काठमाडौँ । जनताबाट निर्वाचित भएर संसद पुगेका जनप्रतिनिधिहरू जनताका मुद्दा र राष्ट्रिय विषयमा कति जिम्मेवार छन् ? तपाईंले भोट हालेका सांसदहरू कस्ता छन् ? जान्नु भएको छ ? छैन भने यो एउटा गतिलो उदाहरण हो ।
हो, तपाईं हाम्रो मतले चुनिएर संसदमा पुगेका सांसदहरू सरकारी खर्चमै गएको भ्रमणमा रक्सीले मातेर आफै झैझगडा गरेको र प्रतिनिधिसभाकै सदस्यहरूको निजी जीवनबारे रेष्टुराँको टेबलमा बसेर आरोप प्रत्यारोपमा उत्रिएको घटना सार्वजनिक भएको छ ।
घटना गत पुस २७ गते राति पोखराको एक रेष्टुराँको हो । प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिका सभापति कुसुमदेवी थापासहितका ६ जना सांसदहरू सरकारकै खर्चमा ६ दिनको स्थलगत भ्रमणमा पुस २१ गते काठमाडौँबाट निस्किएका थिए ।
नेपालगञ्जबाट थालिएको समितिका सदस्यहरूको भ्रमणमा समिति सभापति कुसुमदेवी थापा (नेपाली कांग्रेस) सहित सांसदहरू रुपा शोसी चौधरी (माओवादी), सरस्वती सुब्बा र सम्झना थपलिया (एमाले), वीरबहादुर बलायर (नेपाली कांग्रेस), सभापति थापाको एक जना स्वकीय सचिव भ्रमणमा थिए ।
नेपालगञ्जबाट सुरु भएको सांसदहरूको भ्रमणको मुख्य उद्देश्य बाँदर आतङ्कका कारण क्षति ब्यहोरीरहेका किसानहरूको पिर मर्का बुझ्ने, स्वर्गद्वारी गुठीको जग्गा विवाद बुझ्ने, हिमाली क्षेत्रमा पर्यावरणमा आएको परिवर्तनका कारण परेको असरबारे अध्ययन गर्ने थियो ।
दाङबाट सुरु भएको विभिन्न जिल्ला हुँदै भ्रमणको छैटौँ दिन सांसदहरुको प्रतिनिधि मण्डल पोखरा आइपुग्यो । यस बीचमा सर्वसाधारण, स्थानीय तहका जनप्रतिनिधिहरू र अन्नपूर्ण संरक्षण क्षेत्रका प्रतिनिधिहरू भेटेर समितिको टोली २७ पुसमा पोखराको एक होटलमा बास बस्यो । त्यसअघि प्राकृतिक स्रोतको बाँडफाँडको सन्दर्भमा गण्डकीका मुख्यमन्त्रीसँग पनि समितिले छलफल गरेको थियो ।
भ्रमणमा सहभागी एक सदस्यका अनुसार थाकेका सांसदहरू होटलमा फ्रेस भएपछि स्न्याक्स र ड्रिङ्सका लागि तयार भए । अनौपचारिक बसाइको सो साँझ कृषि समितिका सभापति कुसुमदेवी थापाले वाइन, एमाले सांसद सरस्वती सुब्बा र नेपाली कांग्रेसका सांसद वीरबहादुर बलायरले गोर्खा एण्ड गन ह्विस्की, रास्वपा सांसद विनिता कठायत र माओवादी सांसद रुपाशोसी चौधरीले हटलेमन वीथ हनी अर्डर गरेको एक सदस्य बताउँछन् । रास्वपाका एकसांसद बीचमै भ्रमणबाट अलग भएपछि कठायत पोखराको कार्यक्रममा अन्तिम दिन सहभागी भएकी थिइन् । एमालेकी अर्की सांसद सम्झाना थपलिया भने पोखराबाट घरतर्फ निस्किइसकेकी थिइन ।
सो बसाईमा समिति सभापतिका स्वकीय सचिव, डब्लुडब्लुएफका प्रतिनिधि र अर्का एक वन संरक्षण अभियन्ता पनि थिए । सबै जना एकै ठाउँमा बसेर पिय लिइरहेको बेला नेतृ विनिताले माओवादी सांसद चौधरीलाई आफू ‘बिरामी भएको र औषधि खाइरहेको तर पनि माछा खाएको बताइन् ।’ त्यत्तिकैमा अर्को छेउमा रहेका कांग्रेस सांसद बलायरले ‘पार्टी नै ठगको पर्यो भनेर विनितालाई होच्याएको’ ति प्रत्यक्षदर्शी बताउँछन् ।
विनिताले यहाँ अहिले पार्टीको कुरा कहाँबाट आयो बिना प्रसंग यो के बोलेको भनेर जाइलागिन् । सांसद बलायर चुप लागे ।
केहीबेर सबैजना आआफ्नो खानपिनमा लागेको ति प्रत्यक्षदर्शी बताउँछन् । उनकाअनुसार जब रक्सी चढ्दै गयो तब सांसद सरस्वती सुब्बा विनितामाथि खनिए, त्यसैमा बालायर पुनः जोडिए ।
पहिलो बिबादपछि साम्य भएको सांसदहरु बीचको विवाद ह्वीस्की चढेपछि सरस्वति सुब्बाले फेरि सुरु गरेको प्रत्यक्षदर्शीको भनाई छ । ‘सुब्बाले ह्वीस्कीको तालमा त्यो सुमना र शोभिताको के औकात ? केपी ओली, शेर बहादुर र प्रचण्डमाथि प्रश्न गर्ने ?’ भन्दै विनितालाई होच्याएको प्रत्यक्षदर्शीको दाबी छ । जवाफमा विनिताले, ‘तपाईंहरुले यत्तिका वर्ष देशका लागि के के गर्नु भयो ? हामी आएको २ वर्षमै कति धेरै काम गरिरहेका छौँ । किन होच्याएर ब्यक्ति केन्द्रित आरोप लगाउनु हुन्छ । ? भनेर भनेकी थिइन,’ स्रोतले भन्यो ।
