जसले पैसा सापटी दियो उसैको हत्या !

काठमाडौँ । काठमाडौँको माकलबारीमा एक युवकले आफूलाई पैसा सापटी दिने साथीको प्राण पखेरो उडाइदिएका छन् । १ महिनामा पैसा फिर्ता गर्छु भनेर सापटी मागेका युवकले ९ महिनासम्म पैसा फिर्ता गर्नु त परको कुरा अन्त्यमा साथीकै हत्या गरेर ४/४ दिन आफ्नै ग्यारेजमा खाल्डो खनेर पुरे । सपनाको सहर काठमाडौँमा साथीको सपना पुरा गर्न साथ दिँदा एक युवकको सास नै खोसिएको सो घटनाले काठमाडौँको माकलबारीलाई त्रसित बनाएको छ । 

मितिः २०८१ चैत ११ गते
समय: अन्दाजी दिउँसो ३ बजे
काठमाडौँको गोकर्णेश्वरको बाहुनधारा बस्ने सर्लाहीका १९ वर्षीय राहुल साहलाई एक फोन आयो । राहुललाई फोन गर्ने व्यक्ति थिए, गोकर्णेश्वरकै माकलबारी बस्ने २२ वर्षीय निपु मण्डल ।  मण्डल र साह दुवै जनाको घर सर्लाही हो । उनीहरु मिल्ने साथी हुन् । उनीहरु दुवैजनाको परिवार लामो समयदेखि काठमाडौँमै बस्दै आएका थिए । दुवै जनाको घरमा आवतजावत समेत हुने गथ्र्यो ।

मण्डल माकलबारीमा आर.के मोटरसाइकल नामक वर्कशप सञ्चालन गरेर बसेका थिए भने साह आफ्ना बाबुआमासँग बसेर कलेज पढिरहेका थिए । सोही क्रममा गत साउन महिनामा मण्डललाई वर्कशपमा पार्टपुर्जा थप्नुपर्ने भयो । त्यसका लागि पैसाको जोहो गर्न मण्डलले साहसँग सहयोग मागे । 

सानैदेखिको मिल्ने साथी, व्यवसाय गर्न कठिन परेको बताएपछि साहले बाबुआमालाई थाहा नदिई अरुसँगै ऋण गरेर मण्डललाई १ लाख रुपैयाँ थमाए । मण्डलले १ महिनामा फिर्ता गर्छु भनेर मागेको पैसा महिनौँसम्म फिर्ता दिएनन् । उता साहले ऋण गरेको ठाउँबाट उनलाई पैसा फिर्ता गर्न दबाब आउन थाल्यो । 

कमाएर ऋण बुझाउने अवस्था नभएपछि साहले बाबुआमालाई आफूले साथीलाई ऋण खोजिदिएको बताए । लामो समयदेखि छोरोले मानसिक यातना भोगेको थाहा पाएपछि साहका परिवारले समेत मण्डललाई पैसा फिर्ता दिन अनुरोध गरे । तर मण्डलले आफूसँग अहिले पैसा नभएको भन्दै २ वटा चेक थमाए । चेक पाएपछि पैसा पाउने आशामा घर फर्किएका साह सो चेक लिएर बैँक पुगे तर बैँकमा पैसा थिएन । उनी सो चेक लिएर पटकपटक बैँक पुगे तर पैसा पाएनन् । 

बैँक धाउँदा सास्ती व्योहोरेका साहले अन्ततः चेक बाउन्स गर्ने भन्दै मण्डललाई सम्पर्क गरे । तर मण्डलले साहलाई आफ्नो चेक फिर्ता गरेपछि आफू पैसा नै दिने बताए । साहले पुनः मण्डलको विश्वास गरे । उनले लगेर सो चेक साहलाई नै फिर्ता गराइदिए तर पनि मण्डलले पैसा फिर्ता गरेनन् । 

१९ वर्षमा भर्खरै प्रवेश गरेका साहलाई सो विषयले तनावग्रस्त बनाएको थियो । उनीसँग, सापटी ल्याएर साथी मण्डललाई दिएको पैसा फिर्ता गर्ने कुनै आधार थिएन । उता मण्डलले पैसा फिर्ता गर्न अनेक बहाना बनाइरहेका थिए । सोही पैसा फिर्ता गर्छु भन्दै गत चैत ११ गते मण्डलले साहलाई आफ्नो वर्कशपमा बोलाएका थिए ।

