काठमाडौँ । बुधबार बिहान त्रिभुवन अन्तराष्ट्रिय विमानस्थल हातामै सौर्य एयरलाइन्सको हवाई जहाज दुर्घटना भयो ।
काठमाडौँबाट पोखरामा नियमित मर्मतका लागि जान लागेको सौर्य एयरलाइन्सको ९ एन-एएमई कलसाइनको जहाज धावनमार्ग छोडेको ११ सेकेन्डमै दुर्घटनामा परेको थियो ।
विमानस्थल हातामै भएको भयानक दुर्घटनामा विमानका चालकबाहेक कोही बाँचेनन् । १८ जनाको ज्यान गएको दुर्घटनामा विमानका पाइलट मनिष शाक्यको भने सकुशल उद्धार भयो ।
मर्मतका लागि आफ्नै एयरलाइन्सको प्राविधिक र कर्मचारीसहित उडान भरेको विमान दुर्घटनामा परेपछि विमानको सुरक्षा अवस्था र नियामकको भूमिकाबारे सर्वत्र आलोचना भइरहेको छ ।
कतिपयले नेपालमा भएका विमानहरू सेकेन्ड ह्यान्ड र पुरानो भएको भन्दै हवाई यात्राको विश्वसनियतामाथि गम्भिर प्रश्न गरेका छन् । तर, नेपाल एयरलाइन्सका पूर्व वरिष्ठ क्याप्टेन केबी लिम्बू भने जहाज पुरानो भएर दुर्घटना नहुने तर्क गर्छन् । ‘जहाज कहिल्यै पुरानो हुँदैनन् बरु यसको जेनेरेसन पुरानो हुन्छन् । जेनेरेसन पुरानो हुँदै गएपछि यसको मर्मत खर्च बढ्दै जान्छ । मर्मतकै क्रममा एलएफपी (लाइफ लिमिटेड पार्टस्) हरू यति घण्टा उडेपछि वा यति दिन उडेपछि त्यो बदल्नै पर्छ । ति परिवर्तन भएनन् भने त्यसले जहाजका अन्य पार्टपुर्जामा असर गर्छन् तर दुर्घटना नै हुन्छ भन्ने हुँदैन ।’, लिम्बू भन्छन् ।
नेपाली आकाशमा उडिरहेको जहाज कुन कति पुराना हुन् ?
नागरिक उड्यन प्राधिकरणका अनुसार नेपाल एयरलाइन्स, बुद्ध एयरलाइन्स, यति एयरलाइन्स लगायत १० वटा कम्पनीका ७१ वटा विमान अहिले नेपाली आकाशमा उड्न योग्य रहेका छन् । बुधबार सौर्य एयरलाइन्सको जहाज दुर्घटनामा परेसँगै यो सङ्ख्या ७० मा झरेको छ । नेपाली आकाशमा ४० वर्ष पुरानो विमान पनि उडिरहेको छ भने नयाँ भनिएको विमान पनि ६ वर्षको भइसकेको छ । आउनुहोस्, हामीले नेपालमा दर्ता भएका र भएकामध्ये पनि सञ्चालनमा रहेका सबै विमान कस्ता छन् भनी इतिहास खोतलेका छौँ ।
नेपाल एयरलाइन्सका १३ जहाज, उमेर ६ देखि ४० वर्षसम्मका
नेपाल एयरलाइन्ससँग १३ वटा जहाजहरू छन् । नेपाल नागरिक उड्यन प्राधिकरणसँग उडान अनुमति पाएका ति जहाजमध्ये सबै भने नियमित उडानमा छैन् । सिधाकुरालाई प्राप्त पछिल्लो तथ्याङ्कअनुसार राष्ट्रिय ध्वजावाहक उक्त एयरलाइन्ससँग ६ देखि ४० वर्ष उमेरका जहाजहरू छन् । भएकामध्ये ४ वटा अन्तराष्ट्रिय लामो गन्तव्यका लागि उडान भर्छन भने ९ वटा जहाज आन्तरिकतर्फको उडानका लागि योग्य छन् तर ९ वटै जहाज पूर्णरुपमा सञ्चालनमा भने छैनन ।
नेपाल एयरलाइन्स 9N-ABU
सन् १९८४ मा निर्माण सम्पन्न भएको यो जहाज पहिलो पटक नै नेपाल वायुसेवा निगमले खरिद गरि संचालनमा ल्याएको हो । हालसम्म यो विमान ३९ वर्ष देखि उडिरहेको विवरण छ ।
नेपाल एयरलाइन्स 9N-ABT
सन १९८४ मा निर्माण सम्पन्न भएको यो जहाज पनि पहिलोपटक नेपाल वायुसेवा निगमले नै खरिद गरि संचालनमा ल्याएको हो । यो विमानको आयु ४० वर्षको भयो ।
नेपाल एयरलाइन्स 9N-ABX
सन १९८५ मा निर्माण सम्पन्न भएको यो जहाज पनि पहिलोपटक नेपाल वायुसेवा निगमले सन् १९८६ मा खरिद गरि संचालनमा ल्याएको हो । यो विमानको आयु ३८ वर्षको भयो ।
