![]( https://sidhakura.com/content/upload/post_image/hp-site-dai-khojdaijpg37asu3vyj.jpg)
काठमाडाैँ । सिन्धुपाल्चोकका ठाकुरप्रसाद चौलागाईं एन्जल डिलक्स बसका सहचालक हुन्, जुन बस असार २८ गते विरगञ्जबाट काठमाडौँ आइरहेको बेला चितवनको सिमलतालमा झरेको पहिरोसँगै बगेर त्रिशुलीमा खसेर बेपत्ता भयो ।
घटना भएको एक हप्ता बित्यो । तर अहिलेसम्म न ठाकुर भेटिएका छन् न बस नै भेटिएको छ । उनीहरूको खोजीकार्य निरन्तर भइरहेको छ ।
दुर्घटनाको एक साता बित्दा पनि सहचालक ठाकुरसहित ४४ जना अझै बेपत्ता छन् । तिनै बेपत्ताका परिवारहरू आफन्त खोजी गरिदिन हारगुहार गर्दै चितवन पुगेर विभिन्न निकाय धाइरहेका छन् । त्यहीँ छन् ठाकुरको प्रतीक्षामा दिनरात बिताइरहेका उनका आफन्तहरू ।
दुर्घटना हुनुभन्दा केहीसमय अगाडि ठाकुर र उनी सवार गाडी चितवनको एक होटलमा खाना खान रोकेको सिसिटिभी फुटेज उनका परिवारले पाएका छन्, जहाँ ठाकुर रातो टिसर्ट र कालो हाल्फ जिन्स पाइन्ट लगाएर सोही एन्जल डिलक्स बसलाई पछाडि सार्न चालकलाई इसारा गरिरहेका छन् । ठाकुरका परिवार ठाकुरको त्यही अन्तिम भिडियो हेर्दै देखाउँदै खोजी गरिदिन हारगुहार गरिरहेका छन् ।
०००
पछिल्लो १० वर्षदेखि सहचालकको काम गर्दै आएका ठाकुर नियमित काठमाडौँ वीरगञ्ज चल्ने सो बसका सहचालक भने होइनन् । उनी कम्पनी मातहतमा रहेर काम गर्ने भएकाले उनलाई कम्पनीले सो दिन काँकडभिट्टा नभएर काठमाडौँ जान भनेको थियो । सोहीअनुसार उनी काठमाडौँका लागि हिँडे तर आधा बाटोमै उनी सवार बस त्रिशुलीको भेलमा बग्यो ।
मेलम्ची नगरपालिका- १, सिन्धुपाल्चोकका ठाकुर बेपत्ता भएसँगै उनको परिवार र गाउँनै शोकमग्न छ । उनको खोजीका लागि उनका परिवारका सदस्यहरू चितवनका विभिन्न स्थानमा छरिएका छन् । कामको सिलसिलामा भारतमा रहेका उनका भाइ शरण चौलागाईं समेत दाइ दुर्घटनामा परेको खबरपछि चितवन पुगेका छन् । भारतको आन्ध्र प्रदेशमा रहेका उनले २८ गते बिहानै चितवनको सिमललातमा पहिरोले २ वटा बस बगाएको समाचार सुनेका थिए ।
बर्खाको समय, सामान्य दुर्घटना ठानेर उनले खासै वास्ता गरेनन्। उनी खाना खाएर आफ्नो काममा लागे । उनी काममा गएको केही समयपछि घरबाट फोन गयो । परिवारले उनले बिहान समाचारमा थाहा पाएको घटना मात्र सुनाएनन् बरु सोही बसमा दाजु पनि सवार रहेको दुखद खबर सुनाए । खबर पाउनासाथ उनको होस हवास् उड्यो । उनी काम छोडेर चितवन हानिए ।
एक हप्ता बित्दासमेत दाईको नाम निशाना फेला नपरेपछि उनले दाजुको शव मात्रै पाए पनि सान्त्वना मिल्ने भन्दै सरकारसँग गुहार मागिरहेका छन् । उनले सरकारको उद्धार र खोजी कार्यबाट सन्तुष्ट नभएको पनि बताए । ‘अब सास पाउने आश त छैन, उसको लास मात्रै पायौँ भने हामीले थोरबहुत सान्त्वना मिल्थ्यो ।’, उनी भन्छन्, ‘न हामी खोजीकार्यले सन्तुष्ट छौँ । न अब दाई बाँचेर आउँछ भन्ने छ ।’
सरकारप्रति आक्रोशित हुँदै उनले सरकार भन्ने छ कि छैन भन्दै प्रश्न गरे । ‘आजसम्म चरा खोजेको हो र नभेट्न ? त्यत्रो बस हराएको छ । के गर्न खोजेको हो यो ? के राजनीति जहिले पनि गर्ने रु हामीलाई दुख दिएर राजनीति जहिले पनि चल्छ ?’