लामो समयपछि साथीले पैसा फिर्ता दिने बताएपछि साहले आफ्ना आमाबाबुलाई सो विषय जानकारी गराए र मोटरसाइकल लिएर  माकलबारीतर्फ लागे । करिब ४ किलोमिटर दुरीमा रहेको साथीको वर्कशपमा गएको छोरो घण्टौँसम्म नफर्किएपछि राहुलका बाबुआमा डराउन थाले । छोरो फर्कने बाटो कुर्दा साँझको करिब ८ बजिसकेको थियो तर पनि साह फर्किएनन् । 

त्यसपछि उनीहरु आफ्न्त बोलाएर मण्डलको वर्कशपमा पुगे । वर्कशपमा पुग्दा निपु मण्डल र उनका साथीहरु वर्कशपमा काम गरिरहेका थिए । त्यहाँ उनीहरुले राहुलको मोटरसाइकल देखे तर राहुललाई देखेनन् । 

वर्कशपमा पुगेको छोरो वर्कशपमा नै नदेखेपछि उनीहरुले मण्डललाई राहुलको बारेमा सोघपुछ गरे । परिवारको जिज्ञासामा मण्डलले राहुल त्यहाँबाट पैसा लिएर पठाओमा निस्किएको बताए । 
केही समयको सोधीखोजीपछि राहुलका परिवार उनले लगेको मोटरसाइकल लिएर घर फर्किए । घर फर्किएर उनीहरुले आफ्नो छोरो हराएको भन्दै बौद्ध प्रहरीलाई जानकारी गराए । तर प्रहरीले बेवास्ता गरेको उनीहरुको आरोप छ । 

सो रातभर राहुलका परिवार उनकै बाटो कुरेर बसे तर उनी फर्र्किएनन् । भोलिपल्ट बिहान हुन नपाउँदै उनीहरु सोही वर्कशप पुगे । तर मण्डलले राहुल आफूहरुकहाँ नआएको बताए । 
सोही समयमा उनीहरुले वर्कशपमा रगतको थोपा देखे । त्यसपछि ‘यो के को रगत हो ?’ भनेर सोधीखोजी गर्दा निपु लगायत उनका साथीहरुले आफूहरुले कुखुरा काटेको र सोही रगत त्यहाँ लागेको बताए । 

त्यसपछि राहुलको परिवारलाई झनै शंका उत्पन्न भयो । उनीहरु राहुलको खोजीमा गोकर्णेश्वरका विभिन्न ठाउँमा छरिए । तर राहुलको अत्तोपत्तो भएन । त्यसपछि उनीहरु बौद्ध प्रहरी पुगेर राहुल हराएको भन्दै लिखित निवेदन दिए । 

प्रहरीले राहुलको खोजीमा कुनै प्रगती गरेन । त्यसको भोलिपल्ट बिहानै राहुलका बाबुआमा पुनः सोही वर्कशपमा पुगे । मण्डलले राहुल नआएको कुरा दोहोर्याए । मण्डलले दैनिक एउटै कुरा दोहोर्याएपनि परिवारलाई उनीप्रति आशंका थियो । १३ गते बिहानै वर्कशपमा पुगेका परिवारसँग सोही कुरा दोहोर्याएपछि उनीहरुले प्रहरीलाई दबाद दिन बौद्ध पुगे । 

परिवारको दबाबपछि प्रहरी वर्कशप पुग्यो र निपु मण्डललाई उठाएर बौद्ध लग्यो । अनुसन्धान गर्ने निकायले उनलाई त्यहाँ सामान्य सोधपुछ मात्रै गरेर छोडिदियो । मण्डलसँग ससंकित रहेका परिवार त्यसपछि प्रहरीबाट समेत छोरा भेटिने आश गुमाउन थाले । तर उनीहरुले राहुललाई खोज्न छोडेनन् । 

उनीहरु १४ गते बिहानै पुनः सोही वर्कशपमा पुगे र वर्कशप वरिपरि खोजतलासी गर्न थाले । खोजीका क्रममा उनीहरुले वर्कशप परिसरमा एक चप्पल भेट्टाए । सो चप्पलमा राहुलले आफ्नो मोटरसाइकलको पाङ्ग्रामा लगाएको रातो रङ्ग लत्पतिएको थियो । उनीहरुलाई सो चप्पल राहुलको रहेको छुट्याउन समस्या भएन । 

