केबलकार निर्माण विवादबारे छलफल गर्न गृहमन्त्रालयले बोलायो ताप्लेजुङका स्थानीय प्रतिनिधि

काठमाडौँ । ताप्लेजुङको पाथीभरा क्षेत्रमा केवलकार निर्माण विवाद समाधान गर्न गृह मन्त्रालयले जिल्लाका स्थानीय प्रतिनिधिहरूलाई वार्तामा बोलाएको छ । मन्त्रालयले केबलकार निर्माणका क्रममा उत्पन्न समस्या र विवाद समाधानको लागि विभिन्न पक्षसँग छलफल गर्न बोलाएको हो । 

गृह मन्त्रालयद्वारा गठित वार्ता टोली संयोजक प्रेम प्रसाद भट्टराईले पत्राचार गर्दै आन्दोलनरत पक्षबाट उठाइएका सामाजिक, धार्मिक, सांस्कृतिक तथा स्थानीय समुदायका स्थानीय मागहरूका सम्बन्धमा छलफल गर्न वार्तामा बोलाइएको जनाएका छन् । 

‘ ताप्लेजुङ जिल्लाको पाथीभरा क्षेत्रमा केवलकार निर्माणको क्रममा उत्पन्न समस्या र विवादलाई वार्ता र संवादको माध्यमबाट समस्याको शान्तिपूर्ण समाधानका लागि सम्बन्धित सरोकारवाला आयोजना निर्माण पक्षसँग समेत समन्वय गरी आन्दोलनरत पक्षसँग वार्ता गर्न गृह मन्त्रालयद्वारा गठित वार्ता टोली र आन्दोलनरत वार्ता सहजीकरण समितिबिच माघ २२ गतेदेखि निरन्तर रूपमा वार्ता एवं संवाद भई रहेको ब्यहोरा सबैमा विदितै छ । यसै सन्दर्भमा आन्दोलनरत पक्षबाट उठाइएका सामाजिक, धार्मिक, सांस्कृतिक तथा स्थानीय समुदायका स्थानीय मागहरूका सम्बन्धमा स्थानीय सरोकारवाला सँग वार्ता र संवादको माध्यमबाट समस्याको शान्तिपूर्ण समाधान गर्ने विषयमा वार्ताका लागि ताप्लेजुङ जिल्लाका स्थानीय प्रतिनिधिहरूलाई आमन्त्रण गर्दछु’ पत्रमा भनिएको छ ।