नेपाल एयरलाइन्स वाइडबडी 9N-ACB
यो जहाज नेपाल एयरलाइन्सलेको पुरानो र ठूलो जहाज हो । यो जहाज पहिलोपटक सन् १९८८ मा नेपाल एयरलाइन्सले खरिद गरेर संचालनमा ल्याएको थियो । यो जहाज सन् २०१८ यता सञ्चालनमा नभएपछि उडानका लागि भने योग्य रहेको नागरिक उड्ययन प्राधिकरणे जनाएको छ । यो नेपाल एयरलाइन्सले बिक्रिका लागि राखेको जहाज हो । यो जहाजको उमेर ३३ वर्ष पुगेको छ ।
नेपाल एयरलाइन्स न्यारोवडी 9N-AKX
यो जहाज पहिलोपटक नेपाल एयरलाइन्सले नै २०७२ सालमा खरिद गरेर संचालनमा ल्याएको हो । यो जहाजको उमेर ९ वर्ष भयो । यो अन्तराष्ट्रिय उडानका लागि प्रयोग हुँदै आएको जहाज हो ।
नेपाल एयरलाइन्स न्यारोवडी 9N-AKW
यो जहाज पनि पहिलोपटक नेपाल एयरलाइन्सले नै खरिद गरेर संचालनमा ल्याएको हो । यो जहाज नेपाल एयरलाइन्सले २०७२ साल मै खरिद गरेको हो । यो जहाजको उमेर पनि ९ वर्ष भयो । यसले पनि अन्तराष्ट्रिय उडान भर्छ ।
नेपाल एयरलाइन्स वाइडबडी 9N-ALY
यो जहाज नेपाल एयरलाइन्सले किनेको नयाँ जहाज हो । बि।स २०७५ सालमा यो जहाज खरिद गरेर संचालनमा ल्याएको हो । यो जहाज सञ्चालन भएको ६ वर्ष भयो ।
नेपाल एयरलाइन्स वाइडबडी 9N-ALZ
यो जहाज पनि नेपाल एयरलाइन्सले नै पहिलोपटक बि।स २०७५ मा खरिद गरेर संचालनमा ल्याएको हो । यो जहाज पनि सञ्चालन भएको ६ वर्ष भयो ।
नागरिक उड्यन प्राधिकरणका अनुसार यसका अलवा नेपाल एयरलाइन्ससँग 9N-AKQ, 9N-AKR, 9N-AKS, 9N-AKT, 9N-AKV कलसाइन भएका जहाज दर्ता छन् ।
हिमालय एयरलाइन्स
चिनियाँ र नेपाली लगानीकर्ताको यो एयरलाइन्स कम्पनीले काठमाडौँलाई आधार बनाएर खासगरी चीन र अन्य केही गन्तव्यहरुमा उडान भरिरहेको छ । यो कम्पनीसँग ४ वटा न्यारोवडी जहाजहरु छन् ।
यि मध्ये २ वटा जहाज दोस्रो एयरलाइन्सबाट खरिद गरिएका हुन् भने २ जहाज निर्माण कम्पनीबाटै एयरलाइन्स आफैले खरिद गरेको हो । यस्ता छन् हिमालयन एयरलाइन्सका जहाजहरुः
हिमालय एयरलाइन्स 9N-ALM
यो जहाज पहिलोपटक सन् २०१५ जुलाईमा चीनको तिब्बत एयरलाइन्सले संचालनमा ल्याएको थियो भने दोस्रोपटक उक्त जहाज सन् २०१६ मार्चदेखि नेपालको हिमालय एयरलाइन्सले संचालनमा ल्याएको थियो । हिमालय एयरलाइन्सले पुन उक्त जहाज भियतनामको बेम्बो एयरलाइन्सलाई सन् २०१९ मा बेचेको थियो । तर सन् २०१९ को नोभेम्बरबाट पुन नेपालको हिमालय एयरलाइन्सले खरिद गरेर उडाइरहेको छ । यो जहाज हालसमम्म ९ वर्ष उडिसकेको छ ।
हिमालय एयरलाइन्स 9N-ALV
यो जहाज पहिलोपटक नेपालकै हिमालय एयरलाइन्सले सन २०१७ मा खरिद गरेर संचालनमा ल्याएको हो । यो जहाज हालसम्म ७ वर्ष चलिसकेको छ ।
हिमालय एयरलाइन्स 9N-ALW
यो जहाज पनि पहिलोपटक नेपालकै हिमालय एयरलाइन्सले सन २०१७ मा खरिद गरेर संचालनमा ल्याएको हो । यो जहाजले पनि ७ वर्षयता उडान भरिरहेको छ ।
हिमालय एयरलाइन्स 9N-AJK
यो जहाज पहिलोपटक सन् २०१९ जुनमा चिनको तिब्बत एयरलाइन्सले खरिद गरेर संचालनमा ल्याएको थियो । सोही जहाज नेपालको हिमालय एयरलाइन्सले खरिद गरेर सन् २०२० को मार्चदेखि संचालनमा ल्याएको हो । यो जहाज ५ वर्ष मात्र पुरानो हो ।
