'ट्रकमा भेटिएको २५ करोड प्रकरणमा उपल्लो कनेक्सनको आशंका छ, विशेष छानबिन समितिबाट छानबिन गरौँ': माओवादी सांसद माधव सापकोटा

काठमाडौं । नेकपा माओवादी केन्द्रले काठमाडौँमा ट्रकबाट २५ करोड बरामद भएको घटनाको  विशेष छानबिन गर्न माग गरेको छ । 

प्रतिनिधि सभाको आजको  बैठकमा बोल्दै माओवादीका सांसद माधव सापकोटाले यति ठूलो तस्करी उपल्लो तहको कनेक्सन नभई सम्भव नहुने भएकाले विशेष छानबिन समिति बनाई निष्पक्ष छानबिन गर्न माग गरेका हुन् । 

संसदमा उनले भने , ‘हामी प्रतिपक्षले यो सरकार सुशासनप्रति इमानदार छैन। यो सरकारप्रति आशंका छ भनेर चिन्ता व्यक्त गरिरहेकै थियौँ र छौँ। संगठिन अपराधको जालो कुन रूपमा संगठित भएर झांगिरहेको छ भन्ने कुराको चित्र आएको छ। यो घटनामा प्रति हाम्रो पार्टीको ध्यानाकर्षण भएको छ। यति ठूलो तस्करी उपल्लो तहको कनेक्सन नभई सम्भव छैन।’
सापकोटले अहिलेसम्म भरिया र ड्राइभर मात्रै पक्राउ गरेर ठूलो काण्ड डिसमिस पार्ने गरिएको भन्दै राजस्व अनुसन्धान विभाग प्रधानमन्त्री कार्यालय मातहतमा भएकाले विशेष छानबिन समिति निर्माण  गर्नुपर्ने माग गरेका हुन् ।