युवतीको अन्तरङ्ग भिडियो परिवार र आफन्तको म्यासेन्जरमा पुगेपछि...

काठमाडौं । प्रेममा रहँदाका अन्तरङ्ग सम्बन्धका गोप्य तस्बिर तथा भिडियो रेकर्ड गरि मनमुटाउ पछि चरित्र हत्या गरेको आरोपमा प्रहरीको साइबर ब्यूरोले एक जनालाई पक्राउ गरेको छ । 

काठमाडौं महानगरपालिका–१७ क्षेत्रपाटी बस्ने भारत बिहार घर भएका ४१ वर्षीय नुनु रायले एक महिलालाई फेसबुकमा साथी बनाएका थिए । प्रहरीका अनुसार रायले महिलासँग भेटघाटका क्रममा भएका अन्तरङ्ग सम्बन्धका क्रियाकलापहरू गोप्य रूपमा रेकर्ड गरी राखेका थिए । उनीहरुको सम्बन्धमा आपसी मनमुटाउ आएपछि ति तस्बिर तथा भिडियो महिलाका आफन्त तथा साथीहरूको म्यासेन्जरमा पठाउने गरेका थिए । 

यसरी ती युवकले आफ्नो चरित्र हत्या गरेको भन्दै पीडित महिलाले साइबर ब्यूरोमा उजुरी दिएक थिइन् । उनको उजुरीपछि रायलाई पक्राउ गरि विद्युतीय कारोबार ऐन, २०६३ अन्तर्गतको कसूरमा जिल्ला अदालत काठमाडौंबाट ७ दिन म्याद थप लिई प्रहरीले अनुसन्धान थालेको जनाएको छ ।