ढुक्क हुनुहोस् लोडसेडिङ हुँदैन, हल्लाको पछि नदौडिऔँः कुलमान घिसिङ

काठमाडौँ । ऊर्जा, जलस्रोत तथा सिँचाइमन्त्री दीपक खड्काले नेपालमा अब लोडसेडिङ रोक्न नसकिने भन्दै राष्ट्रिय सभामा दिएको अभिव्यक्तीको नेपाल विद्युत प्राधिकरणले खण्डन गरेको छ । मन्त्रीको भनाई बाहिरिएपछि प्राधिकरणका कार्यकारी निर्देशक कुलमान घिसिङले भने लोडसेडिङ अहिले पनि नभएको र अब पनि नहुने बताएका हुन् । 

कार्यकारी निर्देशक घिसिङले भने सबै पावरप्लान्टहरु रातिमा चल्ने र दिउँसो भारतबाट बिजुली आयात भैरहेकाले लोडसेडिङ नहुने दाबी गरेका हुन् । उनले भने ‘लोडसेडिङ भएको छैन, हुँदा पनि हुँदैन। उनका अनुसार एक हजार मेगावाट बढीका आयोजना राति पूर्ण क्षमतामा चल्ने भएकाले लोडसेडिङ नहुनेमा ढुक्क हुन आग्रह गरे । 

कुलेखानी, माथिल्लो तामाकोशी, मध्यमस्र्याङ्दी, मस्र्याङ्दी, चिलिमे, साञ्जेनजस्ता धेरै आयोजनाहरु राति चल्ने भएकाले लोडसेडिङ हुने हल्लामा नदौडिन पनि उनले आग्रह गरे । 

उर्जा मन्त्री खड्काले भने राष्ट्रिय सभामा सांसदहरुले उठाएको प्रश्नको जवाफ दिने क्रममा अब लोडसेडिङ रोक्न कसैले नसक्ने जवाफ दिएका थिए ।