बुद्ध एयर
नेपालको आन्तरिक उडानमा सबै भन्दा ठूलो विमान कम्पनीको हो बुद्ध एयर । यो कम्पनीसँग १८ वटा जहाज देशका विभिन्न स्थानमा उडान भर्न योग्न छन् तर सबै जहाज पूर्ण रुपमा भने सञ्चालनमा छैनन् । बुद्ध एयरका जहाज एयरलाइन्स कम्पनी आफैंले पहिलो पटक किनेर चलाएको उपलब्ध रेकर्डमा देखिन्न ।
निर्माता कम्पनीबाट अन्य कम्पनी चलाइसकेको जहाज मात्रै बुद्ध एयरले किनेको अभिलेखा उल्लेख छ । यस्ता छन् बुद्ध एयरका जहाज र तिनका उमेर :
बुद्ध एयर 9N-AJX
यो जहाज सन् १९९९ मे ८ मा पहिलोपटक स्पेनको एयर नोस्ट्रम एयरलाइन्सले सञ्चालनमा ल्याएको थियो । सो जहाज सन् २०१२ अगस्टसम्म सोही कम्पनीले उडाएको थियो । त्यसपश्चात उक्त जहाज सन २०१२ सेप्टेम्बरमा बुद्ध एयरले किनेर हालसम्म चलाइरहेको छ । यो विमानले २५ वर्षदेखि उडान भरिरहेको छ ।
बुद्ध एयर 9N-AJS
सन् १९९७ नोभेम्बर ७ मा पहिलोपटक चीनको चाइना सिन्जियाङ् एयरलाइन्सले किनेको यो जहाज सन् २००३ मार्च १ मा चिनकै चाइना साउथर्न एयरलाइन्सले चलाएको थियो । त्यसपछि सन २०११ मा नेपालको बुद्ध एयरलाइन्सले किनेर उक्त जहाज चलाइरहेको छ । १३ वर्षदेखि नेपाली आकाशमा उडिरहेको यो विमानको उमेर २६ वर्षको भएको छ ।
बुद्ध एयर 9N-AJO
सन १९९७ नोभेम्बरमा फ्रान्सको एयर तहिटिले पहिलोपटक सञ्चालनमा ल्याएको यो जहाज सन् २००६ फेब्रुअरीमा इन्डियाको एयर डेकान नामक एयरलाइन्स कम्पनीले किनेर चलाएको थियो ।
सोही जहाज सन् २०१० जुनमा नेपालको बुद्ध एयरले किनेर सञ्चालनमा ल्याएको हो । १४ वर्षदेखि नेपाली आकाशमा उडिरहेको यो विमानले उडान सुरु गरेको भने २७ वर्ष बढी भएको छ ।
बुद्ध एयर 9N-AMD
सन २००६ नोभेम्बरमा फ्रान्सको एयर क्यालिडोनिया एयरलाइन्स कम्पनीले पहिलोपटक खरिद गरेर सन्चालनमा ल्याएको थियो । यो विमान सन् २०१७ फेब्रुअरीमा नेपालको बुद्ध एयरले खरिद गरेको थियो । ७ वर्षदेखि नेपालमा उडिरहेको यो विमान १८ वर्षदेखि सञ्चालनमा छ ।
बुद्ध एयर 9N-AMF
फ्रान्सको एयर क्यालिडोनिया नामक एयरलाइन्स कम्पनीले सन २००७ अक्टोबरमा पहिलोपटक सञ्चालनमा ल्याएको यो सन् २०१८ जनवरीमा नेपालको बुद्ध एयरले खरिद गरेर उडाइरहेको छ । यो जहाजले करिब १७ वर्षदेखि निरन्तर उडिरहेको छ ।
बुद्ध एयर 9N-AMU
पहिलोपटक सन २००७ सेप्टेम्बरदेखि इन्डियाको किङ्फिसर एयरलाइन्सले संचालन गरेको यो जहाज उडान भरेको ७ वर्षपछि सन् २०१४ मा फ्रान्सको एयर क्यालिडोनी एयरलाइन्सले खरिद गरेर सञ्चालनमा ल्याएको थियो । सोही जहाज ४ वर्षपछि अर्थात सन् २०१८ जुनदेखि नेपालको बुद्ध एयरले संचालनमा ल्याएको छ । हालसम्म यो जहाज करिब १७ वर्ष उडिसकेको छ ।
बुद्ध एयर 9N-AMY
सन् २००७ जुनमा फ्रान्सको एयर तहिटीले पहिलोपटक सञ्चालनमा ल्याएको यो जहाजले सन् २०१९ मार्च देखि बुद्ध एयरमार्फबाट उडान भरिरहेको छ । यो जहाजको आयु १७ वर्ष भइसकेको छ ।
बुद्ध एयर 9N-AIT
मौरिटानियाको एयर मौरिटानियाले पहिलोपटक सन् १९९६ जुनदेखि संचालनमा ल्याएको यो सन् १९९९ जुनदेखि चेक रिपब्लिकको सिएसए एयरलाइन्सले सञ्चालनमा ल्यायो ।