सुब्बा पछि सांसद वीरबहादुर बलाएरले रास्वपा सभापति रवि लामिछाने, नेता स्वर्णिम वाग्ले र सुमना श्रेष्ठको वैवाहिक जीवनबारे टीप्पणी गर्न थालेको र उनीहरुको विवाहका कारण देशको सूचना गोप्य नरहेको दाबी बलायरले रक्सीको तालमा गरेको विनिताले बताइन् ।
‘कांग्रेस नेता बिरबहादुर बलायरले रवि, स्वर्णिम र सुमनाले विदेशीसँग विवाह गरेको भन्दै मजाक उँडाए,’ विनिताले सिधाकुरासँग भनिन्, ‘रास्वपा विरुद्ध सत्तारुढ सांसदहरु एक भएर नानाभाँती बोले । मैले त समिति सभापतिले रोक्नु होला भनेको उहाँ पनि सुब्बा र बलायरको पछि लागेर थप्नु भयो ।’
कठायतकाअनुसार सभापति थापाले पनि देखियो २ वर्षमा रास्वपाको पारा भन्दै थपेपछि उनी टेबल छोडेर हिंडेकी थिइन् ।
‘मैले सभापतिबाट त यो कुरा रोक्न पहल होला भन्ने सोचेको थिएँ । उल्टै उहाँले त देखियो २ वर्षमा रास्वपाको पारा भनेर भन्नु भयो । त्यसपछि म उठेर रुमा गएँ,’ कठायतले भनिन् ।
सांसद कठायतकाअनुसार उनलाई फकाउन भोलिपल्ट बिहानै संसद सचिवालयका कर्मचारी आएका थिए । उनले हिजो जे भयो भयो बिर्सनुस् अब छोडौँ भनेको तर आफूले यो कुरा समितिमा सबैका सामु भन्ने भनेर पोखरामै जवाफ दिएको कठायत बताउँछिन् ।
त्यसै अनुसार आफूले मंगलबारको बैठकमा यो कुरा उठाएको बताइन् । ‘सांसद भएर यस्ता गर्ने हो ? यो राम्रो काम हो ? र मैले यो कुरा समितिमा भन्छु भनेको थिएँ भने,’ उनले भनिन् ।
घटनाको प्रत्यक्षदर्शी एवम् भ्रमणदलकी माओवादी सांसद रुपा चौधरीले भने त्यो दिनको घटनाबारे आफू सार्वजनिक रुपमा नबोल्ने बताइन् । ‘म घटनाको साक्षी हुँ तर म मिडियामा बोल्दिन’ उनले भनिन्,‘विनिता जीले समितिमै त्यो पनि धेरै मान्छे भएको ठाउँमा यो कुरा गर्न हुन्थ्यो हुन्न थियो उहाँको कुरा भयो । तर, अहिले म नबोलौँ ।’
घटनामा आफूमाथि खनिएको भन्दै सांसद विनिताले आरोप लगाएकी नेपाली कांग्रेसका सांसद वीरबहादुर बलायरले भने आफूहरुले मदिरा सेवन नगरेको दाबी गरे ।
‘राष्ट्रिय सूचना चुहिने विषयमा थोरै भनाभन भएको हो,’ उनले सिधाकुरासँग भने,‘रास्वपाका नेता संसदमा यस्तो कुरा गर्छन् । तर रास्वपाकै शिक्षामन्त्रीको श्रीमतिले विदेशी श्रीमान् क्वाटरमा राखेको कुरा त हो नी ? विषय यही हो यहाँ रवि, स्वर्णिम लगायतबारे कुरा भएको थिएन,’ बलायरले भने ।
त्यो दिन खाएको भनिएको जिएण्डजि (गोर्खा एण्ड गन) ह्वीस्कीको आफूले नामै नसुनेको उनको दाबी छ ।
यता, सो साँझ ह्वीस्की पिएको आरोप लागेकी एमाले सांसद सरस्वती सुब्बाले भने उक्त आरोप निराधार भएको दाबी गरिन् । ‘हाम्रो पार्टीको नेता खराब भनेर उहाँले भनेपछि हामीले हाम्रो नेताको बचाउ गरेको हो,’ सुब्बाले सिधाकुरासँग भनिन्,‘हाम्रो नेता खरब भए तिम्रा नेताको बारेमा पनि सहकारीको कुरा उठेको छ त धरौटीको विषय छत भनेको हो ।’
उनले आफूहरुले मदिरा पिएको भन्ने कुरा प्रमाण नभएको कुरा बोलिएको दाबी गरिन । ‘हिजो हामी समितिबाट निस्किइसकेपछि यो बबण्डर भएको रहेछ,’ सांसद सुब्बाले भेनिन्,‘भ्रमणको रिभ्यू मिटिङ भएको हो । सहकारीको कुरा र आ-आफ्नो नेताको बचाउको कुरा भएको हो । मदिरा पिएको कुरा प्रमाण नभएको आरोप हो । ’
सो दिन विवाद झिक्ने मध्येकी एक तथा समिति सभापति समेत रहेकी कुसुमदेवी थापाले भने एक कार्यक्रममा रहेको भन्दै अहिले बोल्न नसक्ने बताइन । लिखित रुपमा म्यासेजमा केही भन्न सकिन्छ की भन्ने सिधाकुराको प्रस्तावमा उनले कुनै जवाफ दिइनन् ।
