रीमान् धनराजको तर्फबाट तिरिएको छ र सो रकमको चेक भाटभटेनीका सञ्चालक मिनबहादुर गुरुङको नामको छ । ‘गुरुङको नाममा रहेको नेपाल इन्भेष्टमेन्ट मेघा बैङ्कको चेकबाट छोटो समयमै सो परिमाणको रकम सहकारीमा डिपोजिट भएको छ,’ अनुसन्धानमा संलग्न अधिकारी भन्छन्,‘पहिलो त यो रकम डिभोर्स भइसकेका कारण धनराजकोतर्फबाट तिर्नु पर्ने रकम नै होइन, दाेस्राे, यो तिरे पनि धनराजले तिर्नुपर्ने हो तर मिनबहादुरले धनराजकोतर्फबाट किन तिरे ? शङ्कास्पद छ ।’
सिधाकुरालाई प्राप्त विवरणअनुसार मिनबहादुर गुरुङले २०८१ वैशाख १७ र २०८१ जेठ ६ गते मा ती चेकहरु सहकारीको नाममा काटेका छन् । सहकारीको ऋण फिर्ता डिपोजिट स्लीपमा धनराज गुरुङको नाम उल्लेख छ भने चेक मिनबहादुरको नामको छ । सिधाकुरालाई प्रहरी स्रोतबाट प्राप्त कागजातअनुसार २०८१ जेठ ६ गते सहकारीमा तिरिएको ८ लाख ९८ हजार ७२० रुपैयाँ र वैशाख १७ गते डिपोजिटमा चेक नम्बर खुल्दैन । तर, बैंक खाता विवरण अनुसार ति रकम मिनबहादुरकै नामको चेकबाट डिपोजिट भएको अनुसन्धानमा खुलेको छ । यस्तै, ८१ जेठ १७ को सहकारीको स्लीप नम्बर २११६४ मा धनराजकोतर्फबाट १४ लाख रुपैयाँ रकम मितेरी सहकारीमा डिपोजिट भएको देखिन्छ । उक्त रकम मिनबहादुर गुरुङको नामको नेपाल इन्भेष्टमेन्ट मेघा बैंकको चेक नम्बर ३०२८७१२०६४ बाट डिपोजिट भएको देखिन्छ ।
बैशाख १७ कै अर्को रसिद नम्बर २११६२ मा सहकारीमा मिनबहादुरको अर्को चेक डिपोजिट भएको छ । जसको रकम पनि १४ लाख नै छ भने सोही बैंकको चेक नम्बर ३०२८७१२०६२ प्रयोग भएको देखिन्छ । वैशाख १७ मै सहकारीको भौचर नम्बर २११६३ मा पुनः सहकारीमा १४ लाख डिपोजिट गरिएको छ । जसमा मिनबहादुरमा नामको चेक नम्बर ३०२८७१२०६३ छ । यस्तै, सहकारीको रसिद नम्बर २११६१ मा सोही मितिमा पुनः १४ लाख सहकारीमा जम्मा भएको छ । सो रकम पनि धनराजकै नामबाट मिनबहादुरको चेकबाट गएको देखिन्छ । यसमा प्रयोग भएको चेक नम्बर ३०२८७१२०६१ रहेको छ ।
यस्तै, वैशाख १७ को अर्को स्लीप २११६० मा सोही बैंकको मिनबहादुरको नामको ३०२८७१२०६० नम्बरको चेकबाट १४ लाख रुपैयाँ सहकारीमा तिरिएको छ । कुल मिलाएर धनराजको नामको ऋणमा मिनबहादुर गुरुङबाट दुई दिनमा ९१ लाख २५ हजार ६३४ रुपैयाँ सहकारीमा तिरिएको देखिन्छ ।
धनराज भन्छन् घर बेचेर तिरेको हो ?
