उपत्यका केन्द्रीत निर्णायक आन्दोलन गर्ने राप्रपाको घोषणा

काठमाडौँ । राष्ट्रिय प्रजातन्त्र पार्टीले उपत्यका केन्द्रीत थप आन्दोलनको घोषणा गर्ने निर्णय गरेको छ । 
पार्टी कार्यालय धुम्बाराहीमा मंगलबार बसेको राप्रपा कार्यसम्पादन समितिको बैठकले पार्टीले उठाएका माग पुरा गर्न दवाव दिनका लागि भन्दै उपत्यका केन्द्रीत थप आन्दोलनको घोषणा गर्ने निर्णय गरेको राप्रपा अध्यक्ष राजेन्द्र लिङ्देनले जानकारी दिए । 

पार्टीको आन्दोलन परिचालन मूल समितिको बैठक चैत्र १२ गते बस्ने र थप उपत्यका केन्द्रीत आन्दोलनका कार्यक्रमहरु सार्वजनिक गर्ने उनले बताए । 

बैठकले समान विचार राख्ने सबै शक्तिहरुलाई आफ्नो नेतृत्वको आन्दोलनमा सहभागी हुन आह्वान गरेको छ भने वर्तमान सरकार सवै क्षेत्रमा असफल भएको निष्कर्ष बैठकले निकालेको अध्यक्ष लिङ्देनले बताए । 
उनले राजसंस्थाको पक्षमा राप्रपाको अबको आन्दोलन निर्णायक हुने दावी गरे । 

उनले राजसंस्था पुस्र्थापनका लागि भन्दै नवराज सुबेदी वा अन्य कसैले बनाएको समितिमा आफु नबस्ने स्पष्ट पारे । जुनसुकै शक्तिले पनि राजसंस्थाको पक्षमा आन्दोलन गर्दा राप्रपालाई सहयोग नै पुग्ने उनले बताए ।