काठमाडाैँ । नेपाली क्रिकेटको राष्ट्रिय पोशाक, टाउकोमा हेल्मेट, हातमा ग्लोभ्स, घुँडामा प्याड्स र खुट्टामा जुत्ता लगाएर स्कुल छुट्टी हुनेबित्तिकै खेलमैदानमा टुल्स ब्याग बोकेर क्रिकेट खेल्न पुग्छन्, ५ वर्षीय अर्पित कार्की । सानै उमेरमा क्रिकेट खेलेर आफ्नो छाप छोडिरहेका अर्पित सबैको लोकप्रिय बनेका छन् । धेरैले उनको खेल कला देखेर उनी राम्रो क्रिकेटर बन्ने आँकलन गरेका छन् ।
अर्पित एलकेजीमा पढ्छन् । सँगै रेगुलर क्रिकेट अभ्यास गर्छन् । उनका बाबुले उनको arpit.karki8 नाममा टिकटक अकाउण्ट बनाइदिएका छन् । छोराले क्रिकेट खेलेको भिडियो उनले त्यही अकाउण्टमा राखिदिन्छन् । सो अकाउण्टलाई हजारौँले फलो गरेका छन् । लाखौँले उनले क्रिकेट खेलेको हेर्ने गरेका छन् र मन पनि पराएका छन् । कमेण्टमार्फत हौसला दिइरहेका हुन्छन् ।
त्यही लोकप्रियताले अर्पित सानै उमेरमा विश्वस्तरीय खेल प्रतियोगिता ‘नेपाल प्रिमियर लिग’ का लागि कर्णाली याक्सको टिममा अनुबन्ध हुने मौका पाए । उनलाई कर्णाली याक्सले ‘योंगेस्ट फेस’ का रुपमा अनुबन्धन गरेको थियो ।
अनि सुरु भयो क्रिकेट यात्रा ...
ओखलढुङ्गा घर भएर काठमाडौँको टोखा बस्दै आएका बाबु योगेन्द्रले अर्पितलाई सानै उमेरदेखि उपहारमा ब्याट दिन्थे ।
क्रिकेटर बन्ने आफ्नो इच्छा पूरा नभएपछि छोरालाई क्रिकेटर बनाउने सपना बुनेका योगेन्द्रले २ वर्षकै उमेरदेखि अर्पितसँग बल र ब्याट लिएर खेल्थे । अर्पित पनि त्यसैमा खुसी हुन्थे ।
उमेर बढ्दै जाँदा अर्पितसँग बन्द कोठामा खेल्ने योगेन्द्र छोरालाई लिएर चौरमा निस्किए । उनीहरु बस्ने नजिकै टोखाको भूतखेल चौर छ, जहाँ दिनभरजसो केटाकेटी खेल खेल्छन् त बुढापाका घाम ताप्न पुग्छन् ।
उमेर बढ्दै जाँदा योगेन्द्रले समेत अर्पितलाई बल र ब्याट लिएर भूतखेल चौरमा लिएर जान थाले । दिन प्रतिदिन उनको खेल सुध्रदै गयो भने उनले पनि खेलमा रुचि देखाउँदै गए ।
अर्पितलाई खेल सँगसँगै पढाइका लागि समेत विद्यालयमा भर्ना गराइयो । अर्पितले पढाइ र खेललाई सँगसँगै अघि बढाउँदै गए । ४ वर्षको उमेर पुग्दा अर्पितको क्रिकेटप्रतिको मोह बढिरहेको थियो ।
योगेन्द्रले अर्पितको विद्यालय छुट्टी भएपछि टुल्स ब्याग लिएर त्यही भूतखेल चौरमा पु¥याउँथे । अनि चल्थ्यो बाबुछोराको खेल ।
छोराको खेल राम्रो लागेपछि आजभन्दा करिब ७ महिना अघि टिकटक अकाउन्ट खोलेर अर्पितको खेलको भिडियो सोही अकाउन्टमा राख्न थालेको बाबु योगेन्द्र बताउँछन् । छोराको खेल अर्काइभ पनि हुने, सबैसामु पनि पुग्ने सोेचेर उनको भिडियो टिकटकमा राखेको योगेन्द्र बताउँछन् ।