यो जहाज तेस्रो पटक सन् २००६ अप्रिल देखि पोल्याण्डको ह्वाइट इगल एभिएसनले चलाया भने चौथो पटक सन् २००९ मे देखि नेपालको बुद्ध एयरले उडाइरहेको छ । यो जहाज हालसम्म २८ वर्ष बढी सञ्चालनमा आइसकेको छ ।
बुद्ध एयर 9N-AIN
पहिलोपटक सन् १९९७ नोभेम्बरदेखि फ्रान्सको एयर क्यालेडोनियाले संचालनमा ल्याएको यो जहाज सन् २००८ सेप्टेम्बरदेखि बुद्ध एयरले नेपालमा उडाइरहेको छ । हालसम्म यो जहाज करिब २९ वर्ष उडिसकेको छ ।
बुद्ध एयर 9N-AIM
यो जहाज पाँचौ पटक बिक्रि भएर नेपाल आइपुगेको हो । पछिल्लो १३ वर्ष देखी बुद्ध एयरले यो जहाज नेपालमा उडाइरहेको छ । यो विमान हालसम्म २९ वर्ष चलिसकेको छ ।
बुद्ध एयर 9N-AJL
सुरुमा इन्डियाको जेट एयरवेजले सन् २०१० डिसेम्बरदेखि संचालनमा ल्याएको सो जहाज उक्त कम्पनीले सन् २०१९ देखि थन्क्याएर राखेको थियो । जेट एयरवेजले २ वर्ष थन्काएको सो विमान सन् २०२१ मा बुद्ध एयरले खरिद गरि नेपाली आकाशमा उडाइरहेको छ ।
बुद्ध एयर 9N-ANI
पहिलोपटक सन् २००७ डिसेम्बरमा इन्डियाको किङ्फिसर एयरलाइन्सले संचालनमा ल्याएको उक्त जहाज २०१३ इन्डियाकै जेटकनेक्ट एयरलाइन्सले संचालन गरेको थियो । सोही जहाज तेस्रोपटक बुद्ध एयरले सन २०१९ सेप्टेम्बरदेखि सञ्चालनमा ल्याएको हो । यो जहाजको आयु साढे सोह्र वर्ष भएको छ ।
बुद्ध एयर 9N-ANH
यो जहाज पहिलोपटक सन् २०१० नोभेम्बरदेखि इन्डियाको जेट एयरवेज नामक कम्पनीले सञ्चालनमा ल्याएको हो । सोही जहाज सन् २०२१ मा बुद्ध एयरले खरिद गरेर सञ्चालनमा ल्याएको छ । यो विमानले उडान सुरु गरेको करिब १४ वर्ष भएको छ ।
बुद्ध एयर 9N-ANP
यो जहाज पहिलोपटक सन् २००८ डिसेम्बरदेखि इन्डियाको जेट एयरवेजले सञ्चालनमा ल्याएको थियो । त्यही विमान बुद्ध एयरले सन् २०२२ मा खरिद गरि नेपाली आकाशमा उडाइरहेको छ । यो विमान साढे १५ वर्षदेखि उडान भरिरहेको छ ।
बुद्ध एयर 9N-ANQ
सन् २००८ डिसेम्बरदेखि इन्डियाको जेट एयरवेजले सञ्चालनमा ल्याएको यो जहाजको सन २०१९ मा सबै उडान रोकिएको थियो । त्यसको करिब ८ महिनापछि इन्डियाकै ट्रुजेटले खरिद गरेर २०२१ सम्म सञ्चालन गर्यो । उक्त जहाज सन २०२३ मा नेपालको बुद्ध एयरले खरिद गरेर सञ्चालनमा ल्याएको छ । यो जहाजको उमेर करिब १६ वर्ष भइसकेको छ ।
बुद्ध एयर 9N-ANW
सन् २०१० मा ब्राजिलको ट्रिप एयरलाइन्सले सञ्चालनमा ल्याएको यो जहाज सन २०१७ मा स्पेनको एरोनोभा कम्पनीले खरिद गरेर स्पेनकै एयर युरोपा एक्स्प्रेसलाई बिक्रि गर्यो । उक्त कम्पनीले यो जहाज २०२१ जुलाई सम्म सञ्चालन गर्यो र स्टोर्ड गर्यो । त्यहि जहाज बुद्ध एयरले सनु २०२३ सेप्टेम्बरमा खरिद गरेर सञ्चालनमा ल्याएको थियो । यो जहाज विगत एक महिनादेखि पार्किङ गरेर राखिएको छ । यो जहाज हालसम्म १४ वर्ष सञ्चालनमा आएको छ ।
बुद्ध एयर 9N-AOC
सन् २०११ मा अष्ट्रेलियाको स्काइवेस्ट एयरलाइन्स अष्ट्रेलियाले पहिलोपटक सञ्चालनमा ल्याएको यो जहाज सन् २०१३ देखि अष्ट्रेलियाकै भर्जिन अष्ट्रेलिया रिजनल एयरलाइन्सले उडान सुरु गरेको थियो । पछि सन् २०१७ मा स्टोर गरेर राखेको यो जहाज इन्डियाको फ्लाइबिग एयरलाइन्सले सन् २०२१ देखि सञ्चालनमा ल्याएको थियो । त्यसको करिब २ महिनापछि पुनः स्टोरमा राखिएको यो जहाज सन् २०२३ मा बुद्ध एयरले खरिद गरेर नियमित उडान भरिरहेको छ । यो जहाजको उमेर १३ वर्ष पुगेको छ ।