तर पनि मण्डलले भने पठाओ गरेर निस्किएको बताउन छोडेनन् । त्यसपछि परिवारले सो चप्पल लिएर पुनः प्रहरीकहाँ पुगे । चप्पल पाएपछि प्रहरी पुनः मण्डलको वर्कशपमा पुगे । प्रहरीसँग पनि उनले पुरानै कुरा दोहोर्याए– राहुल पठाओ गरेर निस्किएका थिए । राहुलको कुरा शंकास्पद लागेपछि प्रहरीले मण्डललाई पुनः पक्राउ गर्यो र प्रहरी वृत्त बौद्ध पुर्यायो । 

त्यसपछि प्रहरीले उनीमाथि विस्तृत अनुसन्धान सुरु गर्यो । सो दिन समेत राहुल आफ्नो वर्कशपबाट बाहिरिएको दाबी गर्ने उनले भोलिपल्ट मात्रै आफूहरुले शाहको हत्या गरेको स्विकार गरे ।
मण्डलले आफूसहित आफ्ना बाबु र वर्कशपमै काम गर्ने अन्य साथीहरु समेत मिलेर राहुलको हत्या गरेको समेत बताए । त्यस्तै उनले आफूहरुले राहुलको शव वर्कशपकै परिसरमा गाडेको बताएपछि प्रहरीले उनलाई हतकडी लगाएर वर्कशपमा पुर्यायो । प्रहरीले राहुलका परिवारलाई समेत बोलायो । 

उनीहरु सबैजना वर्कशपमा पुग्दा निपुले आफूहरुले राहुललाई गाडेको भन्दै वर्कशपको एक कुना देखाए, जहाँ सामान्य रगत समेत लत्पतिएको भेटियो । त्यसपछि प्रहरीले सो ठाउँ खोतल्दा त्यहाँ राहुलको शव भेटियो । परिवार मुर्छा पर्यो । राहुलका परिवारले सो शव आफ्नै छोराको भएको सनाखत गरे । प्रहरीले शवको पोस्टमार्टम गर्न त्रिवि शिक्षण अस्पताल महाराजगञ्ज पठायो र अन्य अभियुक्तको खोजी सुरु गर्यो । 

चप्पल भेटिएकै दिन फरार भएका निपुका बाबु उत्तम मण्डल, वर्कशपमा काम गर्ने विजय यादव र करन कुमार महत्तोलाई समेत प्रहरीले नियन्त्रणमा लिएर अनुसन्धान सुरु गरेको छ । त्यस्तै सोही प्रकरणमा सर्लाहीकै जोधन मण्डल र भारत घर भएर सोही क्षेत्रमा काम गर्ने सुनिल शर्मा समेत पक्राउ परेका छन् । 

प्रारम्भिक अनुसन्धानका क्रममा उनीहरुले आफूहरुले राहुलको घाँटी कसेर लडाएपछि टाउकोमा रडले हानेर मारेको बताएका छन् । उनीहरुको बयानलाई सपोर्ट गर्ने घटनास्थलमा डोरी र रडसमेत भेटिएको छ । प्रहरीले उनीहरु सबै जनालाई अदालतबाट ५ दिनको म्याद थप गरेर अनुसन्धान  गरिरहेको जनाएको छ । 

उता राहुलका परिवार प्रहरीको निकम्मापनले आफ्नो छोराका शव ४/४ दिनसम्म नभेटिएको गुनासो गर्छन् । त्यस्तै आफँै तदारुकता दिएर अनुसन्धान गर्नुपर्ने निकायले आफूहरुले अनेक क्लु दिँदा समेत बेवास्ता गरेको उनीहरुको आरोप छ । 

आफूलाई आवश्यक पर्दा सहयोग गर्ने साथीलाई आफैँले हत्या गरेको यो घटनाले एकपटक सबैलाई सोच्न बाध्य बनाएको छ । ‘पैसाको मुख कालो हुन्छ’ भन्ने नेपाली समाजको कथनलाई यस घटनाले एकपटक पुन प्रमाणित गरिदिएको छ ।