सहकारी ठगीमा आफ्नो नाम जोडिएपछि कांग्रेसका उपसभापति धनराजले २५ भदौ २०८० मा संसदमा सहकारी ठगीमा आफ्नो संलग्नताबारे स्पष्टोक्ति दिएका थिए । संसद्मा ५ मिनेट बोलेका गुरुङले आफूमाथि छानबिन गर्न माग गरेका थिए । तर, उनले डिर्भोस भइसकेकी श्रीमतिका तर्फबाट लिएको ऋण धनराजले नै तिरेको त्यसको केही दिनमै बाहिरिएको थियो ।
सिधाकुरालाई सो रकम मिनबहादुरले तिरेको थाहा लागेपछि हामीले धनराजलाई यसबारे सोध्न पटकपटक सम्पर्क प्रयास गर्यौँ । तर, उनी सम्पर्कमा आएनन् । उनको नामबाट सहकारीमा तिरेको रकमबारे उनले अनलाइनखबरसँग ३० भदौँमा पत्रकार नारायण अधिकारीलाई प्रतिक्रिया दिएको फेला पर्यो । अनलाइनखबरकाअनुसार धनराजको सो रकम घर बिक्रि गरेका मानिसले तिरेका हुन् । सो समाचारमा रकम तिर्ने मान्छेबारे खुलाइएको छैन् ।
तर, भाटभटेनीका मालिक मिनबहादुर गुरुङले आफूले धनराजलाई ९२ लाख रुपैयाँ दिएको स्वीकार गरेका छन् र सो रकम सहकारीकाे ऋण तिर्न ऋण बापतनै दिएको दाबी गरेका छन् ।
धनराज मन्त्री, मिनबहादुर हिरासतमा
२०८० वैशाख २० मा धनराज गुरुङ प्रचण्ड नेतृत्वको सरकारमा कानुन मन्त्री नियुक्त भएका थिए । उनी मन्त्री भएको २ महिना पछि ललिता निवास जग्गा हिनामिना आरोपमा २२ असार २०८० मा मिनबहादुर गुरुङलाई प्रहरीको केन्द्रिय अनुसन्धान ब्यूरो (सीआईबी) ले पक्राउ गरेको थियो । त्यसपछि अनुसन्धान क्रममा मिनबहादुर गुरुङ २०८० भदौ २४ सम्म प्रहरी हिरासतमा रहे र छुटे । त्यसपछि २१ फागुनसम्म धनराज कानुन मन्त्री थिए।
कानुन मन्त्रीबाट बाहिरिएको २६ दिनपछि धनराजलाई मिनबहादुरले चेकमार्फत पैसा दिन थालेको देखिन्छ । जुन आफैमा शंकास्पद छ । धनराज र मिनबहादुर दुवैले यसमा फरक फरक कुरा गरेका छन् ।
सहकारीमा धनराजबाट आएको रकम मिनबहादुरकै होः कुम्भराज गुरुङ
मितेरी सहकारीका अध्यक्ष कुम्भराज गुरुङ भाटभटेनीका सञ्चालक मिनबहादुर गुरुङले नै धनराजको ऋण तिरिदिएको स्वीकार गर्छन् । उनले मिनबहादुरले धनराजको ऋण तिरेको प्रमाण आफूले सुरक्षित राखेको भन्दै यो कुरा सिधाकुराले कसरी थाहा पायो भन्दै प्रति प्रश्न गरे ।
‘मैले यो कुरा कहीँ खुलाएको छैन आजसम्म । तर, मेरो सहकारीमा मिनबहादुरको नामबाट केही पैसा जम्मा भएको छ । त्यो तपाईंहरुलाई कसरी थाहा भयो ?’ उनले प्रश्न गरे, ‘त्यो समयमा मिनबहादुर गुरुङ सायद जेलमा थिए, धनराज गुरुङ कानुनमन्त्री थियो । कतै धनराजले उनीहरुलाई जेलबाट छुटाइदियो । छुटाइदिएबापत यति पैसा दिनुपर्छ भन्ने डिल भएको हुन सक्छ ।’ कुम्भराजले धनराज मन्त्री भएका कारण सिधै पैसा दिन नमिल्ने भएकाले सहकारीमार्फत घुस दिएको पनि हुन सक्ने बताउँछन् । ‘उ देखा नपर्ने, उसले प्रत्यक्ष पैसा नलिने । घुमाउरो पाराले घुस लिएर बठ्याईँ गरेको हो त्यसले (धनराज) ले । के थाहा भोली मिनबहादुर पनि सोहोरिने हो कि ? मैले पैसा तिरेको हैन भन्ने हो कि ? तर त्यसले (मिनबहादुरले) पैसा दिएको त मैले फाइल मै राखेको छु नि ।’
