मुख्य समाचार

गोली हानिएकी रेविका भेट्न सिभिल अस्पताल पुगेका गृहमन्त्रीले भने, ‘उपचार गर्दा लागेको खर्च फिर्ता पाउनुहुन्छ’

सिधाकुरा

बुधबार, चैत २७, २०८१

गोली हानिएकी रेविका भेट्न सिभिल अस्पताल पुगेका गृहमन्त्रीले भने, ‘उपचार गर्दा लागेको खर्च फिर्ता पाउनुहुन्छ’

काठमाडौँ । चैत १५ गते राजावादीको आन्दोलनका क्रममा प्रहरीले गोली हानेर घाइते बनाएको रेविका खत्रीको परिवारलाई भेट्न गृहमन्त्री लेखक अस्पताल पुगेका छन् । उनले सिभिल अस्पतालमा उपचाररत खत्रीका परिवारलाई भेटेर रेविकाको उपचार गर्दा लागेको सम्पूर्ण खर्च सरकारले व्योहोर्ने आश्वासन दिएका छन् ।

‘उपचारका क्रममा खर्च गरेको विवरण अस्पताल मार्फत स्वास्थ्य मन्त्रालयमा जान्छ र त्यो बिल बराबरको भुक्तानी सरकारले गर्छ ।’, गृहमन्त्री लेखकले भने, ‘कसैले त्यस्तो आफैँले उपचार गरेको, खर्च गरेको बिल भरपाई छ भनेपनि अस्पतालमार्फत प्रमाणित गरेर पठाएपछि त्यो अनुसारको पैसा सरकारले फिर्ता दिन्छ ।’

चैत १५ गतेको आन्दोलन हिंसात्मक बन्दा प्रहरीले अन्दाधुन्दा गोली चलाएको थियो । सो गोली लागेर कामबाट कोठा फर्कँदै गरेकी रेविका र उनलाई लिन चोकसम्म पुगेका उनका दाई दिनेश खत्री घाइते भएका थिए । उदयपुर घर भएका उनीहरुमध्ये दिनेश उपचारपश्चात डिस्चार्ज भइसकेका छन् भने रेविका उपचाररत छिन् ।

कसरी हानिएकाे थियाे गाेली, विस्तृतमा पढ्न यहाँ क्लिक गर्नुहाेस् ।

प्रकाशित मिति: बुधबार, चैत २७, २०८१

प्रतिक्रिया दिनुहोस्