बुद्ध एयर 9N-ANZ
यो जहाज पहिलोपटक स्पेनको नेसा एयरलाइन्सले सन् २०१० देखि २०१८ सम्म सञ्चालनमा ल्याएको थियो । उक्त जहाज २०१८ मा स्पेनकै बिन्टर क्यानारियास एयरलाइन्सले खरिद गरेर २०२३ अक्टोबरसम्म सञ्चालन गर्यो र स्टोर गर्यो । त्यसको करिब ८ महिनापछि सन् २०२४ मा उक्त जहाज बुद्ध एयरले खरिद गरेर नेपालको आकाशमा उडाइरहेको छ । यो जहाजले करिब १४ वर्ष उडान भरिसकेको छ ।
यति एयरलाइन्स
आन्तरिकतर्फको हवाई उडानमा दोस्रो स्थानमा रहेको यति एयरलाइन्ससँग ७ वटा जहाजहरू छन् । यतिको जहाज पनि कम्पनी आफैँले नयाँ किनेको भने देखिएन । विभिन्न कम्पनी चलाइसकेको जहाज दोस्रो,तेस्रो पटकमा किनेर कम्पनीको सञ्चालनमा ल्याएको देखिएको छ । यतिसँग भएका जहाजहरुको आयु १२ वर्ष भन्दा माथि र साढे १७ वर्ष भन्दा कमका छन् ।
यति एयरलाइन्स 9N-AMM
यति एयरलाइन्सले अहिले उडान भरिरहेको यो जहाज पहिलोपटक सन २००७ को मे बाट ताइवानको ट्रान्ससिया एयरवेजले सञ्चालनमा ल्याएको थियो । उक्त विमानलाई सन २०१६ को नोभेम्बरबाट चलाउनका लागि रोकिएको थियो । तर, सोही जहाज सन २०१७ को सेप्टेम्बरबाट नेपालको यति एयरलाइन्सले खरिद गरेर उडाइरहेको छ । यो विमान १७ वर्षदेखि उडिरहेको छ ।
यति एयरलाइन्स 9N-AMN
सन् २००९ को अक्टोबरमा वानुअतुको एयर वानुअतुले सञ्चालनमा ल्याएको उक्त जहाज सन २०१७ देखि स्टोरमा थन्काएर राखिएको थियो । तर, सोही जहाज थन्काएको ५ महिना पछि नेपालको यति एयरलाइन्सले खरिद गरेर नेपाली आकाशमा उडाइरहेको छ । यो विमानले उडान सुरु गरेको पनि १५ वर्ष भएको छ ।
यति एयरलाइन्स 9N-ANG
यो जहाजको उमेर १७ वर्ष ३ महिनाको भयो । यति एयरलाइन्सले पाँचौ पटकमा किनेको सो जहाज अहिले पार्किङमा थन्क्याइएको छ ।
यति एयरलाइन्स 9N-ALN
यति एयरलाइन्सले संचालन गरिरहेको यो जहाज पहिलोपटक सन २००८ मा इन्डियाको किङ्फिसर एयरलाइन्सले सञ्चालनमा ल्याएको थियो । तर २०१२ को अक्टोबरमा उक्त जहाजलाई सबै उडानबाट रोक लगाइएको थियो । त्यसको करिब ६ वर्षपछि सोही विमान नेपालको यति एयरलाइन्सले सन २०१८ मा खरिद गरेर उडाइरहेको छ । यो विमानले उडान सुरु गरेको पनि साढे १६ वर्ष भएको छ ।
यति एयरलाइन्स 9N-AMZ
यो जहाज पहिलोपटक सन २०१२ को मे मा अष्ट्रेलियाको स्काइवेस्ट एयरलाइन्सले सञ्चालनमा ल्याएको हो । २०१३ को मे देखि अष्ट्रेलियाकै भर्जिन अष्ट्रेलिया रिजनल एयरलाइन्सले संचालन गरेको उक्त जहाज २०१७ को डिसेम्बरदेखि स्टोरमा थन्क्याएर राखिएको थियो । थन्क्याएको ५ वर्ष पछि अर्थात सन २०२२ को सेप्टेम्बरमा उक्त जहाज नेपालको यति एयरलान्सले खरिद गरेर संचानलनमा ल्याएको हो । यो विमानले उडान सुरु गरेको पनि साढे १२ वर्ष बढी भयो ।
यति एयरलाइन्स 9N-AOF
