जब आगो निभाउन पानी नबोकी दमकल पुग्यो

बझाङ । सोमबार बझाङको सदरमुकाम चैनपुरका सबै पसल व्यवसाय बन्द गरी माघीको रमाइलोमा स्थानीहरू रमाइरहेका थिए । दिउँसो एक बजेको समयमा एक्कासि लोकतान्त्रिक चोकमा रहेको जंगबहादुर स्टोरको माथिल्लो तलाको झ्यालबाट धुँवाको मुस्लो आएको स्थानीयले देखे । के भएको हो भनेर ठम्याउन नपाउँदै चारैतिरबाट धुँवाको मुस्लो आउन थाल्यो । त्यसपछि पसल दनदनी बल्न थाल्यो । 

आगलागी भएको पसल सनम सिंह व्याँसीको हो । उक्त समयमा उनी खाना खान निस्केका थिए । ‘म खाना खान निस्किएको थिएँ । पर्वको दिन व्यापार पनि नहुने भएका कारण बिहानैदेखि पसल बन्द गरेर आफन्तको घरमा खाना खान गएको थिएँ । त्यही समयमा पसलमा आगलागी भएर करोडभन्दा धेरै क्षति भयो,’ उनले भने ‘स्थानीयले देखेर प्रहरी प्रशासनलाई खबर नगरेको भए पसलमा खरानी बाहेक अरु केही भेटिने थिएन ।’

करिब १ बजे सल्किएको आगोबाट घरको माथिल्लो तलामा राखिएको पसलको सम्पूर्ण थान र फेन्सीका कपडाहरुसँगै काठले बनेको घरको छानो पूर्णरुपले जलेर नष्ट भएको छ । माथिल्लो तला ब्याँसीले पसलको गोदामको रुपमा प्रयोग गर्दै आएका थिए । तल्लो भुँई तलामा रहेको पसलमा रहेको सामान भने जोगाउन सफल भएको जिल्ला प्रहरी कार्यालय बझाङका सूचना अधिकारी दिपेश कुस्मीले बताए । उनका अनुसार तीनवटै सुरक्षा निकाय, स्थानीयको सहयोगमा आगो नियन्त्रणमा लिइएको थियो । 

करिब सवा एक बजे जयपृथ्वी नगरपालिकाको दमकललाई जानकारी गराइएको भएपनि तत्काल दमकल घटनास्थलमा आउन सकेन । करिब आधा घण्टापछि दमकल त आयो तर आगो नियन्त्रण गर्नका लागी दमकलमा पर्याप्त पानी नै थिएन । १६ हजार लिटर पानी अटाउने क्षमता भएको दमकलमा एक हजार लिटर पनि पानी थिएन । कपडाको गोदाम र काटले बनेको घरमा दन्किएको आगोमा दमकलमा रहेको पानीको केही चलेन । अन्ततः आगो निभाउन आएको दमकल आगो नै ननिभाई पानी भर्न भन्दै १३ किलोमिटर टाढा रहेको जालेबगरतिर लाग्यो । 

दमकलले आगो नियन्त्रणमा लिन नसकेपछि सुरक्षाकर्मी र स्थानीयले चैनपुर खानेपानी तथा सरसफाइ संस्थानको खानेपानीको पाइपलाई उखेलेर झण्डै दुईघण्टापछि आगो नियन्त्रणमा लिन सफल भए । पसल सञ्चालक समनसिंह ब्याँसीका अनुसार गोदाममा एक करोड बढीको थान र फेन्सीका कपडाहरू स्टोर गरि राखिएको थियो । गोदाममा राखिएका सबै सामान जलेर नष्ट भएको छ ।  

आगो निभाउनका लागी आएको जयपृथ्वी नगरपालिकाको दमकल समयमा आएको भए आगलागीबाट यती ठुलो मात्रामा क्षति हुने थिएन । आगलागी भएको स्थानदेखि जयपृथ्वी नगरपालिकासम्मको दूरी जम्मा एक किलोमिटर छ । त्यहाँबाट दमकल आइपुग्न आधाघण्टा बढी समय लाग्यो । दमकल आए पनि पानी पर्याप्त आएन । यो एउटा प्रतिनिधिमूलक घटना मात्रै हो । चैनपुर आसपासका क्षेत्रमा हुने आगलागी नियन्त्रणमा दमकल कहिल्यै समयमा नआउने र आगलागी भएपछि मात्रै पानी भर्न जाने गरेको स्थानीयहरुको आरोप छ । 

दमकलमा रहेको पानी सकिएपछि दमकलमा पुनः पानी भर्नका लागी चैनपुरदेखि १३ किलोमिटर टाढा जानु पर्ने अवस्था छ । चैनपुरकै काखमा जिल्लाकै दुई ठुला नदी सेती र बाहुली गाड बग्ने गर्दछन् । ती स्थानमा पुग्ने बाटो समेत सहज छैन । पानी भर्नका लागि १३ किलोमिटर टाढा रहेको जालेबगर जानु पर्ने बाध्यता छ । 

आगलागीपछि घटनास्थलमा पुगेका जयपृथ्वी नगरपालिकाका नगरप्रमुख चेतराज बजालले दमकललाई पूर्णरुपले तयारी अवस्थामा राख्न नसक्नु र समयमा नै दमकललाई घटनास्थलसम्म पठाउन नसक्नु आफूहरूको कमजोरी रहेको स्वीकार गरे । उनले चैनपुरमा नै ठूला नदी भएपनि दमकलमा पानी भर्न मिल्ने वातावरण आफूहरूले बताउनु नसकेको पनि स्वीकारे । उनले आगामी दिनमा यस्ता लापरवाही हुन नदिने आश्वासन दिएर फर्के । तर स्थानीयहरू भने मेयर बजालको आश्वासनमा विश्वस्त भने छैनन् ।