मिनबहादुर भन्छन् ‘विवादमा नपारिदिनुस्’
व्यवसायी मिनबहादुर गुरुङले पनि आफूले धनराजलाई रकम दिएको स्वीकार गरेका छन् । उनले धनराज र आफ्नो चिनजान वर्षौ पुरानो भएकाले ऋण दिएको बताए । ‘धनराज हामी गुरुङ-गुरुङ भएको नाताले धेरै पुरानो चिनजान हो, ऋण सापटी लगेकै हो, त्यसलाई किन मेरो नाममा जोड्नुपर्यो र ?’ मिनबहादुरले सिधाकुरालाई भने ‘ऋण लगेको न हो । ऋणै हो ऋण हो, बकाइदा कागज नै गरेर दायाँ बायाँ ल्याप्चे नै गरेर दिएको ।’ सहकारीमा जम्मा भए नभएको भन्ने जिज्ञासामा उनले ९२ लाख दिएको बताए ।
‘सहकारीमा दाखिल भएको बाहेक अरु होइन । अरु छैन, अरु छैन । दाई सहयोग गर्नुपर्यो भन्यो अनि कारोबारको पैसा भनेर दिएको हो,’ मिनबहादुरले भने, ‘सहकारी र धनराजको कारोबार के हो मलाई थाहा भएन, मैले धनराजलाई ऋण दिएको हुँ । धनराज र मेरो त नाता पनि पर्छ । मैले घुस खुवाएको होइन, मैले किन घुस खुवाउनुपर्छ र ? यस्तो विषय सार्वजनिक गरेर मलाई विवादमा नतानिदिनुस् ।’
हामीले विभिन्न अन्तर्वार्तामा धनराजले आफूले घर बेचेर सहकारीको रकम तिरेको बताउँदै आएको बतायौँ । त्यसपछि मिनबहादुरले आफूले धनराजलाई ऋण दिएको दोहोर्याउँदै भने, ‘धनराजले घर बेचेर पैसा तिरेको भनेको कुरा चाँही मलाई थाहा छैन । अब यो कुरामा नजाउँ, उहाँहरुको के होला कसो होला यसमा नजाऔँ है, हजुर मेरो रिक्वेसट् छ तपाईलाई ।’
के भन्छ एमाले ?
प्रहरी अनुसन्धान चलिरहेको बेला पार्टीको कार्यालय बनाउन मिनबहादुरबाट दान लिएको विषयमा एमाले भने अन्यौलमा देखिन्छ । मिनबहादुरबाट पार्टी कार्यालय दानमा कुनै मोलाहिजा नभएको एमालेले विज्ञप्तिमार्फत दाबी गरिसकेको छ ।
तर, मिनबहादुर धनराज कारोबारको अनुसन्धानकै चरणमा दान लिइएको बारे भने जानकार नभएको एमाले उपाध्यक्ष सुरेन्द्र प्रसाद पाण्डेले बताए । ‘धनराज मिनबहादुर कारोबार र यसको अनुसन्धानबारे तपाईंहरुले भन्नु भएको कुरा कानुनी प्रश्न हो ?’ उपाध्यक्ष पाण्डेले भने, ‘पार्टी कार्यालय दानबारे केही नबोलौँ ।’
-
Arjun subedi 4 months agoDherai clear rix
-
Pujan Bista 4 months agoThe only news platform I can blindly trust on. Keep going SIDHAKURA TEAM.
-
Harish Singh Nayak 4 months agoभ्रष्ट हरुको निद्रा हराम हुन्छ रबिलाई समाते र झन बहुला भएका छन् भ्रष्ट हरु good luck ràbi dài we are with you
-
🔔 Ticket- + 1,82000 bitcoin. Get > https://telegra.ph/Go-to-your-personal-cabinet-08-25?hs=e88a9ae9fd9b42643f99060e02e5a739& 🔔 4 months agobfl90d