यो जहाज पहिलो पटक सन् २०१० मा उरुग्वेको बिक्यूबि लिनेआस एरियास एयरलाइन्सले सञ्चालन गरेर २०१५ मा स्टोर्ड गरेको थियो । सोही जहाज ८ महिनापछि बङ्गालदेशको नोभो एयरले खरिद गरेर सञ्चालनमा ल्याएको थियो । उक्त जहाज सन् २०२४ मै यति एयरलाइन्सले खरिद गरेर नियमित उडान भरिरहेको छ । हालसम्म यो जहाजले करिब १४ वर्ष उडान भरिसकेको छ ।
यति एयरलाइन्स 9N-AOH
यो जहाज पनि सन् २०१० मा उरुग्वेको बिक्यूबि लिनेआस एरियास एयरलाइन्सले सञ्चालन गरेर २०१६ मा स्टोर्ड गरेको थियो । त्यसको करिब एक महिनापछि उक्त जहाज बङ्गालदेशको नोभो एयरले खरिद गरेर सञ्चालनमा ल्याएको थियो । उक्त जहाज सन् २०२४ मै यति एयरलाइन्सले खरिद गरेर नियमित उडान भरिरहेको छ । यो जहाजले पनि करिब १४ वर्ष उडान भरिसकेको छ ।
श्री एयरलाइन्स
आन्तरिक हवाई उडानमा तेस्रो ठूलो प्लेयरको रुपमा श्री एयरलाइन्सलाई चिनिन्छ । प्राधिकरणका अनुसार कम्पनीसँग १० वटा जहाज छन् तर ति मध्ये ३ वटा जहाज नियमित उडानमा छैनन् । श्री एयरलाइन्सले पनि विमान निर्माता कम्पनीबाट जहाज किनेको देखिन्न । विभिन्न कम्पनीहरुले किनेर केही वर्ष चलाइसकेका चहाजहरु श्रीले नेपाल भित्र्याएको देखिन्छ । यो कम्पनीमा सञ्चालनमा रहेका जहाजहरू १३ देखि २२ वर्ष उमेरका छन् ।
श्री एयरलाइन्स 9N-AMC
यो जहाज पहिलोपटक सन २००२ मा जापानको जे एयरले सञ्चालनमा ल्याएको थियो । करिब १५ वर्ष संचालनपछि उक्त जहाज स्टोरमा राखिएको थियो । त्यहि जहाज नेपालको श्री एयरलाइन्सले सन २०१७ देखि खरिद गरेर सञ्चालनमा ल्याएको छ । हालसम्म यो जहाजले २२ वर्ष उडान भरिसकेको छ ।
श्री एयरलाइन्स 9N-ANE
सन् २००७ देखि अमेरिकाको होराइजन एयरले सञ्चालनमा ल्याएको यो विमान सन २०१७ देखि स्टोरमा थन्क्याएर राखिएको थियो । त्यहि जहाज नेपालको श्री एयरलाइन्सले सन २०१९ यता सञ्चालन गरेको थियो तर एक महिनादेखि यो जहाज पार्किङ राखिएको छ । यो जहाजले हालसम्म १७ वर्ष उडान भरिसकेको छ ।
श्री एयरलाइन्स 9N-ANF
सन् २००७ देखि अमेरिकाको होराइजन एयरले सञ्चालनमा ल्याएको यो विमान सन २०१८ देखि स्टोरमा थन्क्याएर राखिएको थियो । त्यहि जहाज नेपालको श्री एयरलाइन्सले सन २०१९ मा खरिद गरेर सञ्चालनमा ल्याएको छ । यो विमान पनि १७ वर्षदेखि उडिरहेको छ ।
श्री एयरलाइन्स 9N-AOK
सन् २०११ मा अमेरिकाको होराइजन एयरले सञ्चालनमा ल्याएको यो जहाज सन २०२२ देखि स्टोरमा राखिएको थियो । सोही जहाज श्री एयरलाइन्सले २०२४ मा खरिद गरेर नियमित सञ्चालन गरिरहेको छ । यो जहाजले १३ वर्ष देखि उडान भरिरहेको छ ।
श्री एयरलाइन्स 9N-AOL
सन् २०११ मा अमेरिकाको होराइजन एयरले नै सञ्चालनमा ल्याएको यो जहाज सन २०२३ देखि स्टोरमा राखिएको थियो । सोही जहाज श्री एयरलाइन्सले २०२४ मा खरिद गरेर नियमित सञ्चालन गरिरहेको छ ।
श्री एयरलाइन्स 9N-ANR
यो जहाज पहिलोपटक सन २००९ मा अष्ट्रियाको अष्ट्रियन एरोज नामक कम्पनीले खरिद गरेर सञ्चालनमा ल्याएको थियो । सोही जहाज सन २०१२ मा अष्ट्रियाको अष्ट्रियन एयरलाइन्स नामक कम्पनीले खरिद गरेर संचालन गरेको थियो तर उक्त विमान सन २०२१ देखि स्टोरमा थन्क्याएर राखिएको थियो । थन्क्याएको ९ महिनामै उक्त विमान नेपालको श्री एयरलाइन्सले खरिद गरेर हाल उडाइरहेको छ । यो विमानले उडान सुरु गरेको १५ वर्ष भयो ।