योगेन्द्रले राखेको सो भिडियो कर्णाली याक्सका सदस्यसामु पुगेपछि उनीहरुले योगेन्द्रलाई सम्पर्क गरे र उनका छोरालाई आफूहरुको टिममा समावेश गर्न अनुरोध गरे । छोराको भविष्य उज्जवल हुने सोचेर उनले सो टिममा छोरालाई सहभागी गराए ।
‘बाबुले खेलेको भिडियो टिकटकमा देख्नुभएको रहेछ त्यही देखेर कर्णालीको मेम्बरले मलाई मेसेज गर्नुभयो ।’, अर्पितका बाबु योगेन्द्रले सिधाकुरासँग भने, ‘बाबुको भविष्य राम्रो हुन्छ, पछि पनि हेर्छौँ, सर्पोट गर्छौँ भन्नुभयो । त्यसैले त्यहाँ जोडियौँ ।’ कर्णाली याक्ससँग जोडिएपछि छोराको खेल झनै सुध्रिएको योगेन्द्र बताउँछन् ।
त्यस्तै सुरुवाती चरणमा प्रत्यक्ष वा अप्रत्यक्ष रुपमा छोरा र आफूमाथि नकारात्मक टिप्पणी गर्नेहरु कर्णाली याक्ससँग जोडिएपछि सकरात्मक भएको बताउँछन् । ‘पहिला बाबुलाई खेलाएर टिकटकमा भिडियो राख्दा टिकटके भनेर जिस्काउँथे, नराम्रो लाग्थ्यो । जब कर्णाली याक्ससँग जोडियौँ, त्यसपछि हेर्ने नजर परिवर्तन भएको छ ।’, योगेन्द्रले भने ।
अहिले पनि अर्पितका बाबुछोरा अर्पितको विद्यालय सकिनासाथ भूतखेल चौर पुग्छन् । ‘विद्यालयबाट घर पुग्नेबित्तिकै खाजा खाएर अर्पित टुल्सब्याग निकाल्छन् ।’, योगेन्द्र भन्छन्, ‘अर्पित यतिधेरै उत्साहित छन् कि अहिले मैले टुल्सब्याग बोक्नै पर्दैन ।’
उनी छोरालाई पूर्व क्रिकेटर पारस खड्काजस्तै बनेको देख्न चाहान्छन् । त्यही भएर उनले छोराको जर्सीमा पारस खड्काको जर्सी नम्बर ‘७७’ राखेको सिधाकुरालाई बताए । ‘मलाई अर्पित पारस खड्काजस्तै उदाहरणीय क्रिकेटर बनेको हेर्ने चाहना छ ।’, योगेन्द्रले भने, ‘त्यही भएर जर्सी नम्बर छोराको जर्सीमा राखिदिएको छु ।’
बाबुको कुरा सुनेर छेउमा बसेका अर्पित बाबुको कुरामा मुस्कुराउँछन् । सोमपाल कामी र दिपु दाई (दिपेन्द्रसिंह ऐरी) को खेल मन पर्ने बताउने अर्पित भविष्यमा राम्रो क्रिकेटर बन्ने बताउँछन् । राम्रोसँग बोली समेत नफुटेका उनको खेलमा उनका बाबु योगेन्द्र आर्फैँ प्रशिक्षक बनेका छन् ।
अर्पितको ब्याटिङमा योगेन्द्र बलिङ गर्छन, योगेन्द्रको ब्याटिङ सहायतमा अर्पित बलिङ गर्छन् । दुई बाबुछोरा दिनहुँजसो साँझ त्यही भूतखेल चौरमा भेटिन्छन् ।
०००
सामाजिक सञ्जालमार्फत बालबालिकालाई इन्टरटेन्मेन्ट र भ्युजको टुल बनाइराखिएका बेला अर्पितका बाबुले यसको सदुपयोग सिकाएका छन् । काँचो माटोजस्ता बालबालिकालाई कसरी भाँडोको आकार दिने भन्ने उदाहरण प्रस्तुत गरेका छन् । साथै उनले सही अभिभावकत्व र सही मार्गदर्शन कस्तो हुन्छ भन्ने पनि सिकाएका छन् ।
अर्पित अहिले सानै छन् । उनलाई क्रिकेट करिअर हो भन्ने पनि थाहा छैन । रमाइलोका लागि बल र ब्याटसँग परिचित हुँदै गएका अर्पितसँग योगेन्द्रले भने सुमधुर सपना बुनेका छन् । र अर्पितले देखाएको सम्भावनाले योगेन्द्र आफ्नो सपना साकार हुनेमा ढुक्क छन् ।
