सरकारले अपेक्षित काम गर्न सकेन, प्रधानमन्त्रीलाई सरकार ढल्ने चिन्तामात्रै भयोः शेखर कोइराला

काठमाडौँ । नेपाली कांग्रेसका नेता डा. शेखर कोइरालाले वर्तमान सरकारको सय दिनमा लक्ष्य अनुसारको काम गर्न नसकेको बताएका छन् । शनिबार काठमाडौँमा आयोजित शुभकामना आदान प्रदान कार्यक्रममा बोल्दै कोइरालाले मुलुकको बिकास र सुशासनका लागि ठूला दल मिलेर सरकार बनाएपछि सरकारले लक्ष्य अनुसारको काम गर्न नसकेको बताएका हुन् । 

‘पहिलो दुई दुई महिनामा सरकार परिवर्तन भइराख्या छ । त्यो परिवर्तनले जनताले खोजेको, चाहेको परिवर्तन दिन सकिराखेको थिएन । राजनीतिक स्थायित्वको लागि झण्डै दुई तिहाइको सरकार बनेको छ । दोस्रो राजनीतिक स्थायित्व भएपछि आर्थिक विकास पनि विस्तारै अुँदै जाने संभावना हुन्छ । र तेस्रो सुशासन । यी तीन कुराको लागि हामीले यो सरकार बनायौँ ।’ उनले भने, ‘तर न त हामीले राजनीतिक स्थायित्व दिन सक्यौँ, न त आर्थिक विकास नै हुन सकेको छ, बढेको छैन केही पनि । हुन त सय दिन मात्रै भएको छ यो सरकार बनेको । न त सुशासनमा नै हामी अब्बल हुन सकेका छौँ ।’ 

उनले अहिले पनि प्रधानमन्त्रीलाई सरकार ढल्ने चिन्तामात्रै रहेको उल्लेख गरे । सरकार ढल्ने कुरा गरेर भूलभूलैयामा पार्ने षड्यन्त्र भइरहेको भन्दै त्यसले देशलाई अघि बढाउन नसक्ने जिकिर गरे । उनले भने, ‘हुँदा हुँदा अब प्रधानमन्त्री ज्यू ले प्रहरी प्रधान कार्यालयमा गएर सरकार ढल्दैन भन्नुहुन्छ । दुई तिहाईको सरकार छ । नेपाली कांग्रेसले पुरै सपोर्ट गरिराखेको छ । ढल्ने किन ? के को लागि ढल्ने ? ढाल्ने कसले ? विदेसीले आएर ढाल्ने होइन । नेपाल कि त संसदबाट संख्या नपुगेर सरकार ढल्छ या जनताको भेलले सरकार जाने हो नि त । अरु त केही उपाए छैन । विदेशीहरुलाई दोष दिने हामीले ? सरकार ढल्ने कुराहरु गरेर भुलभुलैयामा पार्ने जुन प्रयास भईराखेको छ, त्यसमा हामीलाई चिन्ता छ । ’

कांग्रेसको मुख्य प्रतिष्पर्धी एमाले हुँदाहुँदै पनि एमालेसंग सहकार्य गर्नु निकै कठिन काम भएको उनको भनाइ छ । कोइरालाले अहिले दल विभाजनजसम्बन्धी अध्यादेश ल्याउने काम उचित नभएको जिकिर गरे । सरकारका केही क्रियाकलापले सरकार फरक ढंगले हिँड्न खोजेको हो कि भन्ने आभाष भएको उनको भनाइ छ । 

त्यस्तै कांग्रेसका नेता मोहन बहादुर बस्नेतले यसअघिको कमीकमजोरीलाई सुधार गर्दै आगामी निर्वाचनको तयारी गर्नुपर्ने उल्लेख गरे । चुनावी गठबन्धन भन्दा पनि रणनीतिक बिषयमा पार्टीले ध्यान दिनुपर्ने उनले बताए । 

उनले पार्टीभित्र अनुशासन कडाईका साथ लागू गर्नुपर्ने भन्दै पार्टीभित्र अनुशासन उलंघन गर्ने सवैमाथि कारवाही हुनुपर्ने उल्लेख गरे ।