श्री एयरलाइन्स 9N-ANS
सन २००९ को डिसेम्बरदेखि जर्मनीको अग्सबर्ग एयरवेजले सञ्चालनमा आएको उक्त विमान सन २०१३ को अक्टोबरदेखि सबै उडामा रोक लगाइएको थियो । सोही विमान सन २०१४ मा क्यानडाको नर्थ क्यारिबो एयरले खरिद गरेर सञ्चालनमा ल्याएको थियो । तर उक्त विमान सन २०१४ मा अष्ट्रियाको अष्ट्रियन एयरलाइन्सले उडायो । उक्त कम्पनीले पनि उक्त विमान उडान रोकेर स्टोरमा राखेको थियो । त्यही विमान सन २०२२ मा खरिद गरेर नेपालको श्री एयरलाइन्सले सञ्चालनमा ल्याएको छ।
श्री एयरलाइन्स 9N-AMB
सन् २००२ मा डेनमार्कको मसर््क एयरले सञ्चालनमा ल्याएको यो जहाज सन् २००३ देखि युकेको डुवो एयरवेजले सञ्चालनमा ल्याएको थियो । १ वर्ष सञ्चालनपछि स्टोरमा राखिएको सो जहाज सन् २००९ मा इन्डियाको एयर इन्डिया रिजनलले सञ्चालनमा ल्याएको थियो । २०१६ मा स्टोरमा राखिएको सो जहाज सन् २०१७ यता श्री एयरलाइन्सले खरिद गरेर सञ्चालनमा ल्याएको थियो तर २०२२ यता यो जहाज स्टोर गरिएको छ । यो जहाजले करिब २२ वर्षदेखि उडान भरिरहेको छ ।
श्री एयरलाइन्स 9N-AMA
सन् २००४ मा जापानको आइबेक्स एयरलाइन्सले सञ्चालनमा ल्याएको यो जहाज सन् २०१६ मा स्टोर गरिएको थियो । सो जहाज सन् २०१७ मा श्री एयरलाइन्सले खरिद गरेर सञ्चालनमा ल्याएको थियो । तर यो जहाज सन् २०२२ यता स्टोरमा राखिएको छ । यो जहाजले करिब २० वर्ष उडान भरेको छ ।
श्री एयरलाइन्स 9N-AMO
सन् २००६ मा अमेरिकाको होराइजन एयरले सञ्चालनमा ल्याएको यो जहाज सन् २०११ देखि अमेरिकाकै स्काईवेस्ट एयरलाइन्सले सञ्चालन गरेको थियो । सन् २०१६ मा स्टोर गरिएको जहाज किनेर २०१८ मा सञ्चालन गरेको श्री एयरलाइन्सले पुन २०२१ देखि स्टोरमा राखेको छ ।
सौर्य एयरलाइन्स
साउन ९ गते दुर्घटनामा परेपछि सैर्य एयरलाइन्ससँग अब २ वटा मात्रै जहाज बाँकी छन् । २१ वर्ष देखि सञ्चालनमा आएको सौर्य ढल्९ब्ःभ्, ऋच्व्९द्दण्ण् जहाज बुधबार दुर्घटनामा परेको थियो । यो कम्पनीसँग १९ र २३ वर्ष देखि सञ्चालनमा रहेका जहाजहरू छन् ।
सौर्य एयरलाइन्स 9N-ANM
सन् २००५ अक्टोबरमा जापानको जे एयरले सञ्चालनमा ल्याएको सन् २०१८ यता स्टोर गरिएको थियो । सोही जहाज सन् २०२० मा सौर्य एयरलाइन्सले खरिद गरेर सञ्चालनमा ल्याएको छ । यो जहाजले पनि १९ वर्षदेखि उडान भरिरहेको छ ।
सन् २००१ मा क्यानडाको बम्बार्डिअर एयरलाइन्सले सञ्चालनमा ल्याएको यो जहाज त्यसको २ महिनापछि स्पेनको एयर नोस्ट्रमले उडाएको थियो । त्यसको १३ वर्षपछि अर्थात सन २०१४ मा यो जहाज सौर्य एयरलाइन्सले उडान भर्दै आएको छ । यो जहाजको उमेर २३ वर्ष भइसकेको छ ।
तारा एयरलाइन्स
तारा एयरलाइन्स यति एयरलाइन्सको भगिनी संस्था हो । यो कम्पनीले दुर्गम क्षेत्रमा मात्रै यात्रु र कार्गो उडान भर्ने गरेको छ । यो कम्पनीसँग ३ वटा यस्ता साना जहाजहरू छन् ।
तारा एयर 9N-AEV
यो जहाज ३४ वर्ष पुरानो भयो । सन् १९९० मा अमेरिकाको मार्कएयर एक्सप्रेसले चलाएको यो जहाज सन् १९९८ मा नेपाल भित्रिएको थियो । सन् २००९ यता तारा एयरलाइन्सले यो जहाज उडाई रहेको छ ।
