पारिवारिक विचलन, गरिबी र मानसिक समस्याले विक्षिप्त परिवारको दुर्घटना

विष्णु ढुंगाना

मंगलबार, जेठ ८, २०८१

काठमाडौँ । पारिवारिक विचलन, गरिबी र मानसिक समस्याले एकै पटक परिवारलाई गाँज्याे भने के हुन्छ ? काठमाडौँमा सोमबार भएको दुःखद एक पारिवारिक दुर्घटनाको प्रमुख कारण यस्तै भएको निष्कर्षमा प्रहरी पुगेको छ ।

काठमाडौँको कागेश्वरी मनोहरा नगरपालिका ५ थलीमा सोमबार बिहान भक्तपुरका ५४ वर्षीय कृष्ण नगरकोटी मृत भेटिएका थिए । दाह्री काट्ने ब्लेडले चिरेको अवस्थामा मृत भेटिएका नगरकोटीको घटना अनुसन्धानमा खटिएको प्रहरीले ८ घण्टा नबित्दै मृतका छोरा र छोरीलाई विक्षिप्त अवस्थामा उद्धार गरेको छ।

उनीहरु दुवै जनाको मानसिक अवस्था विक्षिप्त रहेको पाइएको छ मृतकका छोरालाई त आत्महत्या प्रयास गर्दा गर्दैको अवस्थामा उद्धार गरेको प्रहरीको भनाई छ ।

‘घाँटीकाे बायाँ पट्टीबाट झण्डै ८ सेन्टिमिटर लामो ब्लेडले काटिएको अवस्थामा छोराको उद्धार गरेका हौँ,’ अनुसन्धानमा खटिएका एक अधिकारीले सिधाकुरासँग भने,‘ ललितपुरको चल्नाखेलबाट उनको उद्धार गरिएको हो । उनको उमेर २१ वर्षको मात्रै छ ।’

मृतक कृष्णकी २८ वर्षीय छोरीलाई सेतोपुलमा एक ट्याक्सीमा बसिरहेको अवस्थामा उद्धार गरेर जिल्ला प्रहरी परिसर काठमाडौँमा राखिएको छ । मृतक कृष्ण १५ वर्षदेखि काठमाडौँमा ट्याक्सी चलाउँदै आएको पाइएको प्रहरीले जनाएको छ ।

३ महिना देखि ट्याक्सीमा रात बिताइरहेको परिवार

महानगरीय प्रहरी वृत्त बौद्ध र जिल्ला प्रहरी परिसर काठमाडौँले गरेको अनुसन्धानमा चरम गरिबीबाट कृष्णको परिवार गुज्रिएको पाइएको छ । श्रीमतीले दोस्रो विवाह गरेर गएपछि एक्लिएको परिवारलाई कृष्णले काठमाडौंको रविभवनमा एक भाडाको कोठामा राखेका थिए ।

तर, तीन महिनादेखि भाडा तिर्न पनि नसकेपछि उनीहरु कोठामा जान नसकेर ट्याक्सीमै रात बिताउन बाध्य भएको बयान मृतक कृष्णका छोराले प्रहरीलाई दिएका छन् ।

‘श्रीमतीले छोडेपछि रविभवन पछाडिको गणेशथान नजिक कोठा लिएर छोरा, छोरीलाई लिएर कृष्ण बस्ने गरेको पाइएको छ,’ अनुसन्धानमा संलग्न अधिकृतले भने ।

बाबु छोराको सल्लाह ‘तिमी पनि आत्महत्या गर्नु, म कतै आत्महत्या गर्छु’

मृतक कृष्णको भनाई उदृत गर्दै छोराले प्रहरीलाई दिएको बयानमा एउटा अंश छ, ‘छोरा तिमी दक्षिणकालीको जङ्गलमा गएर आत्महत्या गर्नु, म पनि कतै आत्महत्या गर्छु ।’

प्रहरीकाअनुसार पारिवारिक अवस्था, गरिबी जस्ता कारणबाट जीवनसँग बिरक्तिएर बाबु कृष्णले छोरालाई आत्महत्या गर्ने तरिका सिकाए थिए ।

सोतोपुलमा आफ्नो बा १ ज ९६५ नम्बरको ट्याक्सीमा छोरीलाई राखेर ट्याक्सी बनाउने मिश्री लिन भन्दै बाबु छोरा गएका थिए । छुट्टिने बेलामा बाबुले छोरालाई आत्महत्या गर्न दक्षिणकाली जान भन्दै २ वटा ब्लेड र १२५ रुपैयाँ खर्च दिएको छोराले प्रहरीलाई बताएका छन् ।

प्रकाशित मिति: मंगलबार, जेठ ८, २०८१

प्रतिक्रिया दिनुहोस्