अब मन्त्री निवासक्षेत्रमा पनि निषेधाज्ञा, भैँसेपाटीमा पाँच जनाभन्दा बढी भेला हुन नपाइने

काठमाडौं । सरकारले भैँसेपाटीस्थित मन्त्रीनिवास क्षेत्र सहित पूल्चोकमा निषेधाज्ञा जारी गरेको छ । आइतबार जिल्ला प्रशासन कार्यालय ललितपुरले पुल्चोकस्थित यूएन हाउस, पुरानो मन्त्रीनिवास क्षेत्र र भैंसेपाटीस्थित नयाँ मन्त्रीनिवास क्षेत्रमा निषेधाज्ञा जारी गरिएको जनाएको छ ।

निषेधाज्ञ चैत ४ गतेबाट दुई महिनासम्म लागूहुने प्रशासनले जनाएको छ । ललितपुरका प्रमुख जिल्ला अधिकारी रमेश ढकालका अनुसार कार्यपालिका, व्यवस्थापिका र न्यायपालिकाका कार्यालय, अतिविशिष्ट व्यक्तिहरूको निवास तथा मुख्य मुख्य प्रशासनिक केन्द्र र सो आसपासका क्षेत्रमा  निषेधाज्ञा जारी गरिएको हो ।

प्रजिअ ढकालका अनुसार निषेधाज्ञा जारी भएका क्षेत्रमा पाँच जनाभन्दा बढी व्यक्ति भेला भइ अनसन, धर्ना, घेराउ, जुलस, प्रदर्शन तथा सभा जस्ता विरोधका कार्यक्रम गर्न निषेध गरिएको छ ।