तारा एयर 9N-AKL
सन् २०१५ मा निर्माण भएको उक्त जहाज क्यानडाको भाइकिङ् एयरले सन २०१५ मै खरिद गरेर ५ महिनापछि नेपालको तारा एयरलाई बिक्रि गरेको हो । हाल यो नेपालमै सञ्चालनरत छ । यो विमानले उडान सुरु गरेको बल्ल ९ वर्ष भयो ।
तारा एयर 9N-ALO
सन २००८ मा निर्माण भएको यो विमान सन २०१० मा एयर सेसेलसले खरिद गरेर सञ्चालनमा ल्यायो । संचालनको करिब ८ वर्षपछि तारा यअरले सन् २०१८ मा खरिद गरेको यो विमान हालसम्म उडाइरहेको छ । यो विमानले पनि १६ वर्षदेखि उडान भरिरहेको छ ।
समिट एयर
हिमाली क्षेत्रमा पर्यटक र तथा चार्टर्ड उडानमा समिट एयरलाइन्स अग्रणी छ । निजी क्षेत्रबाट नेपालमा कम्पनीबाट सिधै विमान किनेर ल्याएर सञ्चालन गर्ने कम्पनीमा समिट पर्दछ । एयरलाइन्समा हालसम्म ४ वटा जहाज सञ्चालमा छ । ति सबै निर्माण कम्पनीबाट सिधै नेपाल ल्याइएका हुन् ।
समिट एयर 9N- AKZ
२०१४ मा निर्माण भएको यो जहाज सन २०१५ मा नेपालले ल्याएर निरन्तर सञ्चालनमा छ ।
समिट एयर 9N- AMG
२०१४ मा निर्माण भएको यो जहाज सन २०१७ मा नेपालको समिट एयरले ल्याएर निरन्तर सञ्चालनमा छ ।
समिट एयर 9N- AMP
२०१४ मा निर्माण भएको यो जहाज सन २०१७ मा नेपालको समिट एयरले ल्याएर निरन्तर सञ्चालनमा छ ।
समिट एयर 9N- AND
२०१४ मा निर्माण भएको यो जहाज सन २०१७ मा नेपालको समिट एयरले ल्याएर निरन्तर सञ्चालनमा छ ।
सिता एयर
नेपालमा सबै भन्दा बुढा जहाज चलाउने एयरलाइन्स कम्पनीमा पर्छ सिता एयर । नेपालको हिमाली गन्तब्यमा उडान भर्ने यी जहाजहरू ३९ वर्षसम्म उडान भरिसकेका छन् ।
सिता एयर 9N-AHB
सन् १९९० मा फ्रान्सको एयर ग्वाडेलोपले खरिद गरेर संचालन गरेको यो जहाज सन् २००० मा एयर कराइबेसले खरिद गरि संचालन गर्यो । त्यहि जहाज सन् २००३ यत सिता एयरलाइन्सले सञ्चालन गर्दै आएको छ । यो जहाज पनि ३४ वर्षदेखि उडिरहेको छ ।
सिता एयर 9N-AHR
सन् १९८८ मा अमेरिकाको मिडवे कम्युटर एयरलाइन्स ले पहिलोपटक खरिद गरेर संचालन गरेको उक्त जहाज सन् १९९४ मा मिल्ने बे एयरले सञ्चालन गर्यो । त्यसपछि सन् २००५ मा नेपाल भित्रिएको उक्त जहाज समिट एयर, गोर्खा एयर हुँदै अहिले सिता एयरले उडाइरहेको छ । यो विमान पनि ३६ वर्षदेखि उडिरहेको छ ।
सिता एयर 9N-AJH
सन् १९९० मा एयर मोरिया एयरलाइन्सले सञ्चालनमा ल्याएको यो जहाज सन् २००६ मा एयरलाइन्स अफ तास्मानिया प्रालिले उडान भर्न सुरु गरेको थियो । सोही जहाज सन् २०१० मा अग्नि एयरले खरिद गरेर सञ्चालनमा ल्याएको यो जहाज २०१३ यता सिता यअरले चलाइरहेको छ । यो जहाजले ३४ वर्षयता उडान भरिरहेको छ ।
सिता एयर 9N-AIE
सन् १९८५ देखि सञ्चालनमा आएको यो जहाज १२ वर्षको अव विभिन्न ८ कम्पनीले उडान भरे । यो जहाज सन् २०१३ मा सिम्रिक एयरले ल्याएको यो जहाज सिता एयरले खरिद गरेर निरन्तर सञ्चालनमा ल्याएको छ । यो जहाजले हालसम्म ३९ वर्ष उडान भरिसकेको छ ।
गुण यअरलाइन्स
त्यस्तै गुण एयरलाइन्ससँग पनि आन्तरिक उडान भर्नका लागि ७ जहाजहरू रहेको प्राधिकरणले जनाएको छ । तर १ वर्षदेखि उडान नभरेको उक्त कम्पनीले जनाएको छ ।
