काठमाडाैँकाे पार्किङ व्यवस्थापन गर्ने कम्पनीकाे पैसा राख्ने सहकारीमा महानगरले छापा मारेर लगायाे सिल

काठमाडाैँ। काठमाडाैँकाे पार्किङ व्यवस्थापन गर्ने कम्पनीले पार्किङबाट जम्मा गरेकाे अवैध रकम राख्ने गररेकाे एक सहकारीमा महानगरले छापा मारेकाे छ । महानगरका मेयरकाे सचिवालयलाई प्राप्त गोप्य सूचना र सिधाकुरामा स्मार्ट पार्किङमा भ्रष्टाचार सम्बन्धी समाचार प्रकाशन भएपछि महानगरले शुक्रबार साँझ पार्किङ व्यवस्थापन गर्ने कम्पनीले  सञ्चालन गर्ने सहकारीमा छापा मारेकाे हाे । सिधाकुराले शुक्रबार 'बिद्यासुन्दरको ‘स्मार्ट पार्किङ’ परियोजनामा कम्तिमा ३ अर्ब भ्रष्टाचार" शिर्षकमा प्रकाशन गरेकाे  थियाे । 

बिद्यासुन्दरको ‘स्मार्ट पार्किङ’ परियोजनामा कम्तिमा ३ अर्ब भ्रष्टाचार

साे कम्पनीले सञ्चालन गरिरहेकाे एक सहकारीमा महानगरकाे सहकारी विभाग, मेयरको स्वकीय सचिवालय,सहकारी विज्ञ, नेपाल प्रहरीसहित पुगेर सिल गरिएकाे महानगरले जनाएकाे छ ।

उक्त  पार्किङ व्यवस्थापन कम्पनीको कारोबार रहेको काठमाडौँ  न्युरोड स्थित  समान बचत तथा ऋण सहकारी संस्थामा छड्के अनुगमन गरेको महानगर स्राेतले सिधाकुरालाई बतायाे । 'अनुगमनका क्रममा  कुनैपनि विवरण नियम संगत तवरले राखिएको भेटिएन । अनियमितताको  प्रशस्त आधारहरू देखिएको र  अनुसन्धानका लागि चाहिने विवरण उपलब्ध  नगराएकोले सम्पूर्ण विवरण पेश नगर्दासम्मका लागि सहकारीको कार्यालय सिल गरिएको छ,' स्राेतले भन्याे,' महानगरले  थप अनुसन्धान र कार्वाहीका निम्ति सरकारका अन्य निकायसँग परामर्श गरिरहेको छ ।'