दाइको खोजीका लागि एक हप्तादेखि चितवनमा रहेका ठाकुरका अर्का भाइ निखिल चौँलागाईं घटनाको एक हप्ता बित्दासमेत दाइ नभेट्दा थकित भएका छन् । ‘दाईको सास पाउने अब त परिवारमा आश छैन, परिवार शोकमग्न छ । सरकारले खोजीमा तदारुकता नदिँदा पीडामाथि पीडा थपिएको छ,’ उनले भने ।
![](/content/upload/post_image/hp-dajuko-khojimapng0zr6154e1.png)
मामाको छोरा त्रिशुलीको भेलमा बगेपछि परिवारका सदस्यसँगै दौडधुप गरिरहेका छन् शिवपसाद भट्टराई । उनी सरकारीको खोजी कार्यबाट सन्तुष्ट छैनन् । खोजीकार्य प्रभावकारी नहुँदा बसमा सवारहरु नभेटिएको उनी बताउँछन् । ‘एउटा डुंगामा सयर गरेर, एउटा बाँसले घोचेर छ छैन भनेर खोजेर हुन्छ । केटाकेटी खेलेझैँ गरेर खोजेर हुन्छ ?,’ भट्टराई आक्रोश पोख्छन्, ‘विश्वमा कति धेरै आधुनिक र शक्तिशाली प्रविधिको विकास भइसक्यो । आज यत्रो दिन बित्दाखेरी पनि भेटिएको छैन । केटाकेटी खेलाईको काम भइरहेको छ ।’
४२ वर्षीय ठाकुरका घरमा श्रीमति र २ छोरीहरु छन् । निम्न आय भएका उनीहरूको परिवारको गुजारा टार्न हिँडेका ठाकुरसहितको बस बेपत्ता भएपछि परिवार शोकमा डुबेको छ ।
असार २८ गते चितवनको भरतपुर महानगरपालिका–२९ सिमलतालमा लेदोसहितको पहिरोले २ बस बगाएर त्रिशुली नदीमा बेपत्ता बनाएको थियो । नदीमा बेपत्ता भएका दुईवटा बसमा रहेका ६५ यात्रुमध्ये यो समाचार तयार गर्दासम्ममा २३ जनाको शव फेला परेको छ भने अन्य अझै बेपत्ता छन् ।
पछिल्लो तथ्याङ्कअनुसार वीरगञ्जबाट काठमाडौँ आउँदै गरेको बसमा टिकट काटेका २७ र अन्य ११ गरी ३८ जना सवार थिए । त्यस्तै काठमाडौँबाट गौरतर्फ जाँदै गरेको बसमा टिकट काटेका २३ र अन्य चार गरी जम्मा २७ जना यात्रु रहेको प्रहरीले जनाएको छ । टिकट नकाटी बसमा यात्रा गरेका यात्रीका आफन्तजनले दुर्घटनापछि प्रहरीमा आफन्तको विवरण उपलब्ध गराएका थिए । दुई बसमा ६५ यात्रु सवार रहेको खुलेको छ ।
काठमाडौँबाट गौरतर्फ जाँदै गरेको बसबाट हाम्फालेर बाँच्न तीनमध्ये रौतहटको गरुडा नगरपालिका–९ का जुगेश्वरराय यादव र सरोजकुमार गुप्ता उपचारपश्चात घर फर्केका छन् भने रौतहटको देवाही बनाही नगरपालिका–१० का नन्दन दासको उपचार भइरहेको छ ।
–चितवनबाट हिरालाल आचार्यको सहयोगमा